Galiza alcanza as 1.335 deportistas de alto nivel con 40% de mulleres

O Diario Oficial da Galiza (DOG) publicou esta segunda feira a resolución do 17 de setembro de 2024 pola que se recoñecen as persoas deportistas de alto nivel, alto rendemento, e rendemento deportivo de base, persoas adestradoras ou técnicas, persoas xuízas e árbitras recoñecidas de alto nivel, e se relacionan as solicitudes desestimadas e a causa. No momento actual, o número total de deportistas galegos e galegas recoñecidas segue batendo récords e chega xa a 1.335, aumentando tamén a paridade de xénero: 529 mulleres (40%) e 806 homes (60%).

Arredor de 79% de todos e todas elas (1.039) son deportistas galegos de alto nivel —410 mulleres e 629 homes—. Ademais, hai 123 deportistas de rendemento deportivo de base —57 mulleres e 66 homes—; 111 deportistas de alto rendemento —41 e 70—; 34 técnicos de alto nivel —catro e 30—; 18 árbitras e xuízas —doce e seis—, e dez deportistas galegos de alto nivel vitalicios —cinco mulleres e cinco homes—.

Entre estes DGAN vitalicios atópanse Carlos Arévalo, Carlos Pérez Perucho, Teresa Portela e Cristian Toro, no piragüismo; Támara Echegoyen, Nico Rodríguez e Sofía Toro, na vela; Adi Iglesias, no atletismo adaptado; Susana Rodríguez Gacio, no paratríatlon, e Sebastián Chano Rodríguez, na natación adaptada.

Axudas a deportistas

O pasado 1 de agosto, a Fundación Deporte Galego resolvía a segunda  remesa de axudas para os deportistas, técnicos e árbitros galegos e galegas que participaron nos Xogos Olímpicos e Paralímpicos de París 2024, composta nesta ocasión por quince partidas por importe de 117.000 euros. As 'Axudas DGAN 2024' pódense solicitar até o vindeiro 30 de setembro.