O mellor da base galega do judo ten unha cita no 'Cidade de Santiago'
A concelleira de Deportes de Santiago de Compostela, Pilar Lueiro, acompañada por David Neira (delegado comarcal da Federación Galega de Judo) e Xaquín Baldomir (en representación do Judo Club Base), presentaron esta cuarta feira en rolda de prensa o XVI Trofeo Cidade de Santiago-
O evento reunirá esta fin de semana na capital galega a 280 judokas da categoría infantil procedentes de todos os currunchos do Estado español e do portugués, actividade que complementará a iniciativa 'Xogajudo', que achegará esta disciplina a 370 cativos e cativas.
O Pavillón Municipal de Santa Isabel foi a sede escollida para recibir este sábado, día 16 de marzo, e a partir das 9 horas, un certame que adquire a categoría de Campionato de España Infantil de Judo, tanto na súa categoría masculina como feminina, pois encádrase dentro do sistema de competicións anuais e puntuábeis estabelecido pola Real Federación Española de Judo (RFEJ) como sistema de clasificación para o Estatal.
Tamén se levará a cabo no antedito pavillón de Santa Isabel, pero xa o vindeiro domingo, 17 de marzo, o 'Xogajudo' correspondente á zona de Santiago de Compostela, que contará coa participación de 370 deportistas nas categorías benxamín, alevín e infantil de toda a Galiza.
O obxectivo desta iniciativa é "instaurar hábitos de práctica deportiva saudábeis nos rapaces e rapazas, achegando esta disciplina deportiva dun modo fácil e divertido aos nenos e nenas, fomentando así o deporte base", destacou a concelleira de Deportes, que aproveitou a súa intervención para recordar que Santa Isabel tamén acollerá este domingo, a partir das 10.30 horas, o I Trofeo de Judo Promoción, dirixido ás categorías biberón e pre benxamín, entre os 3 e os 5 anos de idade.