O Mera Sup Festival achega até a area oleirense a elite do paddle surf
Cun gran número de competidores e actividades levarase a cabo ao longo desta fin de semana inaugural de maio a quinta edición do Mera Sup Festival, un evento que aspira a continuar fusionando un ano máis deporte, mar, música e gastronomía en Oleiros desde a sexta feira (3 de maio) até o domingo, día 5 de maio.
Durante o certame, o público asistente poderá gozar de dúas competicións de Stand Up Paddle de talle internacional: o Campionato de España e o Galego de Beach Race, que consiste en completar un circuíto entre as ondas que porá a proba a técnica, habilidade e resistencia dos e das riders. Estas chegarán de todas as partes do mundo, desde Hawaii (Estados Unidos de América) até Dinamarca, Suráfrica, o Xapón, Inglaterra, Francia, Italia ou Portugal.
Con respecto aos nomes propios, destacan Connor Baxter e Guillermo Carracedo. O primeiro, hawaiiano, conta con 10 vitorias no Campionato do Mundo no seu palmarés, así como un Europeo que conquistou no mesmo lugar onde se desenvolve o Mera Sup Festival.
Ademais, tamén terán lugar o Estatal de Esprintes de Mar Curtos, no que os e as participantes terán que loitar por chegar canto antes ao seu destino; e o Campionato de España de Prone, que tamén atraerá até a area da praia de Mera (Oleiros) ás mellores da modalidade.
Como engadido, desde a organización salientan que fóra da auga haberá a disposición da xente "música ao vivo a cargo de dj's e bandas como Samba dos Amigos, Anuncia e Juego Sucio; deporte adaptado da man de Enki; obradoiros de manualidades; xornadas de limpeza de praias e recollida de residuos; roteiros e saídas en paddle surf para afeccionadas; e clinics e sesións para aquelas persoas que desexen perfeccionar as súas habilidades" neste deporte acuático.