O Ourense CF entrará na Primeira RFEF mantendo campo e orzamento

O Ourense CF xa é equipo de Primeira RFEF. A vitoria deste domingo no campo municipal de Oira ante o Oviedo Vetusta por 2-0 clasificouno de maneira matemática cando aínda falta por disputar unha xornada. Para a historia queda unha magnífica tempada dun club humilde que acumulou puntos para chegar a quedar primeiros cun total de 20 vitorias e 10 empates. En conversa con Nós Diario, o presidente da entidade, Camilo Díaz, asegura que se chegou até aquí "polo traballo de moita xente que estivo sempre ao longo da historia ao redor do club, achegando cadaquén desde a súa parcela". Un club que foi medrando O Ourense CF naceu co nome de Ponte Ourense Club de Fútbol en 1977, fundado por Plácido Díaz Fernández. Comezou a súa andaina na Terceira Rexional local e proclamouse campión o primeiro ano ascendendo a Segunda Rexional local. Á seguinte tempada, cunha traxectoria impecábel como invictos, o equipo foi campión de liga e copa dentro da Segunda Rexional. Nos 80, mudan de presidente coa entrada primeiro de José Iglesias e despois de José Ignacio Gil. Durante o mandato de Iglesias o equipo disputa un amigábel coa selección de Panamá e o equipo, por obras no campo de Oira, ten que dispor doutros terreos de xogo. Fútbol e cultura unidos en Ourense pola Xeración das Irmandades Co cambio de século o club medra e crea na tempada 2005-2006 dous equipos femininos asentando, ademais, unha boa base nas categorías inferiores. A súa aposta polo fútbol sala feminino levouno, desde 2008-2009, até a tempada 2010-11 a chegar a conquistar o campionato estatal ese último ano, un éxito que repetirían co campionato da Copa de España feminina en 2017. Un anos antes, xusto antes de comezar a tempada 2014-2015, o club cambia o seu nome e pasa a denominarse Ourense Club de Fútbol SAD. En 2016 colle o relevo na presidencia Camilo Díaz, fillo do fundador e tamén ex xogador. Na tempada 2021-2022 o primeiro equipo ascende a Segunda RFEF e a tempada seguinte mantense nela malia o sufrimento final. "Partimos dun ano pasado complicado, con xogadores que sen dispoñibilidade para o corpo técnico, polo que chegamos ao final xogándonos o descenso", lembra o presidente. Equipo competitivo Coa mala experiencia da tempada pasada, o Ourense CF reformulou a súa estratexia. "Quixemos facer un equipo competitivo que tentara pelexar polas oito primeiras prazas, nunha categoría que por un partido quedas quinto ou oitavo", apunta Díaz. A aposta saíu ben, en opinión do presidente, "por non contar con lesións e dispor dun bo traballo por parte de xogadores e corpo técnico". Neste sentido, admite que "non era o noso obxectivo clasificarnos, pensamos estar na Copa do Rei e gozar", admite. Esta mesma sensación é a que transmitiu o propio adestrador ourensán, Rafael Domínguez, minutos despois de rematar o partido deste domingo e proclamarse campións e co ascenso no peto. "Hai moito traballo atrás, comezamos este proxecto en primeira rexional e xa estamos en Primeira RFEF", asegurou en declaracións á Radio Galega, "agora hai que preparar un bo ano", engadiu. O técnico do Ourense CF amosou a súa ambición sinalando que de cara á vindeira tempada "co Ourense temos que seguir crecendo, no ámbito futbolístico están a afacerse as cousas moi ben". O 'Abril oteriano' deu comezo en Ourense O futuro Un dos aspectos importantes que axudou tamén nesta fazaña foi o social, o apoio das socias e dos socios. "Estamos moi orgullosos de que axente se una pouco a pouco ao proxecto, as portas do club están abertas a todo o mundo", indica o presidente da entidade. Na actualidade o club conta con algo máis de 800 socias e socios e realiza campañas anuais para aumentar esa base. Coa emoción do momento o adestrador do Ourense CF mostrou a súa alegría, tamén, pola situación de equipos moi cercarnos "como o Arenteiro ou a UD Ourense" que colocan o fútbol das comarcas do Carballiño e Ourense "no fútbol profesional". Camilo Díaz xa pensa no futuro e hoxe mesmo manterá unha reunión coa xunta directiva da entidade ourensá. Recoñece que "aínda é cedo para falar" mais o camiño "está marcado como até agora". Preguntado polas dificultades que terá o equipo en Primeira RFEF con clubs de maior orzamento e posibilidades, lembra que colleu o club en Primeira Rexional e cada ano, desde a xunta directiva "demos un paso máis, tendo en conta que todas as categorías eran difíciles". Os partidos galegos en Segunda e Primeira RFEF Agora, ás portas do fútbol profesional, "esta será a máis complicada e trataremos de aplicar a cabeza, sabendo das limitacións orzamentarias que temos". Porén, o presidente do Ourense CF insiste en que "faremos un equipo moi competitivo para estar á altura". Con todo, fecha un dos temas que podería estar enriba da mesa, como é o do uso do campo de Oira ou outro, como no seu día o do Couto antes das obras. "Na casa, este ano, a verdade é que en Oira sentímonos moi cómodos e o equipo respondeu gañando todo menos un empate e unha derrota", conclúe.