O pádel toma Pontevedra da man do A1 Galiza Open
Pontevedra torna na capital galega do pádel da man dunha proba que debuta no calendario competitivo do país, o A1 Galiza Open.
A proba desenvolverase entre os días 24 e 30 do próximo mes de xuño en tres recintos diferentes da cidade do Lérez: o Pavillón Municipal de Deportes -que acollerá a pista central-, o Pazo da Cultura e o recinto feiral.
Segundo destacou a organización do evento, o pádel é o núcleo "dunha semana con moitas cousas divertidas", pois alén do prato forte, o propio A1 Galiza Open, que reunirá "todas as estrelas do circuíto", haberá palestras impartidas por deportistas como a ximnasta olímpica Almudena Cid e o adestrador de tenis Toni Nadal, concertos de bandas como Celtas Cortos ou La Frontera, food trucks ou clinics formativos impartidos por profesionais do pádel.
Ademais, de forma paralela a este Galiza Open levarase a cabo un torneo de carácter amateur denominado 'Copa de Campións Smilek', no que participarán parellas masculinas e femininas tanto da Galiza como dos estados español e portugués.
O portavoz da empresa organizadora da cita, Carlos Conde, agradeceu o "apoio incondicional" de institucións como o Concello de Pontevedra, a Cámara de Comercio local, a Deputación provincial e o Goberno galego.