O Pump Track volve a Mugardos para decidir o mellor ciclismo galego desta disciplina

A vila de Mugardos (Ferrolterra) acollerá este sábado o campionato da Galiza de Pump Track 2024, unha proba que decidirá nun só día quen destaca a nivel nacional nesta nova modalidade ciclista. Este deporte xa se estreara o ano pasado no municipio, aproveitando un circuíto de nova construción, da man do Club Pulpeiros, a entidade que leva adiante toda unha serie de actividades de promoción e difusión da BTT na comarca. O presidente desta entidade, Ramón Romero, relata a Nós Diario que “foi toda unha aventura” sumarse á iniciativa promocional que partiu da Federación Ciclismo Galego (FCG) empregando un circuíto “que non é de entrada e saída, ten o trazado dun oito” para a Copa da Galiza. Con todo, a experiencia, asegura, “gustou moito por ser exixente, rápido, longo e divertido”. Agora, asumen ser campionato galego superando as 150 inscricións, con promesas locais como Javi Novo e Sergio Veiga. A Caniza reivindícase como a capital galega do 'pump track' Con todo, desde a organización agardan elevar a participación contando con que "nesta disciplina o factor meteorolóxico é fundamental, non se pode disputar en caso de choiva pola súa perigosidade ao ser de asfalto, e a maior parte esperan para anotarse mesmo até o propio día da competición". A falta dalgunhas confirmacións, entre as candidatas e candidatos ao podio figuran deportistas que xa están participando na Copa da Galiza con moi bos resultados. Auxe do Pump Track No auxe desta modalidade ten moito que ver a realización de eventos de deportes urbanos como O Marisquiño. Como exemplo está o deseño do circuíto da Caniza (A Paradanta), inaugurado o ano pasado, no que participou Álex Durán, responsábel das probas do BMX do festival. Ademais, foi fundamental a aposta da propia federación polas modalidades "gravity" e a inauguración de numerosos circuítos por todo o país, como foi o de Mondariz (O Condado) en 2021 ou en 2023 o xa citado da Caniza máis os de Vilagarcía de Arousa (O Salnés) e Abegondo (comarca da Coruña), por pór só algúns exemplos. A I Copa Galiza de 'Pump Track' de ciclismo estrearase na Caniza Os circuítos teñen en común estar fechados e facilitar a posibilidade de empregar calquera outro vehículo de rodas que non teña motor, como é o caso tamén dos patíns e os monopatíns. “O feito de estar fechados e concentrados nun mesmo espazo é moi práctico para que o público non perda de ver nada da competición”, apunta Romero. Alén diso, o presidente da entidade recoñece que outro factor é "a espectacularidade das probas, con saltos que deixan imaxes moi impresionantes". Malia ser un deporte novo, a Galiza xa conta con deportistas de elite. Neste sentido, no Campionato de España de 2023 quedaron campioas a júnior Alba Fernández e a infantil Ainoa Posada, ademais de conseguir subcampionatos Sergio Veiga nos elite-sub23 e Xoel Pereira nos júniors. A Enduro Monte Castelo levará o mellor da modalidade a Burela Club Pulpeiros Ramón Romero, explica que levan “oficialmente” traballando como club desde 2006, mais o grupo fundador xa estaba activo anos antes. A súa actividade "estrela" son as probas de enduro da Copa de España, mesmo cun campionato estatal, que conta cun percorrido que visita os municipios ferrolterráns de Mugardos e Ares. Ademais, inciden na promoción da bicicleta de montaña preparando rutas para todas as idades, como a que decorrerá o 22 de setembro co nome de ‘Entre dúas rías’. Esta saída está pensada “para a xente que non pense en competir e, aínda así, contamos con que se inscriban case 300 deportistas”, asegura Romero. Máis directamente relacionado co Pump Track, o presidente da entidade salienta a aprendizaxe coa bicicleta de montaña das características técnicas da nova modalidade. "O truco destas pistas é que a bici non se pare nunca", sinala Romero, "polo que quen compita ten que seguir coa propia inercia das dúas rodas, sen empregar os pedais", agrega. Chega a Moaña o 'Endurrazo', segunda etapa da Copa de España de Enduro Copa da Galiza Alén do campionato desta fin de semana, o Pump Track continúa a nivel nacional coas probas da Copa da Galiza. A competición, que comezou en Moaña (O Morrazo) o 14 de abril e pasou por Vilagarcía de Arousa (O Salnés) e Xove (A Mariña) en xuño, continuará o vindeiro 31 de agosto en Pereiro de Aguiar (comarca de Ourense) para rematar o 7 de setembro en Ourense. Na clasificación provisional figuran nos primeiros postos en infantil, Paula Rodríguez (Maese Riders Team) e Hugo Rodríguez (Avanza A.D.); en cadete, Ainoa Posada (Lunalfa C.C. Ponteareas) e Pedro Fernández (Osdosacho C.); en júnior, Alba Fernández (Val do Ullo C.C.) e Saúl Vilar (BMX Cromoly); en sub-23, Sofía Ferreiro (Esmelle C.) e Iván García (Val do Ullo C.C.); en elite, Yuli Paola Rey (Kamikazes C.D.) e Alejandro Pérez (Maese Ourense); en máster 30, Tamara Santos (THC Bike) e Saúl Moreira (Siete Club MTB); en máster 40, Cristina Romero (C.C. Ribadumia Bikescola) e Francisco Manuel Lorenzo (Bike ou non vai); e en máster 50, Rosa María López (Maese Ourense) e Alberto Pérez (Vigoenduro MTB).