"Recortes e despidos, para os directivos!"
12 de xaneiro de 2013 (13:44 h.)
"Recortes e despidos, para os directivos". O cántico resume á perfección a marcha de traballadoras e traballadores afectados polo desmantelamento de Novagaliciabanco, que nestes mesmos momentos está a tomar as rúas de Santiago.
O desmantelamento de Novagaliciabanco leva aparellado un mínimo de 2.500 despedimentos e o feche de máis de 300 oficinas, o que vai deixar desatendios moitos concellos do rural galego.
As e os traballadores están a manifestarse en Santiago contra un plano que, afirman, só persegue pór a entidade en bandexa de prata para ser absorbida a prezo de saldo por un grupo financeiro transnacional.
No comezo da marcha, o secretario da CIG Banca, Clodomiro Montero, dixo que os despedimentos non benefician a ninguén, mentres o portavoz do grupo parlamentar do BNG, Francisco Jorquera, defendeu o mantimento de todos os postos de traballo.