Os alimentos son 10,7% máis caros que hai un ano

O Índice de Prezos de Consumo (IPC) subiu na Galiza 0,8% en agosto en relación co mes anterior, aumentando a súa taxa interanual até 2,7%, segundo os datos publicados onte polo Instituto Nacional de Estatística (INE) esta terza feira. Desta maneira, o IPC queda no país 0,1% por riba da taxa interanual rexistrada a nivel estatal, onde os prezos medraron tamén 2,6% en agosto respecto ao mesmo mes de 2022, após un aumento de 0,3%, polo encarecemento dos carburantes que tiveron un aumento de 7,2% desde xullo. O elevado prezo dos alimentos fai repuntar a inflación na Galiza, que sobe máis que no Estado Alimentación en 10,7% En agosto, o prezo dos alimentos e as bebidas non alcohólicas tamén continuaron medrando. Na Galiza subiron 0,6% con respecto ao mes de xullo (a nivel estatal o aumento foi de 0,2%) e seguen a marcar un encarecemento que nos últimos 12 meses chegou a 10,7% cando, a nivel estatal, foi de 10,5%. En taxa mensual con respecto a xullo, a nivel estatal, os alimentos que máis aumentaron de prezo foron os aceites e as graxas (+6,6%), as legumes e hortalizas (+1,5%), o peixe e o marisco (+0,7%) e a carne (+0,2%). Un caso significativo é o aceite de oliva que subiu en agosto no Estado español outro 8,7% e xa é o produto da cesta da compra que máis encareceu o seu prezo desde agosto de 2022, chegando a valer un 52,5% máis. Outros produtos cun salientábel aumento foron o azucre (+ 42,5%) ou a pataca (+18%). No caso contrario estarían as froitas que tiveron unha repercusión negativa na taxa mensual do IPC de agosto, con respecto a xullo, de -3,9%. A factura medioambiental Para o profesor de Historia Económica Mundial na Universidade de Santiago (USC), Adrián Dios, o caso do aceite permite “falar de cambio climático e de economía a un tempo”. Recoñece, en declaracións a Nós Diario, que o factor empresarial, en relación aos stocks, é “difícil de avaliar por non contar con información da evolución dos custos para saber se teñen relación co aumento de prezos”. O IPC da zona OCDE sobe por primeira vez desde outubro Porén, unha das realidades, para este economista, son “as grandes secas que reduciron case á metade ás colleitas e unha previsión de menos produción tamén para o ano 2024”. Con este panorama, “os prezos poderían seguir aumentando, máis se engadimos a presión de Turquía que prohibiu a exportación de aceite para controlar o seu prezo interno”. Incremento da inflación Sobre os datos do IPC en xeral, Adrián Dios, considera, pola súa tendencia, que poderían sinalar “volver a un maior aumento da inflación”. Lembra que “semellaba a principios de ano que había certa moderación mais en realidade tiña a ver coa suba de prezos de 2022”. Agora, co IPC de agosto medrando polo prezo dos carburantes e algúns alimentos, considera que hai elementos para non ser optimistas. Neste sentido, apunta que "todas as empresas precisan electricidade e as propias persoas precisamos carburantes". Por este motivo, para este economista o panorama está marcado polo “recorte de produción de petróleo que, a priori, desenvolverán Arabia Saudí e Rusia, que fai que suban os prezos dos carburantes”. Alén diso, engade que se incrementou o prezo do gas no mercado europeo, "determinado, na súa medida, polas folgas nas plantas deste combustíbel, fará que os prezos suban”. Por último, outra cuestión a ter en conta, en opinión de Adrián Dios, é que “os beneficios empresariais aumentan máis que o que aumentan os prezos”. É un “aproveitamento” dunha situación protagonizada pola “súa volatilidade”. O IPC repunta 2,6% en agosto respecto a un ano antes pola suba dos combustíbeis Nadia Calviño olla cara a Unión Europea Para o Goberno español, o dato estatal segue a ser positivo. A vicepresidenta primeira e ministra de Asuntos Económicos en funcións, Nadia Calviño, salientou onte, pouco despois de coñecerse as cifras, que as cifras do IPC de agosto seguen por baixo de 3 %, unha “menor inflación que a economía europea”, en referencia a 6,1% que ten agora mesmo Alemaña. “España consolídase como a economía europea con maior crecemento e menor inflación, o cal beneficia á competitividade das nosas empresas e tamén o poder adquisitivo dos salarios», subliñou Calviño nunhas declaracións remitidas aos medios de comunicación. "Tería que rebaixarse a euforia, estar mellor que a UE non significa que esteamos ben", aclara Adrián Dios. Lembra cuestións como a excepción ibérica no mercado eléctrico "que foron elementos positivos para acontrolar a inflación mais non resolveron o problema".