O Canadá súmase á guerra económica contra Beijing e impón aranceis do 100% aos vehículos eléctricos fabricados na China
O Goberno do Canadá impuxo aranceis do 100% aos vehículos eléctricos de batería (BEV) fabricados na China e importados ao seu Estado, segundo anunciou esta segunda feira o Executivo canadense nun comunicado. Este movemento, que aliña o Estado norteamericano cos seus aliados dos EUA e a Unión Europea, vén acompañado dun imposto do 25% aos produtos de aluminio e ao aceiro procedentes da China, como medida para medida para protexer os fabricantes estatais.
O Goberno encabezado polo primeiro ministro Justin Trudeau comunicou tamén que estes aranceis aos vehículos eléctricos provenientes da China entrarán en vigor a partir do 1 de outubro de 2024, e incluirán a automóbiles turismos, camións, autobuses e furgonetas de repartición eléctricos, así como algúns modelos híbridos.
"Este imposto adicional aplicarase ademais do arancel de importación de nación máis favorecida do 6,1% que se aplica actualmente aos vehículos eléctricos producidos na China e importados a Canadá", engadiu o Executivo no comunicado. O imposto ás importacións de produtos de aceiro e aluminio procedentes da China, pola súa parte, entrará en vigor a partir do 15 de outubro de 2024.
Protexer a industria de automoción canadense
Tras unha reunión do gabinete en Halifax, Nova Escocia, o Goberno de Trudeau informou de que implementa estas medidas para protexer a industria de automoción canadense, que sustenta máis de 125.000 empregos, á vez que indicou que a súa cadea de subministración de vehículos eléctricos "atópase entre as primeiras no mundo".
"Con todo, os traballadores e o sector do automóbil canadenses enfróntanse actualmente a unha competencia desleal por parte dos produtores chineses, que se benefician de políticas e prácticas inxustas e alleas ao mercado", acusou o Goberno canadense ao chinés na nota.
O Executivo canadense sinalou que a "política intencional e dirixida polo Estado da China de sobrecapacidade e a falta de normas laborais e ambientais rigorosas ameazan os traballadores e as empresas da industria de vehículos eléctricos en todo o mundo" e "socavan a prosperidade económica a longo prazo do Canadá".
Ademais, o sector automobilístico do Canadá está altamente integrado cos Estados Unidos de América, xa que a gran maioría da súa produción de vehículos lixeiros, que foi de 1,5 millóns de unidades o ano pasado, expórtase cara ao seu veciño do sur. Polo que agora o Estado norteamericano súmase ao seu aliado, quen este ano impuxo un arancel do 100% ás importacións de vehículos eléctricos de batería importados desde a China.
Así mesmo, súmase á Unión Europea, que tamén anunciou novos aranceis propostos aos vehículos eléctricos provenientes da China, aínda que a niveis máis baixos que os que propoñen os Estados Unidos e agora Canadá. Os produtos fabricados por SAIC Motor enfrontan aranceis adicionais na UE do 36,3%, mentres que Geely Automobile Holdings e BYD enfrontan aranceis do 19,3% e o 17%, respectivamente, segundo un proxecto de decisión publicado a semana pasada pola Comisión Europea. O fabricante estadounidense Tesla, pola súa parte, terá un arancel adicional do 9% para os seus vehículos fabricados na China e traídos á UE.
Segunda consulta de 30 días sobre outros sectores
Ademais, o Goberno canadense tamén anunciou que porá en marcha unha segunda consulta de 30 días sobre a imposición de aranceis adicionais a outros sectores fundamentais "para a prosperidade futura do Canadá", como as baterías e os seus compoñentes, os semicondutores, os produtos de enerxía solar e os minerais esenciais.
Así mesmo, o Goberno canadense revelou a súa intención de limitar a elixibilidade para os Incentivos para Vehículos de Cero Emisións (iZEV), os incentivos para Vehículos Medianos e Pesados de Cero Emisións (Imhzev) e o Programa de Infraestrutura para Vehículos de Cero Emisións (ZEVIP) aos produtos fabricados en Estados que negociaron acordos de libre comercio co Canadá. "O noso Goberno está a avanzar con medidas decisivas para nivelar o campo de xogo, protexer os traballadores canadenses e igualar as medidas tomadas por socios comerciais clave", afirmou a viceprimeira ministra e ministra de Finanzas do Canadá, Chrystia Freeland.