Por que o comercio galego exixe recuperar "as rebaixas de toda a vida"?

A Xunta da Galiza determinou, para este ano, dous períodos de rebaixas. O primeiro é o das denominadas “rebaixas de inverno”, que comezaron o pasado 7 de xaneiro e rematarán o 7 de abril. Despois virán as “de verán” que terán o seu inicio o 1 de xullo e finalizarían o 30 de setembro. Se no seu momento estes períodos estaban asociados ao recurso de dar saída ao stock dos almacéns, agora son unha ferramenta de mercadotecnia desde que no verán do 2012 o Goberno español, daquela coa presidencia de Mariano Raxoi (PP), aprobara a fin das rebaixas reguladas e ampliara o horario comercial ás 90 horas semanais (fronte ás 72 estipuladas). As rebaixas de xaneiro de 2024 xerarán 15,3% contratos menos que hai un ano Ademais da apertura física nos estabelecementos, cada vez é máis importante a venda por Internet, un espazo dominado polas grandes marcas, sobre todo no apartado da roupa e aparatos tecnolóxicos, mais que se estendeu nos últimos anos a todos os sectores. Neste sentido, multinacionais como Inditex adiantaron ao 6 de xaneiro as rebaixas este ano a través da súa web. Nome simbólico Para o presidente da Federación Galega de Comercio, José María Seijas, das rebaixas “só queda o nome”. Recoñece a Nós Diario que leva anos repetindo que, dunha maneira ou outra, “agora comezan o 1 de xaneiro e rematan o 31 de decembro, estamos vendendo con descontos todo o ano”. Esta circunstancia, asegura, é “difícil de asumir polos comercios do noso tamaño” e só queda “unha pequena parte de nostálxicos que puxeron os carteis este ano”. Seijas indica que se antes a finalidade era vender o que quedaba da tempada, mais “coa cada vez máis extensa campaña de Nadal, mesmo coa introdución de tendencias como o 'Black Friday', agora non”. Por este motivo, insiste en que o Goberno español debería contar “cunha nova regulamentación polo ben de comerciantes e consumidores” e rematar coa actual “desorientación” nestas datas. As rebaixas de impostos fan perder á Xunta 2.063 millóns en catro anos Coinciden con esta avaliación dúas asociacións de comerciantes de municipios xeograficamente tan afastados como Carballo (Bergantiños) e Tomiño (Baixo Miño). No primeiro caso, a xerente do seu Centro Comercial Aberto, María del Carmen Freire, recoñece a Nós Diario que "os descontos poden vir en calquera momento" e que aínda non fecharon a campaña de Nadal "porque remata coa fin das rebaixas". No segundo, desde a Asociación de Autónomos de Comercio, Hostalaría, Industria e de Centros Comerciais Abertos de Tomiño (Adeto), o seu xerente, Gonzalo Lomba, admite que "o Nadal foi moi frouxo, peor que anos anteriores". Explícase esta situación "polo aumento dos custos de todo este 2023" e a situación das familias. No caso desta comarca, Lomba sinala a gran competencia que existe con Portugal, "onde organizan grandes eventos comerciais que atraen moita clientela galega" e mais "as grandes superficies que temos na zona". 39% máis de vendas con Internet Ademais da desestacionalidade das rebaixas, o elemento que máis modificou o funcionamento do comercio galego, tamén neste período, foi a introdución da venda por Internet. “Levamos tempo insistindo na necesidade de estar en Internet, estamos creando a plataforma correspondente ao considerar que o futuro do comercio está aí”, asegura Seijas, “para non perder clientes que despois da pandemia da Covid-19 abandonaron a compra física e para dar a coñecer os negocios de proximidade”, engade. De todas as maneiras, o responsábel da federación cre que “non vale todo”. Alerta da “moda de páxinas web subvencionadas pola Xunta da Galiza e polos concellos” en municipios con pouco comercio, “no que cada un vai polo seu lado”. En todo caso, apunta que, polos datos que teñen, “os comercios que contan con venda online venden un 39% máis”. A venda por internet facilitou que moitos comercios obtiveran vendas fóra do seu municipio. “Agora xa non hai distincións, dá igual que estea nunha vila que nunha cidade, no centro ou nun barrio lonxe del”, ditamina Seijas, "o importante é que a web estea ben actualizada e cunha boa imaxe, leva o mesmo traballo que un escaparate", conclúe. O galego segue fóra das rebaixas nos grandes centros comerciais En Tomiño, o comercio "tenta adaptarse" á venda por Internet mais, en opinión de Gonzalo Lomba, non ten a capacidade nin a axilidade para chegar ao consumidor ou á consumidora". En todo caso, o comercio notou que "a xente achégase cada vez menos á tenda física". En Carballo a imaxe é diferente. Freire lembra que do medo inicial á venda por Internet pasouse a que a Internet "leva unha porción importante", mais defende que o comercio "demostrou músculo". Neste sentido, sinala que "polo que me din os comercios, medrou máis a venda física que a que se fai por Internet". Constata, desta maneira, certa conciencia de "mercar no lugar onde pagamos os impostos e non en portais web de fóra". Menos contratos para a campaña de rebaixas No comercio, como no resto de sectores, a suba de prezos prexudicou. “As familias teñen que apertar un pouco o cinto para chegar a fin de mes e nós tamén”, confesa Seijas. O período de rebaixas foi tradicionalmente, tamén, un momento de aumento da contratación para atender o incremento de traballo nos comercios e grandes superficies. Un recente estudo realizado pola empresa de recursos humanos Randstad rachou con esta idea. Segundo esta entidade a recente campaña de rebaixas na Galiza xerou 6.565 contratos, un 15,3% menos que en 2023. Porén, desde a Federación Galega de Comercio afirman que o persoal do comercio "traballa connosco todo o ano, moitas veces toda unha vida, polo que non acostumamos facer contratacións por tempada como fan outras plataformas". Seijas dubida das "cifras que dan as grandes compañías, mesmo na realidade que significan: contratos que comezan en novembro e que trasladan ao paro o persoal en febreiro". Considera que no número de contratos pola campaña de rebaixas "acostuman sumar tamén outros sectores alleos ao comercio, como é o do propio transporte que empregan para achegar as vendas a domicilio".