As compañías eólicas aumentaron o pasado ano os seus ingresos na Galiza en 75%, até os 1.989,6 millóns de euros

A s compañías eléctricas con actividade na Galiza obtiveron no ano 2022 uns ingresos de 1.989,6 millóns de euros. A maior facturación correspondeuse cos meses de marzo con 252,4 millóns de euros, outubro con 188,4 millóns de euros, xaneiro con 165,2 millóns de euros e decembro con 163,4 millóns de euros. No primeiro trimestre do ano, os números das empresas víronse favorecidos pola alza de prezos da electricidade e no último trimestre, pola elevada produción. O prezo da electricidade no mercado grosista -intermediario entre o produtor e usuario- rexistrou un custo medio para a anualidade de 204,7 euros megawatts/hora (MW/h). As tarifas máis elevadas déronse nos meses de marzo con 294,3 euros MW/h, agosto con 252 euros MW/h, setembro con 217,2 euros MW/h e xaneiro con 210 euros MW/h. Precisamente, os prezos máis elevados en todas estas mensualidades estiveron fixados pola electricidade de orixe hidráulica. A produción eléctrica de orixe eólica situouse en 2022 na Galiza en 9.719.900 MW/h. Segundo os datos que vén de fornecer Rede Eléctrica Española (REE) para ese exercicio, os meses con máis xeración de procedencia eólica correspondéronse con outubro, con 1.162.090 MW/h, novembro, con 1.131.435 MW/h, e decembro, con 1.113.995 MW/h. Neste caso, as cifras do último trimestre do ano resultaron decisivas para manter os niveis medios de xeración do país nos últimos anos. Os concellos galegos con eólicos cuadriplican a media estatal Aumento de ingresos As empresas enerxéticas aumentaron os seus ingresos en relación a 2021 en 854,9 millóns de euros. Neste sentido, a facturación das compañías enerxéticas pola súa produción renovábel nesa anualidade foi de 1.134,7 millóns de euros, logrando a maior recadación nos meses de decembro con 287,7 millóns de euros, en novembro con 239,2 millóns de euros, en outubro con 167,2 millóns de euros e en xaneiro con 114,7 millóns de euros. Suba do prezo da luz A electricidade incrementou o seu prezo en 2022 en 72,4% en relación coa anualidade anterior. Segundo as cifras achegadas polo Operador do Mercado Ibérico da Enerxía, en 2021, o prezo medio anual da electricidade no mercado grosista situouse en 118,7 euros MW/h. Así, os custos máis elevados rexistráronse en novembro, con 274,5 euros MW/h, en decembro con 239,1 euros MW/h e en outubro con 212,2 euros MW/h. Concretamente, o custo da electricidade disparouse na segunda metade do ano. A xeración eléctrica de orixe eólica rexistrou uns datos moi semellantes neses dous exercicios. A este respecto, a produción de 2021 ficou en 9.560.091 MW/h, 159.809 MW/h menos que en 2022. Nesta dirección, a xeración eólica alcanzou os seus números máximos en febreiro, con 1.273.594 MW/h, en decembro, con 1.190.750 MW/h, en xaneiro, con 1.025.512 MW/h e en novembro, con 871.577 MW/h. O canon eólico recada 4% menos que hai cinco anos malia haber 31 parques máis Galiza representa unha parte importante na conta de resultados das compañías enerxéticas con sede en Madrid. Neste sentido, o primeiro xerador de electricidade de orixe eólica é Iberdrola con 599,5 megawatts e 18 parques no país, sendo os seus accionistas de referencia o fondo soberano de Qatar, con 9,72%, Kutxabank, o Banco de Noruega e o fondo de investimentos estadounidense Blackrock. Acciona Enerxía písalle os talóns a Iberdrola. A sociedade madrileña propiedade da familia Entrecanales explota 562,3 megawatts e 26 parques eólicos na Galiza, construídos entre 1998 e 2005. A continuación sitúase outra empresa con enderezo en Madrid, Naturgy, con 93,2 megawatts e 16 complexos de xeración no país, sendo o seu principal accionista a financeira La Caixa, con 24,4% do capital. A compañía pública italiana Enel, propietaria da antiga Endesa e con sede social na capital do Estado, é o cuarto operador eólico do país, con 262 megawatts e 13 parques operativos. O membro do Colectivo Bidán de debate enerxético Quico da Silva afirma, en declaracións a Nós Diario, que “os datos evidencian a importancia e a necesidade dunha estratexia enerxética de país, dun ente ou organismo que planifique, execute e participe no seu desenvolvemento, no que se consideren todas as oportunidades do marco competencial actual para unha nova lei galega do sector eléctrico, que contemple, entre outros aspectos, facer uso dos excedentes dentro do denominado quilómetro cero ou consumo de proximidade”. A Xunta tomba o parque eólico Soesto, entre Laxe e Vimianzo, polo seu impacto na fauna Da Silva considera chave a aposta polo quilómetro cero enerxético. Esta proposta consiste “en achegar os consumos a onde está a produción por razóns de eficiencia económica e de sustentabilidade ambiental”. Nesta liña, explica que “achegar as industrias aos centros de xeración permite abaratar os consumos, eliminar as perdas de electricidade polo transporte, que en 2022 representaron 2 millóns de megawatts/hora, e avanzar nun modelo definido nas políticas comunitarias”. Exportación O Colectivo Bidán destaca o potencial da Galiza como produtor de electricidade. A este respecto, lembra que “a electricidade exportada polo país en 2022 supera o consumo industrial galego de 2020”. Nesta dirección, Da Silva propón “medidas que permitan aproveitar estas fortalezas para favorecer o desenvolvemento endóxeno da Galiza e convertela nun polo industrial de referencia”. Galiza exportou en 2022 o 40,5% do total da electricidade xerada no país Evolución da demanda e xeración eléctrica per cápita na Galiza. Galiza xerou 22.451.676 MW/h de electricidade en 2022. A produción de orixe renovábel representou 14.524.646 MW/h e a de orixe non renovábel 7.891.030 MW/h. Neste sentido, deuse unha caída na produción de 1.753.345 MW/h, como consecuencia da caída da xeración eléctrica de orixe hidráulica por motivo da seca. O consumo eléctrico da Galiza en 2022 ficou en 13.359.478 MW/h. Nesta anualidade, os consumos rexistraron unha caída de 4.190.761 MW/h en relación a 2021, o que representou unha baixada de 22,9%. A causa principal desta situación derívase do paro na actividade das cubas de electrólise de Alcoa, o primeiro consumidor eléctrico da Galiza e do Estado. A produción eléctrica de orixe renovábel voltou a ser un ano máis superior ao total do consumo galego. Mentres a xeración de electricidade mediante enerxías limpas ficou en 14.524.646 MW/h, o consumo interno fechou en 13.359.478 MW/h, sendo inferior en 1.165.228 MW/h a produción renovábel. Así, a produción de orixe renovábel superou en 8% o consumo galego. Galiza exportou en 2022 o 40,5% do total da electricidade xerada no país. As cifras situáronse por riba das últimas anualidades, chegando a 28,1% en 2021, 31,8% en 2020, 25% en 2019 e 35% en 2018. Así, practicamente a terceira parte da electricidade producida polas distintas tecnoloxías non se utiliza no país, destinándose a outros territorios que consomen o produto final, sen cargar cos custos ambientais e sociais asociados aos territorios produtores.