A compravenda de vivendas volve a terreo negativo en maio ao caer 22%

A compravenda de vivendas na Galiza afundiu 22,3% o pasado maio en comparación co mesmo mes de 2023, con 1.370 operacións, segundo os datos publicados polo Instituto Nacional de Estatística esta segunda feira. Así, a compravenda volve a terreo negativo após a repunta interanual rexistrada en abril.

A caída na Galiza é a cuarta máis acusada de todo o Estado español, nun mes de descenso medio de 21,5% no conxunto estatal. E se ben o descenso é xeneralizado, prodúcese con menor intensidade en Euskadi (-3%), A Rioxa (-8,6%) e Estremadura (-14,2%).

Do total de operacións efectuadas na Galiza en maio, case todas foron de vivenda libre (1.343), con só 27 casos nos que se trataba dunha protexida. A maioría foron de vivenda usada, con 1.025, e as 345 restantes eran de nova construción.

As operacións realizadas en total en maio sobre vivendas foron 2.617: as 1.370 compravendas e mais 684 herdanzas, 15 doazóns, 547 do apartado 'outros' e unha permuta.

E de forma global, as leiras transmitidas na Galiza en maio foron 6.564, das cales 4.833 eran urbanas —2.617 vivendas, 2.016 doutro tipo urbano e 200 solares— e 1.731, rústicas. A venda de leiras caeu até 34% na comparativa interanual no país.

No tocante ás leiras urbanas, a transmisión produciuse do seguinte modo: 2.493 compravendas, 1.180 do apartado 'outros', 1.115 herdanzas, 35 doazóns e 10 permutas. Por parte das leiras rurais, a repartición é a seguinte: 727 herdanzas, 668 compravendas, 303 doutro tipo, 22 doazóns e 11 permutas.