O custo do barril de petróleo subiu 33% en tres meses

Durante os últimos tres meses, desde o 27 de xuño até o fechamento dos mercados nesta cuarta feira, 27 de setembro, o prezo do barril de petróleo tipo Brent, de referencia no continente europeo, ascendeu máis de 33%, ao pasar a súa cotización de 72,5 dólares por barril (68,75 euros) aos 96,45 dólares por unidade (91,46 euros). Á finalización desta cuarta feira, a unidade alcanzou un valor en bolsa de 96,45 dólares, 2,49 máis que na xornada anterior, o que supuxo un incremento de 2,65%. Neste contexto, Bank of America (BofA) elevou esta cuarta feira a súa previsión do prezo medio do petróleo Brent a 96 dólares por barril (por riba dos 91 euros) de cara ao último trimestre do ano, segundo indica o último informe semanal sobre o mercado enerxético asinado polo responsábel global de materias primas e derivados do servizo de estudos da entidade, Francisco Blanch. Os Estados produtores de petróleo estenden a restrición da oferta até 2025 O informe apunta que o recente aumento das marxes de refino está a propiciar a suba dos prezos do cru xunto aos estímulos de crecemento do consumo na China e aos recortes de produción petroleira por parte de Arabia Saudita e de Rusia, tal e como acordaron os Estados da OPEP+ (Organización de Países Exportadores de Petróleo que tamén inclúe a participación de Rusia). Nese sentido, o estudo vaticina que a oferta mundial de petróleo diminuirá en 70 millóns de barrís nos próximos tres meses. Con todo, Bank of America mantén a súa previsión de que o barril de Brent caerá en 2024 e situarase nos 90 dólares (por riba dos 85 euros), xa que agarda que a oferta de petróleo non procedente da OPEP+ aumente en 1,2 millóns de barrís diarios grazas ás extraccións da Güiana, Canadá, o Brasil e os Estados Unidos de América. Ademais, se as sancións contra Venezuela e Irán se suavizan máis, a oferta podería aumentar o ano que vén até en 450.000 barrís diarios. Risco de máis inflación Unha nova repunta dos prezos da enerxía podería reavivar os temores inflacionistas en todo o mundo, advertiu Bank of America Ademais, o documento da institución alerta de que unha nova repunta dos prezos da enerxía podería reavivar os temores inflacionistas a nivel mundial, incrementar as subas dos tipos de xuro e, posteriormente, provocar turbulencias financeiras. Verdade descarnada: todo é polo petróleo Bank of America fai estas advertencias a pesar de realizar unhas previsións relativamente moderadas, pois numerosas entidades, como Goldman Sachs, no contexto dos anuncios de redución da oferta por parte da OPEP+, estimaron que o barril de petróleo alcanzará unha cotización por riba do limiar dos 100 dólares (uns 95 euros) durante os próximos meses, sete por riba das previsións que o banco mantiña polo de agora (93 dólares). Con todo, "é pouco probábel que a OPEP+ prema os prezos até niveis extremos, xa que estes xerarían unha destrución residual da demanda", valorou a firma. "Cremos que a OPEP vai ser capaz de manter o Brent no rango dos 80-105 dólares en 2024, tendo en conta o robusto crecemento da demanda, especialmente en Asia", engadiu a entidade a respecto das expectativas para o próximo exercicio. Consecuencias económicas A primeira das consecuencias do incremento do prezo do barril de petróleo poderase advertir nos prezos das gasolineiras. Á espera de que o Boletín Petroleiro da Unión Europea publique esta quinta feira novos datos, o prezo medio dos carburantes proseguiu a pasada semana a súa escalada, encadeando a undécima de subas. Desta maneira, o custo da gasolina alcanzou o seu nivel máis alto do ano 2023 (1,751 euros de media por litro), mentres que o gasóleo rexistrou un valor 16% maior con respecto ao comezo do pasado mes de xullo (1,668 euros de media por litro). O BCE alerta de que as sancións contra Rusia poden elevar o prezo do diésel Outra das implicacións será o incremento dos billetes de avión, debido ao encarecemento do queroseno, que ronda os 130 euros por barril, polo que as expectativas son que o custo dos voos aumente durante o que queda deste ano, especialmente de cara ás vacacións de Nadal. Aínda máis preocupante, pois atinxe aos produtos básicos e á taxa xeral de inflación, é a ameaza de novas alzas nos produtos transportados por estrada (máis de 95% dos produtos que se adquiren no mercado galego). Ao respecto, a Organización para a Cooperación e o Desenvolvemento Económicos (OCDE) xa advertiu que, de seguir a espiral alcista do petróleo perderase o control sobre as subas de prezos e vivirase un novo episodio inflacionista. Por extensión, novas subas de prezos poderían supor novas subas dos tipos de xuro por parte do Banco Central Europeo (BCE). Precisamente esta cuarta feira, Frank Elderson, membro do Comité Executivo do BCE, sinalou que non pode darse por garantido que os tipos de xuro "alcanzasen o seu pico" e recoñeceu, ademais, que os riscos de inflación "están á alza". As petroleiras miran a Venezuela A petroleira española Repsol e a italiana ENI comezaron a enviar compoñentes necesarios para producir combustíbel para reactivar a industria petroleira venezolana, segundo confirmaron esta semana a varios medios especializados. Por outra parte, a relación entre as dúas petroleiras con base na Unión Europea (UE) e Petróleos de Venezuela non se limita ás subministracións necesarias para o refino de petróleo, senón que as operacións conxuntas tamén inclúen a explotación de gas.