Enerxía, auga e centros de datos

Hai uns días Amazon anunciaba un investimento de preto de 16.000 millóns de euros ao longo dos vindeiros dez anos para ampliar os tres centros de datos que ten en Aragón. Os centros de datos veñen sendo o cerebro de internet: aqueles espazos onde se almacenan os datos de empresas, de Administracións Públicas, de ONG e de particulares na nube. En moitos casos son datos críticos, persoais, de clientes ou relativos a procesos empresariais que deben ser protexidos. A previsión é de que vai haber un forte crecemento do tráfico de internet a nivel mundial e do tráfico de datos móbiles nos vindeiros anos, chegando a quintuplicarse en 2027, segundo as estimacións. No mundo hai preto de 4.000 centros de datos, dous de cada tres están nos Estados Unidos. Os mercados de centros de datos máis importantes en Europa atópanse en Frankfurt, Londres, Amsterdam, París e Dublín. Trátase de localizacións onde a potencia eléctrica é dedicada, en gran medida, a manter acesos ordenadores e servidores. En termos de consumo eléctrico, estes centros consomen de media na UE preto de 3% da demanda de electricidade europea, chegando a ser, en Irlanda, de 10% da súa produción de enerxía. En termos de emisións de dióxido de carbono, estes centros son responsables de 5% das emisións de gases de efecto invernadoiro a nivel global. Datos: beneficio e consumo O goberno de Aragón sinala que este investimento económico é o maior feito por unha empresa na historia nesa comunidade, ademais do maior investimento tecnolóxico no Estado e no sur de Europa. As expectativas de xeración de emprego son moitas, preto de 7.000 postos de traballo na rexión e case 18.000 a nivel estatal. Sinalan, ademais, que van manter as colaboracións existentes con centros de ensino para desenvolver o talento e iniciativas de sustentabilidade. En termos de impacto no PIB manéxanse estimacións duns 21.000 millóns, dos que 12.000 ficarían en Aragón, case un 30% do PIB actual aragonés. Entre os elementos positivos que determinaron a selección de Aragón para este investimento, foron, en verbas de Suzana Curic, directora xeral de Amazon Web Services (AWS), "a dispoñibilidade de terreos, o acceso a fontes de enerxía sustentable, un tecido empresarial sólido e consolidado, o talento local e o enorme potencial de crecemento". Concordará vostede que son características que poden ser definitorias, mesmamente, do que empresas do sector TIC poden atopar no noso país, á que habería que engadir o feito diferencial de contar coa sede da AESIA e a aposta pola intelixencia artificial. Aragón presenta datos similares a Galiza en produción de electricidade renovable polo perfil do seu mix e por xerar até un 40% máis de electricidade da que precisa Un dos elementos clave á hora de localizar estes centros de datos é o consumo de electricidade (e de auga). De electricidade tanto para a continuidade ininterrompida da actividade informática e de conexión coa rede como para o mantemento da temperatura e humidade óptimas para os equipos informáticos e a súa refrixeración, que tende a ser líquida, para o que precisa de recursos hídricos. Se ben empresas como AWS, Microsoft Azure ou Google Cloud escollían localizacións frías e do norte europeo, entre outras, porque así aseguraban o mantemento de temperaturas reducidas ao longo do ano, nos últimos tempos está a mudar o criterio de decisión: un dos elementos críticos que condiciona a eficiencia ou ineficiencia no proceso de refrixeración non é tanto a temperatura exterior, senón a humidade. A preferencia, pois, é por localizacións frescas e secas. Galiza, tamén candidata Un dos elementos que decantou a selección de Aragón foi o feito de dispoñer dun parque de xeración de electricidade baseado principalmente en fontes renovables. As multinacionais, por criterios de sustentabilidade buscan asegurar que a electricidade consumida proveña de renovables, polo que rexións que se caracterizan por ter un mix 75-80% renovable son interesantes para este tipo de investimentos. Neste punto convén aclarar que Aragón presenta datos similares a Galiza no referente a produción de electricidade renovable (7-9% de todo o Estado), polo perfil do seu mix renovable (75-80% do total) e por xerar até un 40% máis de electricidade da que precisa, para subministrar a outras rexións deficitarias. Galiza ten capacidade para ser candidata nos procesos de selección deste tipo de investimentos. A aposta polas renovables como país veríase recoñecida como feito diferencial e cun valor engadido fronte a outras rexións non produtoras de electricidade. Este tipo de investimentos constrúen o tecido tecnolóxico e dixital do futuro, ademais de atraer outro tipo de investimentos desta cadea de valor tecnolóxica. Traballemos para conseguilo.