Desde a fin da cota láctea, hai dous anos, fecharon unha de cada dez explotacións galegas

Dous anos sen cotas lácteas e o sector lácteo galego continúa no mesmo escenario de problemas e dificultades, agravado polo continuo feche (que segue, mes tras mes) de explotacións. “O sistema de cotas non era perfecto, pero a liberalización salvaxe que agora se impón é aínda peor”, é unha reflexión partillada por gran parte do sector. Nestes dous anos fecharon mil granxas, 11% das existentes.

E a isto hai que engadir de que se ben o prezo medio na Galiza situábase en xaneiro nos 30'3 céntimos por litro, a maioría das explotacións galegas están a percibir remuneracións entre 26 e 28 céntimos. Moi lonxe dos prezos medios de países como Alemaña (34'13), Francia (35'15) ou Irlanda (35'85). Ou de territorios como Asturias, onde o prezo medio é de 33'4 céntimos. O Ministerio de Agricultura sitúa o gasto de produción por litro de leite en 34 céntimos. Así pois, na Galiza continuamos vendendo por baixo de custos.

Desde a Federación Rural Galega consideran que o futuro do sector lácteo pasa por un cambio nas políticas agrogandeiras que imperan na actualidade. “O sector lácteo galego precisa dunha política, que regule tanto a produción, como as relacións contractuais que se establecen entre os distintos axentes da cadea alimentaria. Do contrario estamos ante unha situación que pode acelerar a desaparición de explotacións leiteiras neste país”.

Desde o Sindicato Labrego Galego (SLG), reclaman “a necesidade de facer políticas públicas de control da produción e dos mercados que garantan prezos dignos e unha distribución racional e xusta da capacidade produtiva dos diversos territorios”.