A electricidade galega, para fóra: Galiza exportou no primeiro semestre até 46% da súa produción eléctrica

A xeración eléctrica chegou entre xaneiro e xuño deste ano a 12.354.141 megawatts a hora (MW/h), o que representa un aumento da produción de 19,8% en relación co mesmo período de 2022. A electricidade de orixe non renovábel sumou 2.957.120 MW/h, rexistrando unha caída en relación ao mesmo período do exercicio anterior de 11,1%. A baixada da produción eléctrica mediante estas tecnoloxías no primeiro semestre da anualidade reduciuse após dispararse no mesmo período de 2022, como resultado da decisión do Goberno do Estado de volver activar a produción de electricidade na central térmica das Pontes (Eume), co obxectivo de facer fronte ás necesidades de subministro e aliviar o prezo da luz. A produccion renovábel A Galiza xerou 9.397.022 MW/h de orixe renovábel no primeiro semestre de 2023. As enerxías limpas representaron 76% do total da produción eléctrica galega, destacando 4.427.231 MW/h de tecnoloxía hidráulica, 4.746.899 MW/h de procedencia eólica e 126.371 MW/h doutras fontes renovábeis. Asemade, foi significativo o incremento da electricidade de orixe renovábel en referencia ao mesmo período de 2022. A xeración renovábel alcanzou nos seis primeiros meses de 2022, 6.565.265 MW/h, isto é, 31,2% menos que en idéntico prazo temporal de 2023. Concretamente, as subas más elevadas neste exercicio danse na electricidade de tecnoloxía hidráulica, que aumenta a súa produción en máis de 100%, ao pasar de 2.005.498 MW/h en 2022 a 4.427.231 MW/h en 2023. Visto e prace da Xunta a un proxecto eólico de Greenalia nos Ancares O pasado exercicio foi, particularmente, malo para a xeración renovábel. Neste sentido, destaca a forte caída da produción por estas tecnoloxías, 43% menos que no mesmo intervalo de 2021, significándose o baixón da electricidade de orixe hidráulica, como consecuencia dunhas condicións climatolóxicas marcadas por unha importante seca e pola ausencia de choivas. O membro do colectivo de debate enerxético Bidán, Fernando Branco, sinala a Nós Diario que “estamos diante dun primeiro semestre de gran xeración eléctrica de orixe renovábel que terá unha caída nos meses seguintes”. Neste liña, apunta a que “a enerxía hidráulica recuperou as producións de exercicios pasados, superando as baixas cifras de 2022”. Branco destaca que “a produción eléctrica por renovábeis cubre de longo o consumo interno galego”. Porén, explica que “desde o ano 2022 baixou moito o consumo, estando moi por debaixo das cifras tradicionais, como consecuencia da alza do prezo da electricidade e da paralización da actividade nunha parte da planta de Alcoa na Mariña, que é o principal consumidor con diferenza do país”. O consumo de electricidade na Galiza no primeiro semestre de 2023 colocouse en 6.691.716 MW/h, o que representa 54,1% do total da produción galega e 71,2% da de orixe renovábel.Neste sentido, aséntase a tendencia da suficiencia eléctrica do país en base ás enerxías limpas e os avances en materia de descarbonización, que o sitúan á cabeza do proceso de transición enerxética no Estado. A nova lexislación eólica da Xunta incumpre a normativa estatal e comunitaria Consumo interno A produción de orixe renovábel vén superando as necesidades de consumo eléctrico da Galiza desde o exercicio de 2020. Nesta liña, na totalidade do ano 2022, cunha caída moi importante da xeración mediante tecnoloxías limpas, estas sumaron 14.524.646 MW/h. Ao tempo, a xeración de orixe renovábel, de 14.524.646 MW/h, superou en 1.165.228 MW/h o consumo interno galego. Os datos de xeración renovábel da Galiza cobren os obxectivos de produción fixados polas autoridades estatais e comunitarias. Aínda así, neste momento atópanse en tramitación outros 17.550 MW eólicos, cuxa entrada en funcionamento implicaría cuadriplicar a capacidade de produción eléctrica do país. Nesta dirección, 11.223 MW asócianse á eólica terrestre e 6.327 MW á eólica mariña nas augas galegas, cunha capacidade que duplica a prevista polo Ministerio de Transición Ecolóxica para todo o Estado Branco entende que “unha vez cubertos os obxectivos de xeración renovábel marcados polo Estado para a Galiza cómpre seguir desenvolvendo proxectos neste ámbito pero analizando o seu retorno social para o país porque as instalacións eólicas levantadas nas últimas décadas non teñen xerado ningún beneficio social”. A Galiza exportou no primeiro semestre deste ano 5.662.425 MW/h de electricidade, o que representa 46% da total xerada na Galiza. O principal destino da produción galega é Madrid, que no mesmo período consumiu 14.071.913 MW/h, dos cales só xerou 494.320 MW/h. Neste caso, só 258.609 MW/h son de orixe renovábel, sendo Madrid a única comunidade do Estado que non conta con ningunha instalación eólica e non xera electricidade procedente do vento. Esta situación é resultado da especialización produtiva interna no espazo estatal. As eléctricas buscan influír na xustiza para controlar o negocio eólico na Galiza As exportacións supuxeron ao longo de 2022 o 40,5% do total da electricidade xerada no país. As cifras situáronse por riba das últimas anualidades, chegando a 28,1% en 2021, a 31,8% en 2020, a 25% en 2019 e a 35% en 2018. Neste sentido, nos exercicios ordinarios, aqueles onde Alcoa se atopa a pleno funcionamento, a terceira parte da electricidade producida polas distintas tecnoloxías non se utiliza no país, destinándose a outros territorios que consomen o produto final, sen cargar cos custos ambientais e sociais. Eléctricas que operan na Galiza gañaron 1.090 millóns só no primeiro semestre As compañía enerxéticas con actividade na Galiza obtiveron entre xaneiro e xuño de 2023 uns ingresos por xeración de electricidade de 1.090 millóns de euros. Segundo os datos do Operador do Mercado Ibérico de Enerxía (OMIE), o prezo medio da luz no mercado grosista nese período situouse en 88,5 euros o MW/hora, alcanzando os valores máis elevados no mes de febreiro, cando chegou a 135,5 euros MW/h. A maior facturación conseguírona as compañías eólicas con 421 millóns de euros, situándose a continuación as hidroeléctricas con 393 millóns. Precisamente, os beneficios achegados pola electricidade de orixe hidráulica ás compañías enerxéticas son moi superiores aos de calquera outra tecnoloxía de xeración, cifrándose os seus custos medios de produción en 22,4 MW/h. Así, os encoros galegos achegaron ás eléctricas no primeiro semestre desre ano 2023 unhas ganancias aproximadas de 294 millóns de euros, como consecuencia do incremento da produción e do prezo da electricidade. A climatoloxía dos ultimos meses avanza uns resultados históricos. Os beneficios obtidos polas compañías enerxéticas dos ríos galegos en 2022 situáronse en 755,6 millóns de euros. As ganancias desa anualidade foron inferiores en 66,2 millóns de euros ás de 2021 pero situáronse por riba dos resultados dos pasados exercicios. Neste sentido, os encoros galegos achegaron ás empresas eléctricas beneficios de 310,4 millóns de euros no ano 2020, de 285,6 millóns de euros en 2019 e de 457,6 millóns de euros no exercicio de 2018.