Galiza rica, pobre, empobrecida...?

Galiza é un país pobre con xente moi rica? Galiza, país rico cun pobo empobrecido? Galiza, país de oportunidades para cazafortunas? Haberá unha análise que diseccione a realidade de forma científica para ter un diagnóstico económico? Ou deberemos nos adaptar a definicións ideolóxicas tanto amicais como de odio? As cualificacións de atrasada, pobre, empobrecida, subdesenvolvida ou en crecemento son todas e cada unha delas cualificacións relativas, que só se sosteñen na súa substancia da comparación. É atrasada en comparación a algún adiantado, ou pobre en relación a un rico, ou empobrecida se se pasou de rico a pobre ou subdesenvolvida en comparación a un desenvolvido. A trampa da persoa estudosa de economía é tratar de demostrar con valores cuantitativos que algunha das cualificacións anteriores son erradas ou, pola contra, axustadas. En economía sucede como se a época das taxonomías dos humanos non tivese desaparecido coa Declaración Universal dos Dereitos Humanos: humanos libres e iguais en dignidade e dereitos, sen distinción algunha de raza, cor, sexo, idioma, relixión, opinión política ou de calquer índole, orixe nacional ou social... Unha ollada desde nós Referíndonos á economía do país chegou o momento histórico de abandonar vellas análises: mirémonos desde nós mesmos –únicos e irrepetíbeis–, saibamos quen somos, do que dispoñemos, o que queremos facer e fagámolo. As comparacións son necesarias nas competicións, mais se o que queremos é ser nós mesmos, non valen ren. Cando Galiza se acompaña cun cualificativo económico pexorativo lembramos que o século XX xa deixou a súa pegada e débese superar. O PIB per cápita galego actual é de 25.906 euros, Galiza é a sexta comunidade autónoma española por volume de Produto Interior Bruto Un primeiro paso común de medida cuantitativa en busca de obxectividade é o PIB per cápita, mais pódese acompañar doutros valores cuantitativos e tamén comparábeis: a esperanza de vida, o nível de aforro privado, o paro e emigración existente, rol da industria, papel das exportacións e das importacións, o investimento público e privado por períodos, a formación bruta de capital, débeda pública e solvencia, pobreza e desigualdade interior, acceso ao ensino superior, acceso á sanidade pública, índices de criminalidade, acceso e posesión de vivenda, número de automóbiles privativos, acceso e uso dos bens de cultura, festas comunitarias ao longo do ano organizadas de forma privada, gasto en turismo externo e interno... As cifras O PIB per cápita galego actual é de 25.906 euros, é a sexta comunidade autónoma española por volume de Produto Interior Bruto. Galiza, entre as rexións NUTS 2 europeas (nomenclatura común de unidades territoriais estatísticas), está discretamente situada entre as de renda media, que, sendo inferior á media europea, non é má situación, xa que a renda persoal media española non alcanza a media comunitaria, igual que a de 16 estados comunitarios que se sitúan na marxe inferior dese estatístico. A evolución do PIB galego e da media do PIB español A evolución do PIB galego nas dúas décadas do século XXI é moi semellante á media do español. En termos monetarios o PIB galego e o español seguiron sendas moi semellantes, medraron arredor do dobre, coa excepción de que a poboación galega é un pouco inferior que a principios de século, e a española aumentou. Non obstante, os tempos non son de crecemento linear en todas as economías: o mundo é algo máis que a Unión Europea ou que o límite da mirada española. A Unión Europea ao longo do século XXI foi perdendo postos na listaxe mundial que clasifica as grandes rexións polo tamaño do seu PIB. A Europa Comunitaria distánciase dos EEUU e da China. Na zona euro o PIB per cápita multiplicouse desde 2000 a hoxe por 1,67, e o dos EEUU por 1,99, observándose a mesma tendencia, de se distanciar, a cada paso. O PIB per cápita da zona euro era 88% do dos estadounidenses en 2000 e hoxe non pasa de 82%. O mesmo sucede se nos fixamos no poder do dólar e o do euro. Por esta primeira razón cuantitativa a forma correcta de mirar a economía galega achégase máis a unha economía media no seo da UE de renda media. Nen pobre, nen falta de industria, nen falta de recursos: pura e simplesmente unha economía cunha forma de se desenvolver no sistema capitalista presente peculiar/propria ou, por ben dicer, medra da maneira que a súa estrutura económica e a súa inserción na economía mundial llo permite e o mal gobernada que está non llo remedia.