Grave deficiencia do proxecto Altri: análise da humidade ambiental

Un proxecto tan extenso como o da celulosa de Palas de Rei, presentado de forma fragmentada (DOG 26/12/2023 e DOG 4/3/2024) que ocupa, no seu conxunto total, cerca de 8.600 páxinas en formato dixital, debería ser unha "luz-guía" no que se analizasen todas as incidencias que vai ter no territorio, sen omisións capciosas, con propostas nítidas e limpas. Pero, en realidade, non sucede iso. O caso é que estamos ante un proxecto incompleto, retorcido, planificado a retrincos e con omisións, que non sabemos moi ben se son voluntarias ou involuntarias, pero, a fin de contas, son omisións. Un claro exemplo de todo isto é o que sucede con algúns elementos do clima que deberían ser tratados de forma explícita (temperaturas en todas as súas variantes, precipitacións, dirección e velocidade de ventos, humidade atmosférica, presión atmosférica, insolación, etc.) dentro dunha análise contextual, con datos de todas as estacións meteorolóxicas da contorna. Ao ser unha industria altamente contaminante, que prevé funcionar de forma continua, durante as 24 horas, a zona de estudo debería abarcar un radio duns 25 quilómetros, cubrindo unha superficie duns 2.800 quilómetros cadrados e dentro da que, polo menos, existen datos dunhas 14 estacións meteorolóxicas de organismos oficiais (Aemet, Meteogalicia), empresas privadas (Fomensa Hispania, Unión Fenosa-Naturgy) e observadores particulares, pero nada de isto se tivo en conta. Non só era preciso analizar todos eses elementos do clima, senón tamén empregar series de datos o máis extensas posible, pero tampouco se fixo. Vapor de auga Calquera persoa que consulte o proxecto e teña un coñecemento básico das condicións climáticas da contorna onde se vai instalar a fábrica de celulosa botará de menos a falta dun estudo da humidade atmosférica. Non se ten en conta para nada, nin a humidade absoluta (cantidade de vapor de auga que hai na atmosfera, expresada en gramos), nin a humidade relativa (porcentaxe de vapor presente na atmosfera, a temperatura ambiente en relación co valor máximo admisible para a súa saturación expresado en porcentaxes), sendo este último o dato que se manexa de forma habitual. As emisións de vapor de auga previstas pola industria pasteira de Altri estímanse en 18 millóns de litros diarios A humidade relativa ten moita importancia desde o punto de vista ambiental, porque unha humidade alta favorece a propagación de fungos, a formación de mofos, a proliferación de enfermidades criptogámicas e crea un "ambiente pesado"; mentres que unha humidade baixa contribúe ao resecamento das plantas e causa efectos adversos nos seres vivos. Na contorna da celulosa de Palas de Rei o problema vai a ser o exceso de humidade, non só polas condicións reinantes na actualidade senón, sobre todo, pola enorme emisión de vapor de auga que vai producir a industria pasteira, estimada nuns 18 millóns de litros de auga vaporizados diariamente. Desde 1968, cando se empezou a acumular auga no encoro de Portodemouros, ao subir o nivel da capa de auga do encoro uns 70 metros (nivel base do encoro 180 metros, nivel alto da auga encorada 250 metros), esta nova situación repercutiu, de forma directa, en toda a rede fluvial situada por encima do mesmo e nos vales tributarios. A zona afectada pola formación de néboas nocturnas, causadas pola saturación atmosférica, aumentou de forma proporcional. Humidade insoportable A información que nos proporciona a estación meteorolóxica de Melide, localizada a 470 metros de altitude e a unha distancia de 4,5 km da localización prevista da celulosa, respecto da humidade relativa, é de grande importancia. Empregando tan só os datos diarios de humidade relativa máxima, media e mínima de 2023 podemos observar a súa evolución ao longo do ano, caracterizada por presentar uns valores moi elevados, fóra dos límites da confortabilidade climática. A media dos valores de humidade relativa máxima é superior a 96%, mentres que o valor medio da humidade relativa media diaria chega a 81%, un valor considerado como pouco confortable. Tendo en conta o número de días con valor de humidade relativa superior a 95% no ano 2023, foron 309 días os que acadaron ese valor, é dicir, case 85% dos días do ano. En conclusión, a zona onde se vai instalar a celulosa de Palas caracterízase por ser moi húmida (humidade relativa elevada), ao verse afectada polo encoro de Portodemouros, en activo desde 1968, pero as emisións de vapor da celulosa, vaporizando diariamente uns 18 millóns de litros de auga, agravarán moi seriamente as condicións de habitabilidade de toda a contorna.