As importacións de gas natural desde Rusia ao Estado español alcanzan niveis récord en maio
Caen as importacións procedentes dos Estados Unidos de América, que se dirixen agora cara Arxentina.
As importacións de gas natural ao Estado español procedente de Rusia disparáronse o pasado mes de maio a niveis récord, alcanzando os 9.663 xigavatios hora (GWh), erixíndose así no segundo principal subministrador no mes, moi perto de Arxelia.
En concreto, o gas natural procedente de Rusia, todo por barco metaneiro como gas natural licuado (GNL), case triplicou a súa cifra en maio con respecto ao mesmo mes do ano pasado, cando ascendeu a 3.289 GWh, segundo datos do último boletín de Enagás.
Desta maneira, en maio confírmase a tendencia á alza dos últimos meses nas compras de gas natural a Rusia, aínda que alcanza uns niveis máximos desde que a finais de febreiro de 2022 estalou a guerra en Ucraína.
Con esas importacións de 9.662 GWh en maio, o gas natural de orixe rusa cubriu 27,8% da demanda total no mes do Estado español, tan só por detrás de Arxelia, que con 9.824 GWh, volveu ser o principal subministrador, con 28,3% do total.
O gas natural ruso, sen veto
Ben é certo que en maio a tendencia á alza das importacións de gas natural de Rusia deuse en toda Europa. E é que o gas natural ruso non está incluído dentro dos vetos adoptados pola UE contra o Estado ruso.
No caso concreto do Estado español, a maioría do gas natural que chega de Rusia procede de contratos a longo prazo con Yamal LNG, un consorcio liderado pola empresa privada rusa Novatek e en cuxo accionariado hai capital europeo e doutros países.
Non obstante, desde hai meses a vicepresidenta terceira e ministra para a Transición Ecolóxica e o Reto Demográfico, Teresa Ribera, vén apelando ás enerxéticas españolas a que diversifiquen as fontes de subministro de GNL e prescindan do procedente de Rusia. Ribera chegou a trasladar esta suxestión nunha misiva remitida ás compañías enerxéticas e principais comercializadoras españolas de gas natural.
Afundimento do gas procedente dos EUA
Destacou tamén no mes o afundimento sufrido polo gas natural procedente dos Estados Unidos de América (EUA) –que o ano pasado chegou a protagonizar un ‘sorpasso’ histórico erixíndose no principal subministrador do Estado español no medio da crise provocada após a guerra en Ucraína, por diante de Arxelia–, que caeu até os 1.964 GWh, case 85% menos que os 13.083 GWh de maio do ano pasado.
Neste caso, gran parte do gas natural procedente dos EUA tomou dirección Arxentina, que incrementaron no mes de maio o aprovisionamento procedente dos Estados, impulsado polo inverno austral.
No acumulado do ano, Arxelia confírmase tamén como o principal subministrador de gas natural do Estado español, con 44.015 GWh; por diante dos EUA, con 36.055 GWh. Ambos os Estados suman 45% das importacións totais (25% e 20,4%, respectivamente).
Por detrás, Rusia, con 33.472 GWh (19% do total) e Nixeria, que alcanza nestes primeiros cinco meses do ano os 27.297 GWh (15,5%).