Madrid recadou 49% dos impostos totais do Estado malia representar 19,4% do PIB español

Madrid recadou 49% de todos os impostos do Estado malia representar 19,4% do Produto Interior Bruto (PIB) estatal. Neste sentido, o Informe anual de Recadación da Administración Estatal da Axencia Tributaria (AEAT) de 2021 indica que os tributos ingresados pola comunidade presidida por Isabel Díaz Ayuso nese exercicio suman 103.481 millóns de euros, destacando a porcentaxe achegada polo Imposto sobre a Renda das Persoas Físicas (IRPF), polo Imposto do Valor Engadido (IVE) e polo Imposto sobre Sociedades (IS). O economista Xosé Díaz, que fora presidente da Comisión de Economía e Facenda do Parlamento galego na V lexislatura, no recente traballo titulado Os resultados da liquidación do réxime común ou das “rexións” en 2021 e ao que tivo acceso Nós Diario, explica que “segundo o Informe da AEAT de 2021, en Madrid recádase, para simplificar, 42,4% de todos os impostos directos, 57,4% de todos os impostos indirectos, salientando 84,2% do conxunto dos Impostos Especiais −entre eles o consumo de alcol e bebidas derivadas, tabaco ou hidrocarburos- e 51,9% das taxas, prezos públicos e outros ingresos: en conxunto, 49% dos impostos e outros ingresos que forman parte do sistema fiscal español”. Os datos de 2021 gardan semellanzas cos de anteriores anualidades. De feito, repítense cos datos da AEAT de 2020, cando en Madrid se recadaron 42% de todos os impostos directos, 57% de todos os impostos indirectos e 51% das taxas, prezos públicos e outros ingresos: en conxunto 49% dos impostos e outros ingresos que forman parte do sistema fiscal español. As cifras de 2019 poñen de manifesto que Madrid ingresou en concepto de IRPF 43 % do total estatal. En concepto de Imposto de Sociedades, 39% do total estatal; en concepto de IVE 49 % do total estatal e en concepto de Impostos Especiais 84 % do total estatal. Neste escenario, a capital española recadou 49 % do total dos tributos do Estado. O 'efecto sede' A elevada recadación de Madrid explícase polo coñecido como "efecto sede", que provoca o emprazamento a efectos fiscais e sociais na capital española de miles de empresas que desenvolven a súa actividade económica real noutras áreas do Estado. Precisamente, esta dinámica xoga contra os intereses do resto de comunidades autónomas, lastrando o desenvolvemento e succionado por diversos mecanismos, non só o fiscal, unha parte importante da súa riqueza. O Laboratorio de Análise de Políticas Públicas do Instituto Valenciano de Investigacións Económicas (IVIE), nun traballo titulado Madrid, capitalidade, economía do coñecemento e competencia fiscal, sinala que o apoio público á capital do Estado “reforza a tendencia á diverxencia entre Madrid e boa parte das rexións españolas” e o efecto sede “inclina a actuación das autoridades centrais a favor das empresas localizadas neste territorio, ao realizar moitos máis contratos con elas en lugar de amosar a neutralidade territorial que sería esixíbel con todo o tecido empresarial”. Imposto de Sociedades O Imposto sobre Sociedades exemplifica de maneira precisa a lóxica do "efecto sede". Mentres Madrid, cuxo PIB para 2021 cifrou o Instituto Nacional de Estatística (INE) en 19,4% do total estatal, recadou nesa anualidade polo Imposto sobre Sociedades 10.390 millóns de euros, que significou 39% do conxunto do Estado. Mentres, os ingresos da Galiza por este tributo ficaron en 1.373 millóns de euros, 5,1% do total do estatal para un PIB de 5,24% do conxunto do Estado. Un total de 4.256 empresas con actividade económica na Galiza pagan os seus impostos fóra do país. Segundo as cifras ofrecidas polo Instituto Galego de Estatística (IGE) para 2021, última anualidade con datos, 3.551 compañías desenvolven o seu labor no sector dos servizos, 364 compañías na industria, incluíndo dentro destas as enerxéticas (295 compañías); 289 na construción, con particular presenza das enxeñarías e empresas de obra civil, e 46 compañías na área da agricultura e a pesca. As empresas galegas domiciliadas en Madrid adoitan ser aquelas cunha maior facturación e número de traballadores. Así, entre estas, atópase Alcoa, o complexo de produción de aluminio e alumina emprazado entre Cervo e Xove, na Mariña, cun cadro de persoal de máis de 1.500 traballadores directos e 500 indirectos, que segundo a Confederación de Empresarios de Lugo (CEL) representa 30% do PIB lugués. O caso Ence A pasteira Ence, co seu principal centro de traballo instalado nas proximidades da ría de Pontevedra, e con arredor de 400 empregados, paga en concepto de Imposto sobre Sociedades 6 millóns de euros en Madrid, malia non contar con ningún centro de traballo na capital do Estado, tributando na Galiza, onde posúe unha factoría de celulosa, 1 millón de euros. O caso de Alcoa na Mariña ou de Ence en Pontevedra non son ningunha excepción. Situacións análogas atópanse en boa parte das comarcas galegas, con factorías como Xeal en Cee e Dumbría, na Costa da Morte; como Celsa na Laracha (Bergantiños) ou como Navantia en Ferrolterra. Precisamente, todos estes centros de traballo destacan polo alto número de man de obra ocupada e polo seu importante peso no PIB das comarcas onde se emprazan. Máis da metade de todas as facturas con IVE do Estado páganse en Madrid Madrid ingresou en 2021 en concepto do Imposto sobre o Valor Engadido (IVE) 36.429 millóns de euros, unha contía que representou 51% do total recadado polo Estado español por ese tributo e 2,5 puntos máis que no exercicio fiscal de 2020. Mentres tanto, Galiza, cuxo PIB significou nesa anualidade 5,24% do conxunto estatal, só recadou por IVE 2.904 millóns de euros, isto é 4% do conxunto estatal. Nesta dirección, resulta significativo que máis da metade de todas as facturas con IVE xeradas en diversos puntos do Estado se paguen en Madrid. Por outra parte, o Imposto sobre a Renda das Persoas Físicas (IRPF) é un tributo persoal, progresivo e directo que grava a renda obtida nun ano natural das persoas físicas residentes no Estado. Así as cousas, a facenda española recadou por este concepto no ano 2021 un total de 94.545 millóns de euros, dos que 36.718 millóns de euros, 43,8% do total, se ingresaron en Madrid e 3.401 millóns de euros, 4% do total, na Galiza. A realidade é aínda máis destacada no suposto dos Impostos Especiais. Así, dentro destes incorpóranse, entre outros, os tributos aos hidrocarburos, á electricidade, ao tabaco, ao transporte ou a determinadas bebidas alcohólicas. Neste caso, Madrid recadou no ano 2021 un total de 16.606 millóns de euros, o que representou 84,1% do total estatal. Pola súa parte, Galiza ingresou 84,2 millóns de euros, unha porcentaxe próxima a 0,42% do conxunto do Estado, situado en 19.728 millóns de euros. O proceso de concentración do enderezo fiscal das grandes empresas en Madrid está asociado ao "efecto sede".