O marisqueo da ría de Arousa pide "un plan de acción" á Xunta

A Plataforma en Defensa da ría de Arousa (PDRA) reuniu esta quinta feira diante da delegación da Consellaría do Mar en Carril a representantes dos diferentes colectivos que a compoñen para entregar un escrito reclamando “accións” diante do “deterioro das actividades produtivas” do sector do marisqueo. As entidades reclaman ao conselleiro Alfonso Villares “que non deixe abandonada as rías galegas” e que aborde e “dea solucións aos seus problemas, porque entendemos que é a súa obriga competencial”. O presidente da PDRA, Xaquin Rubido, asegura a Nós Diario que a situación “é crítica” e por este motivo demandan que este departamento da Xunta da Galiza aborde e “dea solucións aos seus problemas, porque entendemos que é a súa obriga competencial”. Redución de persoal Entre os exemplos que apunta Rubido como máis evidentes para entender o que acontece está a redución de persoal nalgunhas confrarías que dependen en gran medida do marisqueo. “En concreto está a de Cabo de Cruz que ten concedida unha subvención mais non lla deron aínda por discrepar da liña do conselleiro do Mar”, asegura o responsábel da plataforma, “por este motivo tiveron que facer unha regulación de emprego que rematou con parte do persoal no desemprego”, engade. Como consecuencia do devalo económico desde a PDRA tamén teñen constancia dos problemas que están a ter, tamén no Barbanza, a confrarías da Pobra do Caramiñal e Rianxo; ademais da de Vilanova de Arousa, no Salnés. “Outras, como no caso da Illa, o persoal acordou rebaixarse o salario para evitar botar xente fóra aínda que manteñen unha situación problemática”, relata Xaquín Rubido, "e ningunha ten apoio abondo da Xunta como para resistir", agrega. Axudas escasas Outra evidencia para a PDRA do malestar no sector é a situación das mariscadoras que teñen que pagar todos os meses a Seguridade Social e non hai actividade marisqueira ou se a hai é escasa. Desde a plataforma botan en falta contar cun balance real de acceso do sector a estas achegas públicas. “As axudas que deron tiñan unha serie de condicionantes que provocaron que moitas tiveron que devolverse e outras non as recibiron”, asegura Rubido, “e as que as recibiron serviulles de pouco pois chegaban para pagar só dúas mensualidades da Seguridade Social”, confirma. Desde o colectivo de mariscadoras a pé de Carril, a súa presidenta, María Porto, sinala a Nós Diario que levan desde decembro sen traballar e a axuda da Xunta, “que non recibimos todas”, pagaron só dous meses de Seguridade Social. “Ademais, quince persoas que estaban traballando das setenta que somos tiveron dereito á prestación por cese de actividade”, explica. Con este panorama, o abandono da actividade é constante. “Eramos noventa e nove e marcharon vinte e nove por non poder aguantar esta situación”, pon en evidencia esta mariscadora. As mariscadoras teñen por diante o mes de maio no que probarán de voltar á ría aínda que saben, a través das mostras que se obtiveron recentemente, que non hai produto para comezar. "Moitas aseguran que pagaría a pena, aínda que dea para poder pagar o seguro e non ter que tirar doutros salarios da familia e non deixar de ser autosuficientes", afirma. Unha reunión coa Xunta “sen restricións” No mesmo escrito entregado esta quinta feira, as entidades solicitaron unha reunión urxente e “sen restricións dos asinantes” co conselleiro do Mar para coñecer unha vez constituído o novo Goberno galego “o plan real que teñen para o sector, porque se continuamos así a xente vai irse para casa e vai abandonar a actividade no mar”. En opinión de Xaquín Rubido, a Consellaría tivo durante estes anos "unha actitude pasiva ante os problemas e se non actúa canto antes a xente rematará por abandonar o mar para buscar traballo en terra”. Se iso acontece, o portavoz da PDRA alerta de que en pouco tempo poderían “caer os plans de explotación e despois as concesións das confrarías coa conseguinte situación que beneficiaría a entrada de capital privada coa súa privatización”. Coa petición de xuntanza, ademais, queren constatar se “hai cambios neste novo Goberno galego ou seguimos como no anterior, sen ningún tipo de diálogo co sector”. A PDRA demanda medidas estruturais e socioeconómicas O escrito que entregaron os colectivos esta quinta feira en Carril centra as demandas do sector en medidas estruturais “que garantan a calidade das augas do medio mariño” e tamén socioeconómicas, “até que se recupere a actividade”. Na primeiras exixen plans para rexenerar os bancos marisqueiros, o saneamento integral da ría e o control das verteduras a ríos e rías. Ademais requiren un cambio na normativa de augas “que obrigue á regulación e publicidade do protocolo dos desencoros”. Entre as segundas figuran a exención das cotas da Seguridade Social por parte do Estado español para todas as mariscadoras e mariscadores (con cargo aos fondos da Xunta) e axudas directas do Salario Mínimo Interprofesional (SMI) para este sector compatíbeis coa rexeneración dos bancos marisqueiros. No mesmo documento axudas directas a toda a cadea do sector do mexillón polas perdas dos exercicios 2022 e 2023 (incluídas á produción, cocedoiros, depuradoras e fábricas de conserva) e ás confrarías con actividade marisqueira para manter os postos de traballo. Por último lembran que hai sectores autónomos indirectamente afectados como o da comercialización de marisco entre lonxas.