Que fai caer a produción industrial na Galiza?

A evolución do Índice de Produción Industrial (IPI) da Galiza, o indicador conxuntural que mide a evolución mensual da actividade produtiva das ramas industriais, volve ao terreo negativo após a suba de 3,4% de febreiro. En concreto este mes de marzo rexistrou unha caída de 4,5% con respecto ao mesmo mes de 2023, segundo os datos publicados onte polo Instituto Galego de Estatística (IGE). No Estado español, pola contra, a caída foi aínda maior, chegando a 11,3%. Na Galiza, por destino económico dos bens, tiveron maior influencia neste resultado os bens de consumo, que presentaron un descenso de 0,8% e restan 0,2 puntos á taxa interanual. Os bens de equipo, pola súa parte, rexistran unha taxa de -26,9%, unha detracción de 8,7 puntos con respecto ao mesmo mes de 2023. No caso dos bens intermedios, tiveron unha diminución de 12,1%, cunha repercusión negativa de 2,8 puntos. O caso máis salientábel é o da fabricación de produtos informáticos, electrónicos e ópticos que retrocedeu 44,1% a nivel interanual. Por último, a enerxía crece 31,8%, unha suba que vén marcada polo aumento de 29,7% do fornecemento de enerxía eléctrica, gas, vapor e aire condicionado e engade 7,2 puntos á taxa de variación interanual do conxunto. A produción industrial galega cae 4,5% en marzo Máis enerxía e menos fabricación de vehículos Atendendo ás distintas ramas industriais, o descenso interanual en marzo débese principalmente á achega negativa (-13,6 puntos) de 18 delas. As principais foron a fabricación de vehículos de motor, que resta 6,1 puntos; a fabricación de produtos metálicos, cunha repercusión de -1,9 puntos; e a industria da alimentación, que resta 1,2 puntos a taxa interanual. No que respecta ás repercusións positivas (9,1 puntos) de oito ramas, as principais foron a produción de enerxía eléctrica, que achega 6 puntos, e a fabricación de bebidas, que suma 1,1 puntos á taxa interanual. Menor demanda O profesor da USC e Coordinador da Liña de Investigación en Economía do IGADI, Diego Sande, explica a Nós Diario que hai que considerar que estes datos “contan coas cantidades producidas e o seu valor engadido, polo que dalgunha maneira tamén miden a oferta e a demanda”. Aínda que recoñece que hai "moitas variábeis", entende que unha menor demanda inflúe na produción "e hai moita expectativa sobre como evolucionará a economía como para que haxa moita demanda". Na súa primeira valoración, considera que "aínda que moderados con relación ao Estado español, os datos son negativos". Porén, considera que é habitual "que as tendencias se trasladen máis tarde e de maneira máis suave". Alén da situación da fabricación de vehículos de motor, Sande salienta os datos negativos desagredados por actividade industrial da industria da madeira (-18,5%), a industria téxtil (-14,1%) ou da fabricación de mobles (-5,1%). A nivel xeral, Sande considera que a Galiza, en produción industrial, "segue por debaixo do que recomenda a Unión Europea" polo que "se reflicte unha perda peso a nivel industrial, algo que nos afasta do obxectivo desexábel da UE". Por este motivo, aconsella "reforzar os sectores negativos e os que estean relacionados con eles" a través de "políticas industriais que se enfoquen nas potencialidades galegas". Pon, como exemplo dalgunhas que considera "evidentes", todo o que ten que ver "coa economía verde, medioambiental, e a economía azul". A produción industrial cae na Galiza e medra no Estado Caída dos bens intermedios O economista da USC Fernando de la Torre, na avaliación dos datos para Nós Diario, tivo en conta a liña temporal que marcou a pandemia da Covid-19 e a guerra en Ucraína. Destaca o particular “mellor comportamento das ramas tradicionais, como a confección e a fabricación de bebidas” xunto co aumento da produción enerxética. Este último, para De la Torre, “é lóxico pola substitución de produtos enerxéticos rusos, unha situación que incentiva o aumento nas hidroeléctricas e nas eólicas”. Pola contra, este economista amosa a súa preocupación pola caída de bens intermedios “que seguen baixando desde hai dous anos” sobre todo aqueles “que son máis intensivos en coñecemento, como os que tratan equipos informáticos, cando deberían ser os sectores máis dinámicos en termos de introducir innovación e empregos de maior calidade no país”. O mal resultado na "fabricación de vehículos" non é un "tema menor". "Stellantis pesa moito dentro da economía galega, non só na comarca de Vigo, e ten moita capacidade para arrastrar outros sectores", asegura Fernando de la Torre. Neste sentido apunta que "se cae a demanda de bens intermedios feita polo sector do automóbil poden desenvolverse uns efectos multiplicadores moito máis relevantes que no caso doutras industrias". A UE acumula tres meses de caída consecutiva da produción industrial Stellantis en Vigo recibirá 29 millóns de euros do Estado O ministro de Industria e Turismo, Jordi Hereu, confirmou onte a aprobación de 15 novos proxectos estratéxicos para a recuperación e transformación económica (PERTE) do Vehículo Eléctrico e Conectado (VEC) por 76 millóns de euros, entre eles a planta de Stellantis Vigo, que obtivo 29 millóns de euros, cifra que podería "aumentar". Desde a factoría viguesa do grupo valoran as axudas, aínda que anuncian que presentarán alegacións para obter o "máximo apoio" aos seus proxectos. Todo isto coincidindo coa comunicación da multinacional dun novo paro na factoría viguesa onte pola tarde. Este cese únese ás incontábeis veces que a fábrica tivo que suspender os traballos por problemas similares. Decepción na Xunta Pola súa parte, a Xunta da Galiza mostrouse "moi decepcionada" tras coñecerse a resolución do PERTE. En declaracións remitidas aos medios, a conselleira de Economía e Industria, María Jesús Lourenzá, lembra que Stellantis Vigo solicitou 40 millóns de euros e concedéronselle "20 millóns", xa que o ministro Jordi Hereu anunciou 29 millóns, pero só 20 correspóndense con axudas directas, mentres que 9 millóns son de préstamos.