Protesta contras os recortes ás portas do Parlamento galego

Pola volta de 200 persoas concentráronse na tarde da quinta feira perante as portas do Parlamento galego, na xornada en que tiña lugar un pleno extraordinario onde o PP pretendía aprobar, facendo uso da súa maioría absoluta, a lei de adaptación en Galiza do decreto de recortes de Rajoy nas administracións públicas. As persoas concentradas defenderon o emprego e os servizos públicos, convocadas por diferentes organizacións sindicais e diante un cordón de seguridade de varios policías nacionais. 

No momento en que os lemas contra os recortes e medidas do goberno acadaban unha grande intensidade, a policía optou por pechar a enreixado de ferro que protexe a entrada ao Parlamento. Antes diso, parlamentares do BNG e do PSOE achegáronse até as persoas concentradas.

Os sindicatos sinalan que a degradación das condicións laborais dos e das empregadas públicas, así como o empobrecemento destes servizos van ser sofridos polo conxunto da cidadanía.