Aumenta o desemprego no sector servizos e increméntase a fenda de xénero

O número de persoas rexistradas como paradas nas oficinas dos servizos públicos de emprego subiu en agosto na Galiza en 280 persoas. Este dato sinala un 0,22% máis que xullo e situouse en 127.725. Con todo, a taxa interanual indica que son 14.187 menos, un descenso da contía total de 10%. Estes datos, facilitados onte polo Servizo Público de Emprego Estatal (SEPE), organismo dependente do Ministerio de Traballo e Economía Social, indican, ademais, que o sector servizos foi o máis afectado, con 517 persoas desempregadas máis, quedando na actualidade en 90.668 no paro. Ségueno as 89 menos no sector primario (4.018), 86 menos na industria (12.873), 56 menos na construción (8.744) e seis menos no colectivo sen emprego anterior (11.422). Atendendo ao sexo, na Galiza están no desemprego 51.517 homes (-215, un 0,4 % menos) e 76.208 mulleres (+495, un 0,7 % máis). No que ten que ver coa idade, agosto deixou 4.722 persoas menores de 25 anos inscritas no Servizo Público de Emprego (+168) e 123.003 de máis de 25 (+112). Non obstante, en termos porcentuais, o incremento na mocidade é superior que nas persoas maiores: 3,7 % fronte a 0,1 %. Por provinciais, só en Pontevedra baixa o paro (-98), fronte aos ascensos da Coruña (282), Lugo (73) e Ourense (23). A caída do emprego no sector servizos fai medrar o paro na Galiza após seis meses consecutivos de descensos Ademais, a contratación na Galiza descendeu, con 64.507 firmas de contratos, que son 11.399 menos que en xullo (-15,02%) e 7.276 menos que no anterior agosto (-10,14%). Foron 16.090 indefinidos -é dicir, 6.477 menos que en xullo (-28,7%) e 4.783 menos que en agosto de 2022 (-22,91%)- e 48.417 temporais -é dicir, 4.922 menos que en xullo (-9,23%) e 2.493 menos que no mesmo mes do exercicio anterior (-4,9%). No acumulado, son 483.683 contratos, 160.107 (33,1%) indefinidos e 323.576 temporais (66,9%). Por último, as persoas autónomas afiliadas en agosto descenderon en 483, pasando de 208.112 a 207.629. Sobre este último sector, desde a Asociación Galega de Traballadoras e Traballadores Autónomos e do Mar, demandan "pór en marcha medidas que traten de frear esta auténtica sangría". Dependencia do turismo En opinión do secretario confederal de Emprego da CIG, Francisco González Sío, os datos indican que a Galiza “ten unha dependencia moi grande do sector turístico” e, sobre todo, do "efecto Xacobeo" que se concentra no verán. Unha das evidencias deste feito, para este sindicalista, é “pola caída na afiliación á Seguridade Social que atinxe a provincia da Coruña, case a totalidade dela”. O desemprego baixa 1,2% na Galiza mais a CIG alerta: "A contratación indefinida descende" Outra circunstancia a ter en conta, para a central nacionalista, é que “a aplicación desta reforma laboral que ten que ver coa estrutura do emprego produce que a precariedade e a inestabilidade, pese a todo o que se di, sexa máis acentuada do que a sociedade pensa”. Neste sentido, salienta que “os contratos indefinidos caen pola facilidade que se ten coa reforma laboral e a utilización da mesma para despedir á xente indefinida dunha maneira máis sinxela, mesmo por non cumprir co período de proba ou ao derrogara s reformas laborais anteriores segue sendo fácil, polo que descenden o número de indefinidos”. Para a secretaria de emprego de CCOO, Maica Bouza, "temos que analizar se se está pervertendo a reforma laboral". Sinala a Nós Diario, que "ao mellor hai que pedirlle A Inspección de Traballo que faga un seguimento", demanda. Neste sentido constata un “freo na creación de emprego” que se rexistrara nos meses anteriores, “ligada á contratación estival, como xa sucedeu en anos precedentes”. Pola contra, o secretario de organización de UXT na Galiza, José Luís Fernández Celis, entende que “a estabilidade vai camiño de ser a norma no noso mercado laboral”. Este sindicalista pon en valor o aumento do desemprego de agosto e o retroceso da afiliación á Seguridade Social que “a nivel mensual supón o dato máis baixo desde agosto de 1996”. Galiza perdeu 83.000 empregos xuvenís entre o ano 2009 e 2023 Para a UXT, tras vinte meses desde a entrada en vigor da última reforma laboral, "xa é posíbel observar unha certa tendencia clara á estabilización do mercado de traballo" que explicaría que "os picos de contratación que se producían nos meses de verán están a moderarse con motivo do impulso dado á contratación indefinida". Fenda de xénero Desde a CIG denuncian que as mulleres, segundo os datos do SEPE, seguen a asumir “a totalidade da caída do desemprego" polo que afianza a idea de que "ten que ver co sector servizos e a precariedade as que sofren a caída do turismo”. Bouza, pola súa parte, emprega o termo "indignación" ao analizar unha situación que sitúa un panorama no que “seis de cada dez persoas paradas seguen sendo mulleres”. Neste sentido, afirma que "levamos un ano de bo comportamento do emprego, mais a situación das mulleres é peor que a dos homes" aínda que "non todos os meses son iguais". O nivel de afiliación á Seguridade Social creceu 27,4% máis no Estado que na Galiza Por este motivo demanda "parar e ver cal é a situación das mulleres no sistema laboral e que sectores, con que contratos e que xornadas teñen". Considera preciso analizar "se se cumpren os plans de igualdade nas empresas" ou se en realidade "só se limitan a cumprir o expediente que marca a lei". "O futuro", di, "en termos de emprego, é feminino" ao ter en conta que os sectores por desenvolver no mercado laboral "están nos servizos na súa gran maioría" polo que "hai que dar unha resposta".