A construción galega descendeu 38% o valor económico das obras no primeiro cuadrimestre de 2024

O sector da construción na Galiza non está a ter bos resultados este 2024. O seu volume de obras descende 6,4% con respecto ao primeiro cuadrimestre do ano pasado -de xaneiro até abril- e alcanza as 1.460 obras por valor de 1.290 millóns de euros. Este último dato revela un descenso de 38,5% con respecto ao mesmo período de 2023 cando foron 2.100 millóns de euros. Son as cifras que revelou esta cuarta feira o estudo Análise e evolución do sector da construción, realizado pola firma tecnolóxica de solucións analíticas DoubleTrade. No conxunto do Estado español, pola contra, os datos son positivos. Indican, neste mesmo informe, que nese período en concreto o volume de obras executadas aumenta 13% e dispara 39% o orzamento destinado en comparación cos mesmos meses de 2023. Pola mesma, durante este primeiro cuadrimestre realizáronse un total de 20.843 obras cun importe de 43.694 millóns de euros. Os territorios do Estado que lideran este tipo de investimentos son Catalunya (con 4.060 obras por valor de 3.870 millóns de euros), Andalucía (con 2.750 obras por 7.330 millóns de euros) e o País Valencià (con 2.406 obras valoradas en 2.924 millóns de euros). No lado contrario, entre as zonas que menos obras e investimento teñen nese cuadrimestre están as de Ceuta e Melilla, con 61 obras valoradas en 59 millóns de euros entre ambas as dúas. A construción hoteleira aumenta en 40% Menos obras e valor investido en toda a Galiza Para realizar este estudo, a firma tecnolóxica tivo en conta a suma do conxunto das obras públicas e privadas que foron iniciadas e publicadas durante eses meses de comezo de ano. Por ámbito provincial, A Coruña estaría en cabeza con 750 obras por 500 millóns de euros. Séguea Pontevedra, con 340 construcións (300 millóns de euros); Ourense, con 200 (380 millóns de euros) e Lugo, con 170 obras (110 millóns de euros). Todas elas baixan con relación a 2023, con 760 obras na Coruña (720 millóns de euros); 140 en Lugo (310 millóns de euros); 160 obras en Ourense (420 millóns de euros); e 500 obras en Pontevedra (650 millóns). Analizando en detalle as obras executadas a nivel estatal, neste caso sen datos desagregados para a Galiza, o cociente de investimento durante o primeiro cuadrimestre de 2024 aumenta en 1,7 millóns de euros até unha media de 2,1 millóns de euros; sendo as vías férreas, a industria e as estradas as áreas máis destacadas. A vivenda experimentou un crecemento no cociente de investimento que xa viña destacando desde 2023, pasando de 1,2 millóns de euros a 1,5 millóns de euros. A vivenda máis cara Para o secretario da Asociación Galega de Inmobiliarias (Agalin), Vicente Martínez, é “evidente” que na Galiza hai moi pouca obra en construción. Explica a Nós Diario que é unha situación que se dá “sobre todo cando falamos de obra nova e se esta está dedicada á vivenda”. Isto inflúe, ao final nos prezos, “facendo que aumenten de maneira considerábel con respecto a anos atrás”. Neste sentido, os últimos datos publicados no Índice de Prezos de Vivenda (IPV) do Instituto Nacional de Estatística confirman esta valoración. Os mesmos sinalan que o prezo da vivenda libre aumentou 5,1% no primeiro trimestre, en comparación co mesmo período de 2023. Con este dato, na Galiza a vivenda acumula un incremento de custo de 2,9% no que vai de ano. En concreto, a vivenda nova subiu de prezo 8,1% nos últimos 12 meses e 7,2% até marzo. Por outra parte, a vivenda de segunda man custa 4,7% máis que hai un ano e 2,3% máis que en decembro de 2023. As licenzas para a construción de edificios baixan 4% no comezo de ano, aínda que crecen as rehabilitacións "A falta de construción de obra nova provoca que a xente busque máis a obra usada", asegura o secretario de Agalin, "mais agora o aumento de prezos tamén está afectando tamén á vivenda que xa estivo habitada", agrega en declaracións a Nós Diario. Entre as medidas que Agalin pon enriba da mesa está a de facilitar a creación de novas vivendas. "Debería de haber máis promocións residenciais, sobre todo nas cidades", afirma Vicente Martínez. Pola contra, a realidade é moi diferente. "Son moitas as dificultades, a primeira é o tempo que tardan en conceder as licenzas e a segunda a falta de chan que impide realizar máis proxectos aos promotores", asegura o secretario de Agalin. A isto engade o incremento de custos que ten o propio solo e os materiais indispensábeis como o ferro e o cemento. "Non esquezamos tampouco os problemas que teñen as propias construtoras para acceder ao financiamento dos bancos, unha tarefa difícil, para conseguir realizar os seus proxectos", apunta. No panorama actual, pola súa experiencia, nas cidades está difícil. "Quen quere acceder a mercar en Santiago, na Coruña ou en Vigo te que desembolsar máis de 300.000 euros nunha vivenda nova ou acceder a unha de segunda man", conclúe. A construción galega posúe a segunda maior sinistralidade do Estado español Xunta, concellos e universidades reducen a súa obra pública Alén da obra privada, o sector da construción ten como un dos seus puntos fortes na obra pública. Os últimos datos facilitados pola Federación Galega da Construción (Fegacons), referentes a 2023, deixan en evidencia, neste ámbito, as diferenzas entre as tintas administracións e organismos. No informe presentado en 2024 indican que a licitación de obra pública aumentou de maneira leve (2,75%) con respecto a 2022, pasando de 1.595 millóns de euros a 1.639 millóns euros. O importe maior de licitación correspondeu ao Estado español con 661 millóns de euros (+20,85%) seguido da Xunta da Galiza con 487 millóns euros, aínda que esta rebaixou en -2,81% o importe en relación a 2022, que foi de 501 millóns de euros. O ámbito municipal tamén ten unha participación importante na licitación de obra que lle chega ao sector da construción. Así, os concellos contaron cun importe de 373 millóns de euros, aínda que nunha porcentaxe menor de -14,43% con respecto a 2022 (que era de 436 millóns de euros). Séguenlle as Deputacións, con licitacións de obra pública por valor de 77 millóns de euros (+15,74%) e, por último as Universidades e outros que dedicaron en 2023 un total de 38 millóns de euros (-8,54%).