Votar e prevaricar?

Tras o Consello da Xunta, o presidente do Goberno galego, Alfonso Rueda, comentaba que se as eleccións europeas eran un plebiscito sobre Altri, aí temos o resultado, en alusión aos bos resultados do Partido Popular na comarca da Ulloa. O presidente tamén incidiu na necesidade de que, se é "viable", o proxecto da macrocelulosa de Altri conte co compromiso do Goberno de España para a financiación. Nun momento no que tanta tinta esta a correr coa suposta carta de apoio de Begoña Gómez, cónxuxe do presidente Pedro Sánchez, a unha iniciativa privada, non deixa de sorprender toda esa vehemencia do presidente Rueda pedindo compromiso para darlle 250 millóns de euros de diñeiro público a Altri, máxime cando nin o estudo de impacto ambiental foi publicado. A indefinición do que sería viable ou non, cando os promotores do proxecto consideran imprescindible esa cantidade de axuda pública daría para unha tese. En ningunha papeleta constaba que se estivese votando a implantación de Altri e o Partido Popular coidouse de mencionar o proxecto de Altri publicamente cando pedía o voto para as europeas, malia a que agora pretenda que os 969 votos que recibiu en Palas de Rei, de 3.346 habitantes (INE 2023), os 574 de Antas de Ulla, de 1.887 habitantes, os 780 de Monterroso, de 3.593 habitantes, e os 1.739 de Melide, de 7.553 habitantes, sexan o seu gran aval para xustificar o apoio ao proxecto. Este 21 de xuño a Casa da Cultura de Melide acollerá unha charla que ten por título "Riscos para a saúde da macrocelulosa de Altri" e que contará coa participación da neurocientífica no Texas Medical Center de Huston, Sonia Villapol; coa médica de familia María Garrido e co pneumólogo Evaristo Lombardero. Que pode levar á algunha veciñanza destes concellos a apoiar un proxecto sobre o que os médicos lles están claramente advertindo que vai aumentar as enfermidades respiratorias en xeral, os casos de asma entre as nenas e nenos, entre outras enfermidades, é algo inaudito. Debería ser a administración pública garante da saúde da súa poboación ou valedora dos intereses dunha empresa privada? Segundo o conselleiro delegado da multinacional portuguesa, José Soares de Pina, as emisións anuais á atmosfera de dióxido de carbono serán dunhas 60.000 toneladas –o equivalente ás emisións de 21.500 coches de gasolina– mentres que outros expertos alertan de que as emisións superarán as 100.000 toneladas anuais. O biólogo Ramón Varela denunciou que Altri só detallou no proxecto as emisións de catro elementos contaminantes (partículas grandes PM10, óxidos de xofre, óxidos de nitróxeno e compostos volátiles reducidos de xofre), obviando as partículas finas PM 2,5, o dióxido de carbono e o monóxido de carbono, advertindo que a planta de Altri se vai converter na "fábrica de celulosa máis contaminante de España". Máis pirófitas Altri instalarase no límite dun espazo da Rede Natura xunto ao río Ulla, do que prevé extraer 46 millóns de litros diarios de auga e devolver logo 30 millóns de litros, a unha temperatura de 27 graos, sobrantes do proceso industrial. Outro dos aspectos que non se recolle no proxecto é o efecto que terá ese vertido de residuos químicos sobre a contaminación orgánica que xa hai no encoro de Portodemouros, e logo o seu impacto no río Ulla e na ría de Arousa. Altri consumirá cada ano, segundo a súa solicitude de licencia ambiental, 1,2 millóns de toneladas de eucaliptos, o que incidirá claramente nunha superficie maior de eucalipto e na virulencia dos incendios forestais vinculados á expansión desta especie pirófita. O Plan Forestal de Galicia aprobado nos anos 90 prevía para o ano 2030 un máximo de 245.000 hectáreas. Estamos en arredor de 450.000 hectáreas de eucaliptais e séguese promovendo o seu incremento. A mesma semana na que sae a noticia do peche por parte da Consellería do Medio Rural dos invernadoiros de amorodo, pitahaia e phisalis da empresa Tropic Gaia en Xove (Lugo) pola presenza de arsénico, cadmio, mercurio, chumbo e aluminio debido á contaminación de Alcoa, o presidente Rueda asegura que a Xunta autorizará a fábrica de Altri se cumpre cos requisitos legais. O planta de Alcoa conta con todos os permisos legais pero a día de hoxe ninguén discute a presencia deses contaminantes perigosos no po en suspensión que afecta á veciñanza e aos cultivos que hai arredor da factoría. Debería ser a administración pública garante da saúde da súa poboación ou valedora dos intereses dunha empresa privada? Tería a Xustiza que investigar este tipo de apoios explícitos a proxectos privados, máxime cando pode haber conflitos de intereses como a participación de Greenalia, coa ex conselleira de Medio Ambiente e compañeira do presidente Rueda no consello de administración desta empresa? En todo caso, o domingo ningunha papeleta preguntaba sobre un hipotético si ou non á megacelulosa de Altri, e o Partido Popular recibiu 486.386 votos de 2.699.424 habitantes que hai en Galicia.