Bombeiros de Santiago denuncian a "xestión ineficaz" no operativo de emerxencia do accidente de Angrois
Critican o "funcionamento en xeral dos servizos de emerxencia" e a súa "xestión privada". Embora recoñecen "a labor realizada" pol@s profesionais despregad@s no accidente ferroviario, denuncian a falta de coordinación durante o operativo de rescate que atribúen a unha Axencia galega de emerxencias "ineficaz" asentada "en intereses privados"
Aseguran que "os únicos xefes lexítimos" que recoñecen son "os cidadáns" e que en virtude do seu dereito "a estaren informados" queren partillar coa poboación as súas "reflexións" a respeito do acontecido no plan de emerxencia desenvolvido o pasado 24 de xullo.
A través dun extenso informe elaborado a partir do operativo de rescate despregado no accidente ferroviario de Angrois, os bombeiros do Concello de Santiago denuncian a falta de coordinación entre as equipas que participaron do plan de emerxencia. Os representantes sindicais deste servizo na capital galega, critican con dureza que a resposta ineficaz e os erros cometidos se deben a un sistema de emerxencia cuxa finalidade non é a "dun servizo público" nin "de calidade".
Critican con dureza que a finalidade do sistema de emerxencia non é a "dun servizo público" nin "de calidade"
Asemade, denuncian "a falta de capacidade" dos Gobernos español e galego para "xestionar con eficacia" un operativo de rescate como o despregado no accidente ferroviario de Angrois.
Os bombeiros defenden "a xestión pública" e a "profesionalización" do servizo
"A nosa crítica" afirman con rotundidade desde o corpo de bombeiros da capital da Galiza "refírese ao sistema, ao funcionamento xeral de emerxencia e, concretamente, aos Servizos contraincendios e de salvamento". Aclaran no documento feito público esta segunda feira, o seu recoñecemento á "labor realizada no sinistro" pol@s profesionais que tomaron parte do operativo mais denuncian a "Axencia galega de emerxencia" pola súa ineficacia na resposta e pola "falta de coordinación" das distintas equipas.
Denuncian que a Axencia galega de emerxencias é "ineficaz" e demandan a creación dunha nova máis "profesional e operativa"
Para os Bombeiros de Compostela no noso país "non pode existir un plan real de coordinación" dos servizos de emerxencia "cando existen tantos e tan variados grupos de actuación" (bombeiros funcionarios, bombeiros privados, bombeiros laborais, Grumires...) e aseguran que a diversidade no acceso á información e á formación destas equipas impiden "traballar ao unísono" @s profesionais. Aliás, aseguran que a "xestión privada dun servizo que debe ser a todas luces público" limita a súa capacidade de actuación.
Así pois, exixen á Xunta de Galiza a "profesionalización" dos servizos de emerxencia e salvamento e a priorización da súa "xestión pública" de acordo coa Lei de emerxencias de Galiza na que, asemade, se contempla a creación dun Estatuto profesional para o sector. Asemade, instan á creación dunha "carreira profesional" que garanta "a formación" d@s traballadoras e traballadores.
Defenden "a profesionalización" do servizo e a súa "xestión pública" fronte aos recortes en persoal e medios que padecen
Aliás, exixen ao Goberno galego a creación dunha Axencia galega e emerxencias "profesional e operativa" que conte con "persoal cualificado" e "medios" dabondos.
Sen reposición das xubilacións desde 2006
No informe elaborado polos Bombeiros de Santiago denuncian os recortes sofridos polo sector desde o estourido da crise. Así as cousas, salientan a que amais do "abandono xeral" na Galiza, "resulta sangrante" --din-- "a situación de deixadez que vén experimentando o Servizo de extinción de incendios e salvamento de Santiago".
Neste senso, lembran que ademais do Parque de Bombeiros prometido e que actualmente se atopa en desuso, o plantel de traballadoras-es "vai mermando" ao tempo que os "medios materiais" cos que contan fica "lonxe de estar á altura do que corresponde" á capital do país. Asemade, denuncian que desde 2006 "non se repoñen as xubilacións" contando o servizo con 57 efectivos dos cales, só 9 bombeiros compuñan o servizo mínimo cando o Alvia Madrid-Ferrol descarrilou á altura de Angrois.