Abinader, reelixido como presidente na primeira volta na República Dominicana

Luis Abinader, do Partido Revolucionario Moderno (PRM), fíxose cun segundo mandato como presidente da República Dominicana, confirmou na madrugada da segunda feira o reconto.

Abinader non precisou dunha segunda volta ao imporse nas eleccións xerais do domingo con case 60% dos sufraxios e máis de 30 puntos en relación ao segundo clasificado, o ex presidente Leonel Fernández, da Forza do Pobo (FP).

Aínda que en teoría o PRM e a FP se consideran formacións progresistas, as tres candidaturas principais nestes comicios, engadindo a do Partido da Liberación Dominicana (PLD), ostentaban unha oferta conservadora moi similar, conclúe o antropólogo social dominicano Bernardo Matías, tras unha campaña centrada na crise na veciña Haití.

En todo caso, a FP e o PLD denunciaron unha “compra masiva” de sufraxios por parte do PRM, e o primeiro partido informou de que presentou unha denuncia na Xunta Central Electoral, que retrucou sinalando que non recibiu reportes ao respecto desas irregularidades durante o proceso.