A Assembleia avala o novo Goberno conservador en Portugal coa abstención do Partido Socialista
O novo Executivo portugués, liderado polo primeiro ministro Luís Montenegro, do conservador Partido Social Democrata (PSD), asumiu a sexta feira todas as funcións que a lexislación lusa prevé para o Gabinete logo de recibir o seu programa de Goberno o aval da Assembleia da República, na que tanto o PSD como o tamén conservador CDS-Partido Popular -cunha presenza minoritaria no Gabinete- terán que buscar a aprobación das súas propostas cunha minoría dos asentos, 80 de 230.
O Partido Socialista (PS), que perdeu o poder tras os comicios de marzo, permitiu a viabilidade do Goberno ao absterse nas dúas mocións de rexeitamento votadas, a presentada polo Bloco de Esquerda (BE) e polo Partido Comunista (PCP).
13 votos a favor
Ambas as dúas propostas recibiron apenas 13 votos a favor, os de BE, PCP e Livre, mentres que a deputada do Pessoas-Animais-Natureza abstívose na do BE e votou en contra na do PCP. PSD, CDS e a extrema dereita do Chega, que suman maioría absoluta, rexeitaron as dúas.
Tanto o BE como o PCP criticaron a abstención do PS. A primeira forza cuestionou que insista en que “non axuda” o Goberno a pesar da abstención, e o PCP asegurou que as votacións das mocións de rexeitamento “deixan claro quen se opón” e “quen apoia” a dereita.
Así e todo, no debate o PSD acusou o PS de "hipocrisía" e a forza progresista ratificou que será “oposición de alternativa”.
Un Goberno minoritario
Os medios lusos coinciden na dificultade de que o Executivo, sen control do Parlamento, esgote o seu mandato, que como mínimo se estenderá até finais de ano, cando afronte a primeira votación chave no lexislativo, a dos orzamentos.