24 persoas perderon a vida nas inundacións este mes en Europa Central, que causaron danos xeneralizados en Romanía, Polonia, Chequia, Austria, Hungría, Eslovaquia e Alemaña. Esas chuvias torrenciais foron entre 7% e 20% máis intensas froito do cambio climático, converténdoas nas precipitacións “de lonxe” máis potentes rexistradas nesa área, sinala un estudo que transcendeu a cuarta feira de World Weather Attribution.
O texto subliña que o quecemento global, producido principalmente polo uso de combustíbeis fósiles, duplicou a probabilidade desas chuvias, que arrasaron pontes e anegaron múltiples localidades, provocando tamén cortes eléctricos masivos.
A investigación constatou que de aumentar aínda máis a temperatura en relación á era preindustrial as precipitacións serán máis fortes e, “en case todo o mundo ocorre que un pequeno aumento nas precipitacións conduce a un aumento de orde similar de magnitude nas inundacións”, afirmou a coautora do estudo e científica do Instituto Grantham de Londres, Frederike Otto.
