Castigos colectivos en Palestina

O Goberno da ocupación israelí practica de maneira sistemática diferentes formas de castigo colectivo contra a poboación palestina como estratexia de intimidación e deshumanización. Demoler ou facer explotar vivendas, revogar a cidadanía ou permisos de residencia, impoñer multas, restrinxir o movemento, levar a cabo operacións militares ou arrestar de maneira arbitraria son algunhas das medidas punitivas empregadas polo Estado israelí para castigar familiares e veciñanza de palestinos acusados de estar implicados en ataques contra civís israelís e as forzas de seguridade. O Estado de Israel fai pagar a familias e comunidades enteiras os actos de resistencia armada supostamente perpetrados por parte dun individuo ou dun grupo. Segundo a Convención da Haia de 1907 e o Cuarto Convenio de Xenebra (1949), a imposición de sancións colectivas considérase un crime de guerra. Demolicións de casas No primeiro semestre de 2023, o exército israelí demoleu ou fixo explotar un total de oito casas propiedade das familias de prisioneiros palestinos inculpados de "ataques terroristas", en ocasións sen teren sido sometidos a ningún tipo de xuízo. As dúas últimas demolicións tiveron lugar no mes de xuño. Tras unha violenta incursión militar na cidade vella de Ramallah, na madrugada do 8 de xuño o exército da ocupación fixo explotar a casa familiar de Islam Faroukh (26 anos). Arrestado o 27 de decembro de 2022, foi acusado de ser o responsable de detonar dous artefactos explosivos en dúas paradas de autobús en Xerusalén o 23 de novembro, o que provocou ducias de feridos e a morte de dous colonos israelís. Farroukh, actualmente en prisión, está aínda á espera de xuízo. O 15 de xuño, no barrio nablusí de Rafidia produciuse unha importante redada militar que rematou coa demolición da casa de Usama Tawil (22 anos), detido o 13 de febreiro e acusado de matar un soldado na cidade de Nablus. Na casa vivían os seus pais e unha irmá. Desde 1967 a ocupación sionista destruíu máis de 2.000 casas palestinas como forma de castigo á comunidade Esta táctica comezou a ser practicada en 1967, cando Israel ocupou Xerusalén Leste, Cisxordania e Gaza. Desde entón, a ocupación sionista destruíu máis de 2.000 casas palestinas como forma de castigo colectivo. Só na Segunda Intifada, entre outubro de 2001 e finais de xaneiro de 2005, 664 casas palestinas foron demolidas, deixando sen fogar 4.182 persoas. Desde o ano 2009 este tipo de castigo repítese de maneira periódica. Revogación da cidadanía O 15 de febreiro deste ano a Knésset (Parlamento israelí) aprobou unha nova lei que permitirá anular a nacionalidade de calquera cidadán palestino de Israel tras ser condenado ou acusado por un "acto de terrorismo", xunto cos seus cómplices. A lei tamén contempla poder desposuír do seu permiso de residencia permanente os palestinos de Xerusalén Leste involucrados na resistencia propalestina armada. Aquelas persoas cuxa cidadanía ou residencia permanente sexa revogada serán deportadas aos territorios de Cisxordania ao final da súa pena de prisión. Este tipo de medida xa se viña practicando para castigar os actos que constitúen "unha violación da lealdade ao Estado de Israel", estendendo a punición ás familias dos acusados. O 22 de setembro de 2022, a Corte Militar de Apelacións de Israel confirmou unha orde para revogar a residencia en Xerusalén Leste de 17 membros da familia Qunbar, un exemplo claro de castigo colectivo en resposta ao presunto ataque con coche de Fadi Qunbar contra soldados israelís en xullo de 2017. A día de hoxe os 17 residentes de Xerusalén Leste corren o risco de seren deportados en calquera momento. A política de castigos colectivos aplicada polo Estado de Israel contra o pobo palestino está inspirada en tácticas do Mandato Británico. Co fin de disuadir todo posible acto de resistencia durante a Revolta Árabe en Palestina (1936-1939), o exército británico desenvolveu medidas punitivas colectivas como a demolición de vivendas ou os arrestos arbitrarios baixo detención administrativa (sen xuízo e sen condena). Seguindo a mesma liña colonialista, o Goberno de Israel castiga os cidadáns palestinos que se sublevan contra un sistema de apartheid que viola, a diario, os dereitos e liberdades fundamentais de palestinos e palestinas, limitando e controlando todos os aspectos da súa vida. Israel, impunemente, comete crimes de guerra contra os membros da resistencia, as súas familias e o resto da sociedade palestina. O último castigo colectivo é a operación militar a grande escala no campo de refuxiados de Xenín, lanzada polo exército sionista na noite do domingo 2 de xullo, que xa cobrou a vida de 10 palestinos ademais de provocar centos de feridos. Coa escusa de disolver as milicias da resistencia, as forzas israelís dinamitaron casas, destruíron estradas, dispararon contra ambulancias, atacaron hospitais e expulsaron a familias dos seus fogares. Palestina vive o maior ataque militar desde a Segunda Intifada.