[VÍDEO] Intento de magnicidio na Arxentina: detido un home que apuntou cunha arma á cabeza de Cristina Fernández de Kirchner
A Policía arxentina detivo nas últimas horas un home de 35 anos que apuntou cunha arma —e intentou disparala— á vicepresidenta do país, Cristina Fernández de Kirchner, segundo informa o Goberno e recollen diferentes medios de comunicación.
Nunhas imaxes gravadas pola Televisión Pública pódese observar como esta persoa puxo unha pistola a escasos centímetros da cabeza de Fernández de Kirchner, cando esta se dirixía de regreso ao seu domicilio.
En declaracións a esta mesma canle, o ministro de Seguridade, Aníbal Fernández, explicou que a xente que acode á entrada do domicilio a saudar non pasa "ningún" control de seguridade: "A vicepresidenta sempre se manifestou como a ven, nunca se relaciona desa maneira". Porén, tras este precedente instou a "analizar con ela a situación" e determinar "os pasos a seguir".
Aliás, Fernández apuntou á "incitación á violencia" por parte da dereita política: "Hai unha dereita violenta que incita a determinadas accións que son as que poden terminar xerando este tipo de situacións", apuntou.
"Agora os deputados e senadores da oposición saen a solidarizarse con esta situación, pero conseguiron, son os responsables de ter xerado un clima de odio e de afondamento do crack", engadiu o avogado José Manuel Ubeira.
No momento do suceso, as forzas de seguridade "apartan [o home] e atopan a arma", dixo Aníbal Fernández. "Agora ten que ser analizada esta cuestión pola nosa xente para ver a intención que tiña esta persoa", precisou.
"É o máis grave que sucedeu no país desde o regreso da democracia", dixo o presidente, Alberto Fernández
A pistola do sospeitoso dun intento de magnicidio estaba cargada con cinco balas de calibre 380, se ben por algún motivo que aínda non se concretou non disparou cando o home premeu o gatillo.
Pola súa parte, o presidente arxentino, Alberto Fernández, cualificouno como "o feito máis grave que sucedeu" desde o regreso da democracia ao país. "Este atentado merece a máis enérxica condena de todos os sectores políticos, de todos os homes e mulleres que integran a república", afirmou.