EH Bildu perfílase como gañador por primeira vez das eleccións en Euskadi

A 24 horas de que 1.795.206 vascas e vascos decidan co seu sufraxio a composición do novo Parlamento territorial, EH Bildu aparece como probábel vencedor por primeira vez dos comicios en Euskadi, e superaría cando menos en escanos segundo as últimas enquisas publicadas o Partido Nacionalista Vasco (PNV), que se impuxera até o de agora en votos en todas as eleccións deste tipo. Malia que no comezo da campaña electoral as sondaxes indicaban un empate técnico entre abertzales e jeltzales, a medida que pasaron os días as enquisas foron consolidando EH Bildu como primeira forza a medida que diminuían as opcións das coalicións encabezadas por Sumar e Podemos de obter representación, mentres que a ultraespañolista Vox ficaría moi probabelmente fóra do lexislativo. Á vez, PSOE e Partido Popular (PP) ficarían cun resultado case idéntico ao de hai catro anos, con 10 e 6 asentos respectivamente -os conservadores presentáranse daquela de forma conxunta con Ciudadanos-, nunhas votacións nas que o PNV se fixo con 31 representantes, EH Bildu con 21, a alianza liderada por Podemos con 6 e Vox con 1. Máis alá das enquisas, cuxo prazo legal de publicación se extinguiu a pasada segunda feira, tamén está pendente de comprobar a distribución de voto do arredor de 20% do electorado, que estaba indeciso nese momento, a raíz da última semana de campaña, que rachou coa tranquilidade coa que se desenvolvera desde o seu inicio o 5 de abril. Imanol Pradales (PNV): "Ninguén sabe o resultado, mais estou convencido de que recuperaremos a confianza da cidadanía" Nesta semana, Imanol Pradales, candidato do PNV en substitución do presidente Iñigo Urkullu, que leva gobernando desde 2012, foi atacado con gas pementa pouco antes dun debate na canle pública vasca, EITB, nun incidente sen aparente motivación política. Aparición de ETA no debate Amais do efecto dos debates que decorreron esta semana, un dos elementos principais que marcou as derradeiras xornadas de campaña foi a discusión arredor de ETA impulsada polo resto das candidaturas após definila Pello Otxandiano, candidato de EH Bildu, como un “grupo armado” que “afortunadamente” xa “non existe”. Otxandiano, quen rematou desculpándose se coas súas palabras puido “ferir a sensibilidade das vítimas”, fixo fincapé en que participou en reunións con “vítimas de todo tipo”, defendendo “tender pontes e non cavar trincheiras” e laiándose de que sempre “apareza ETA” durante os procesos electorais. Nese sentido, apuntou directamente ao PSOE asegurando que é “bastante estraño” que se aprestara a participar neste debate cando é precisamente o marco que usa a extrema dereita para intentar “tombar o Goberno de Pedro Sánchez [PSOE]”, o presidente español, e “obstaculizar calquera avance político e social”, detallando que é “un tema o suficientemente sensíbel como para deixalo fóra do contexto electoral”, lembrando que ETA non existe hai máis de 12 anos, en alusión ao fin das súas accións armadas. Pello Otxandiano (Bildu): "A próxima parada é un status político que nos recoñeza como nación" Agás Podemos, o resto de forzas con representación en Euskadi contestaron rapidamente que era un grupo “terrorista” e Pradales reiterou que Euskadi merece un lehendakari que “condene todo tipo de violencia”. O candidato jeltzale aseverou que só hai dúas alternativas de Goberno, a do PNV e a de EH Bildu, despois de azuar durante a campaña a posibilidade de que o PSOE acabase por apoiar os abertzales no novo Executivo, e chegou a advertir que “o PNV tomaría unha decisión sobre Sánchez” nesa situación. Perante a posibilidade de perder o posto como primeira forza, os dous últimos lehendakaris do PNV, Urkullu e Juan José Ibarretxe (1999-2009), amosaron o seu apoio a Pradales na recta final da súa primeira campaña como candidato jeltzale á Presidencia. Feche de campaña Tanto EH Bildu como o PNV elixiron Bilbo para desenvolver os seus últimos actos de campaña, a primeira forza canda o presidente catalán, Pere Aragonès (Esquerra Republicana de Catalunya), e o titular de Finanzas norteirlandés, Conor Murphy (Sinn Féin), nunha xornada na que Otxandiano confiou en que o domingo se produza un “cambio de ciclo” que permita promover “políticas de cooperación” por diante das de “confrontación”. Falece o ex lehendakari José Antonio Ardanza Pola súa parte, as forzas estatais contaron nos seus actos con distintos cargos que se desprazaron desde Madrid. No do PSOE, que como Podemos e Sumar tamén escolleu Bilbo, estivo o presidente estatal para apoiar o seu candidato, Eneko Andueza, ao tempo, tamén viaxou a secretaria xeral de Podemos, Ione Belarra, que interveu xunta Miren Gorrotxategi, e o ministro de Cultura, Ernest Urtasun (Sumar), que arroupou Alba García. Xa en Gasteiz, lugar polo que optaron o PP e Vox, o presidente dos conservadores, Alberto Núñez Feixoo, participou no feche de campaña onda Javier de Andrés, o seu candidato, e o ultradereitista Santiago Abascal, que encabeza Vox, fixo o propio con Amaia Martínez, que pugna por non perder a representación que obtivo en 2020. As forzas nacionalistas concentrarían 75% dos asentos Incluso no caso de que se confirme unha vitoria abertzale hai poucas posibilidades de que o seu candidato, Pello Otxandiano, logre nesta ocasión facerse coa Lehendakaritza ante o compromiso do PSOE de non pactar con EH Bildu para gobernar, a diferenza do que acontece no Congreso español, no que o seu apoio -canda o do resto de forzas soberanistas- é clave para que o PSOE manteña o liderado do Executivo. Non obstante, outra das conclusións das sondaxes é que PNV e PSOE, que comparten o actual Goberno vasco, están ao límite de perder os 38 escanos que outorgan a maioría absoluta. Aínda que isto non suporía un problema para que Pradales sexa investido polas particularidades do sistema parlamentario vasco, no que na sesión de investidura só existe a posibilidade de votar a favor dunha das candidaturas que se presenten ou absterse, si que pode dificultar a gobernabilidade, forzándoos a pactos de lexislatura ou tema por tema con outras formacións políticas. Sexa como for, os resultados electorais amosarán o avance nos últimos anos do soberanismo vasco, pois entre EH Bildu e PNV faranse con moita seguridade con máis de 75% dos asentos do Eusko Legebiltzarra, unhas cifras inéditas que conformarán o lexislativo máis nacionalista da súa historia. De esquerda e dereita e de arriba a abaixo: Feches de campaña do PNV (Imanos Pradales), EH Bildu , PSOE (Pedro Sánchez e Eneko Andueza) e PP (Alberto Núñez Feixoo e Javier de Andrés)