Eleccións en Indonesia: un novo presidente, un vello coñecido

O novo presidente de Indonesia, Prawobo Subianto, formou parte do goberno ditatorial de Suharto e foi acusado de cometer violacións de dereitos humanos á fronte das forzas especiais Kopassus. Os comicios decorridos o día 14 de febreiro en Indonesia –arquipélago do Pacífico composto por máis de 17.000 illas– deron a maioría absoluta ao candidato Subianto, do partido Movemento Gran Indonesia (Gerindra). Aínda que a xeografía da república fai difícil o reconto de votos, que non se espera que sexa oficial até dentro dunhas semanas, o escrutinio é considerado como fiable por distintas organizacións de calidade electoral. Unha segunda volta, que se daba por feita nun principio, xa non será precisa. O partido Gerindra é de índole nacionalista; fundado no ano 2008, Subianto chegou a presentarse ás eleccións presidenciais en tres ocasións nesta plataforma política. A terceira foi a que lle ofreceu a vitoria. O pasado de Subianto Pero, quen é Subianto e por que suscita interese como figura política? Prawobo Subianto leva anos a ser unha parte fundamental da vida política en Indonesia dunha ou outra forma. Tras o seu cargo no réxime de Suharto, Subianto deu en presentarse en dúas ocasións á Presidencia do país contra Joko Widodo –alcumado 'Jokowi'–. Este último levaba, ata moi recentemente, ocupando o cargo de presidente da república desde o ano 2014. A polémica aparece durante o seu servizo militar, cando dirixiu as forzas especiais coñecidas como Kopassus. Entre as duras actuacións das que se lle acusa, están o asasinato do entón primeiro ministro de Timor Leste, en 1978; a invasión do país veciño ata en dúas ocasións, causando masacres entre a poboación local, e a suposta detención, tortura e desaparición de varios activistas en favor da democracia durante a década dos noventa. As promesas electorais de Subianto inclúen o crecemento económico do país, que xa é unha das maiores potencias do sueste asiático Tras a caída do réxime de Suharto en 1998, e temeroso da persecución á que podería quedar exposto polas acusacións coas que se lle vinculaba, divorciouse da filla do ditador coa que casara e marchou exiliado a Xordania, onde permaneceu ata o ano 2008 –ano no que axudou a fundar o partido Gerindra, co que agora gañou as eleccións–. Máis recentemente, Subianto chegou á carteira de defensa en 2019, dentro do Goberno de Joko Widodo, quen fora o seu rival político. Este feito foi recibido con escepticismo por parte da opinión pública, dado que moitas voces sinalan que a escolla do novo vicepresidente de Indonesia –Gibran Rakabuming Raka, fillo de Widodo– non é casualidade. A nivel interno, as promesas electorais de Subianto inclúen o crecemento económico do país, que xa é unha das maiores potencias do sueste asiático, e pronto, segundo estimacións, do mundo. A república é rica en diversos recursos de orixe natural; algúns deles, moi valiosos nas cadeas de valor mundiais. O níquel e os hidrocarburos son algunhas das súas maiores riquezas, que a nova administración de Subianto pretende aproveitar. Relacións exteriores En política exterior, as súas accións futuras son aínda un misterio. O programa electoral presentado polo partido Gerindra era maioritariamente unha prolongación do de Widodo, do que el mesmo se presenta como sucesor: unha política ambigua de non-aliñamento, onde Indonesia mantiña relacións económicas con China por interese, pero tamén tiña contacto frecuente con Estados Unidos. Con respecto a outras nacións do seu contorno –principalmente, do sueste asiático–, é posible que Indonesia actúe de forma similar a como veñen facendo nos últimos anos varios dos países do contorno do mar Meridional. A incapacidade manifesta da Asociación de Nacións do Sueste Asiático (ASEAN) para xestionar a disputa territorial con China provocou que nacións coma Vietnam ou Filipinas se enfocaran en aumentar as súas capacidades de defensa marítima, cada cal pola súa conta. Unha gran parte dos votos obtidos por Subianto proceden dos sectores más novos da poboación. A presenza do novo presidente indonesio en redes sociais como TikTok ou Instagram, facendo uso dunha imaxe moi persoal, que se presentaba como agradable e próxima ao público, foi a base do seu éxito. Os feitos en relación co pasado de Prawobo Subianto, tanto no Exército coma no Goberno, fan escurecer o ceo sobre a democracia indonesia. Aínda que moitos analistas e expertos agardan que as súas políticas sigan a ser continuadoras das do seu predecesor, a realidade é que aínda é demasiado cedo para sabelo con certeza.