Os EUA e a UE tratan de tomar a iniciativa para as negociacións de paz en Ucraína

Despois de fechar a porta a calquera negociación de paz argumentando que non se poderían producir até que as Forzas Armadas rusas abandonasen o territorio ucraíno, incluído o Donbás, a proposta de paz e os movementos políticos en consecuencia adoptados pola China desde finais de febreiro xeraron unha mudanza nas mensaxes lanzadas desde a órbita da Organización do Tratado do Atlántico Norte (OTAN), que trata de recuperar a iniciativa e non quedar apartada dunha eventual negociación, sobre todo tras frear pouco despois do comezo da invasión rusa un acordo de paz entre Kíiv e Moscova para acabar coa guerra, segundo revelou o ex primeiro ministro israelí Naftali Bennett. Nese sentido, e antes da chegada onte a Beijing do presidente francés Emmanuel Macron -tamén estaba prevista a da presidenta do Executivo da Unión Europea (UE) Ursula von der Leyen- para abordar a proposta de negociacións de paz co líder chinés Xi Jinping, a Presidencia de Francia trasladou que Macron e o mandatario estadounidense Joe Biden se coordinaron antes da viaxe e salientaron “a súa vontade conxunta de involucrar a China para acelerar a fin da guerra en Ucraína e participar na construción dunha paz sostíbel na rexión”. Xa en territorio chinés, Macron considerou o diálogo con Beijing como “indispensábel” e destacou que pode ter un “gran papel” para atopar un “camiño á paz” en Ucraína, sinalando que “calquera que axude o agresor se poría na posición de ser cómplice dunha violación do dereito internacional”, en alusión a unha hipotética venda de armamento letal á Rusia por parte da China, un aspecto reiterado desde a alianza militar unha vez feito público que o Gabinete do presidente chinés Xi Jinping lanzaría unha proposta para acabar coa guerra. No que atinxe ás relacións coa China, nunha viaxe na que está acompañado por 50 empresarios franceses para afianzar os lazos comerciais, o mandatario francés incidiu en que “non debemos desvincularnos da China”, no marco tanto dun maior distanciamento entre Washington e Beijing como das declaracións de von der Leyen a pasada semana, nas que vinculaba a posición chinesa no conflito en Ucraína coas futuras relacións con Bruxelas. En todo caso, por parte da alianza militar desbótase que Beijing poida liderar un eventual proceso de paz por mor de que “non é imparcial”, insistiu o coordinador do Consello de Seguridade Nacional dos Estados Unidos, John Kirby, algo que a China rebate subliñando a súa neutralidade e acusando Washington e OTAN de escalar o conflito coa súa implicación na guerra. Arredor desa cuestión, a última actualización do Kiel Institute recolle que no primeiro ano desde a invasión rusa o 24 de febreiro de 2022 os membros da OTAN enviaron 80.000 millóns de euros en armamento a Ucraína, ao que hai que engadir 55.000 millóns en asistencia financeira e máis de 10.000 en axuda humanitaria. Incluso antes de facerse pública a proposta de paz, Wang Yi, o principal diplomático do Partido Comunista da China, desenvolveu unha xira diplomática por Alemaña, Italia, Francia, Hungría e Belarús. Amais, Xi tamén tratou co presidente ruso Vladimir Putin a cuestión na última viaxe oficial a Rusia e fixo o propio co presidente español Pedro Sánchez ao final da semana pasada en Beijing, meses antes de que Madrid asuma a Presidencia rotatoria do Consello da Unión Europea. Ao tempo, organizou unha visita oficial á China do presidente brasileiro, Lula da Silva, que tivo que adiala por unha doenza até o 11 de abril. O titular de Exteriores brasileiro, Mauro Vieira, apuntou que o grupo Brics (Brasil, Rusia, India, a China e Suráfrica) pode xerar un “ambiente confortábel” para impulsar un conxunto de países “non involucrados” que xestione as negociacións de paz entre Moscova e Kíiv. Aliás, o país enviou o asesor para Asuntos Internacionais de Lula, Celso Amorim, a Moscova, onde se reuniu con Putin. Á vez, países como Hungría ou Exipto tamén apoiaron conversas de paz para acabar coas hostilidades. Porén, Suráfrica tamén está propondo activamente unha idea similar, “posibelmente involucrando figuras políticas de alto nivel dun grupo de potencias non occidentais”, explica o International Crisis Group, mentres que Indonesia reclama “negociacións de paz directas” entre as partes en conflito. Polo xeral, a entidade reflicte que entre os países fóra da contorna da OTAN “poucos semellan comprometidos co apoio total a Ucraína para alcanzar a vitoria nos seus propios termos”, o que se traduce nunha diversidade de propostas pero centradas en conseguir a paz, interpretando a guerra como un conflito europeo mais non determinante a nivel mundial, como defende a OTAN, o que tamén xera que tres cuartas partes dos países do mundo non se sumaran ás sancións coercitivas aplicadas pola UE ou os Estados Unidos contra Rusia. En paralelo, a posición chinesa á hora de abrir a porta a negociacións de paz en Ucraína viuse reforzada pola mediación no acordo entre Irán e Arabia Saudita para normalizar relacións, asinado en Beijing. De feito, o país acolle hoxe unha xuntanza entre o ministro de Relacións Exteriores saudita, o príncipe Faisal bin Farhan Al Saud, e o iraniano, Hossein Amirabdollahian, a primeira reunión formal entre os dous Estados en máis de sete anos, destaca Reuters. Diálogo canto antes Malia que Moscova e Kíiv indican que non hai condicións para iniciar negociacións, Einar Tangen, do Instituto Taihe, con sede en Beijing, fixo fincapé en que o Goberno chinés quere que o diálogo entre as partes comecen antes de que Xi reciba a Macron e von der Leyen, publicou Al Jazeera. Tangen recalcou que “hai preocupacións reais en Beijing de que isto se descontrole, coas mencións a armas nucleares que están sendo colocadas, ese non é o camiño a seguir”, sostivo, debullando que para a China amais dos países en guerra a UE é a “gran perdedora”, polo que considera Bruxelas como “o socio máis lóxico para comezar un proceso que se trata de diplomacia, non de bombas”. Desde a cidade belga, que acolle o cuartel xeral da OTAN, o secretario xeral Jens Stoltenberg instou os membros da alianza militar a acordar elevar o gasto militar até 2,5% do produto interior bruto. A reconstrución de Ucraína Entre os intereses franceses no que respecta á guerra en Ucraína está participar nunha potencial reconstrución do país após a fin do conflito, cun custo estimado por Kíiv de 750.000 millóns de euros, unha cifra que o Banco Mundial reduce á metade. Macron xa organizou unha conferencia con 700 compañías dispostas a asumir contratos nese sentido, pero non é o único, pois as empresas de construción españolas "soñan con participar no repartimento", afirma La Vanguardia.