A Fiscalía catalá unifica as causas e activa as pescudas sobre a 'Operación Catalunya'

Máis de nove anos despois de confirmarse a súa existencia e tras a reiterada inacción do sistema xudicial do Estado español á hora de asumir a responsabilidade de esclarecer o acontecido, a Fiscalía do Tribunal Superior de Justícia de Catalunya programa unificar a investigación aberta polo Ministerio Público catalán sobre os intentos de desacreditar o ex fiscal xefe territorial Martín Rodríguez Sol coa denuncia de Josep Lluis Trapero, ex maior dos Mossos d’Esquadra, relacionadas coa ‘Operación Catalunya’, recolleron hoxe os xornais La Vanguardia e elDiario.es. Após só investigar no pasado as demandas ao respecto como casos separados, a decisión da Fiscalía implica centrar a causa na trama deseñada no mandato de Mariano Raxoi (2011-1018), do Partido Popular (PP), o que será a primeira vez que aconteza e ten especial relevancia logo de rexeitar varios xulgados denuncias de vítimas, o último a Audiencia Nacional en xaneiro nunha decisión do xuíz Manuel García-Castellón, vinculado co PP. As manobras da Xustiza española tamén incluíron obstaculizar o proceso xudicial que se desenvolve en Andorra, no que foron imputados Raxoi e Jorge Fernández Díaz, ministro de Interior do seu Executivo e que tería organizado a conspiración, que efectuou espionaxes ilegais canda a elaboración de investigacións falsas para filtralas a medios conservadores e así tratar de desacreditar líderes independentistas cataláns ou persoas relacionadas co movemento de autodeterminación. No caso de Andorra, a investigación pivota arredor das ameazas de impedir operar no Estado á Banca Privada d'Andorra para que entregase datos bancarios da familia do ex presidente catalán Jordi Puyol (Convergència i Unió, CiU), mais a operación parapolicial tamén afectou outros dous ex mandatarios, Artur Mas (CiU) e Carles Puigdemont (Junts), o ex alcalde da capital catalá Xavier Trias (Junts) ou Rodríguez Sol, que lideraba daquela a Fiscalía catalá. Neste último caso, o Ministerio Fiscal catalán resolveu abrir o expediente para abordar “o non disimulado obxectivo de desacreditalo” por mor da “súa intención de investigar presuntos delitos cometidos desde o Ministerio do Interior no curso de investigacións seguidas contra algúns líderes do movemento independentista catalán”. Ao respecto de Trapero, a denuncia refírese á tentativa de vinculalo co narcotráfico, unha montaxe que García-Castellón xa se negara a investigar. Ofensiva contra a amnistía Precisamente, noutro dos casos que leva o maxistrado da Audiencia, o vencellado con Tsunami Democràtic, entidade que organizou protestas masivas en contra das sentenzas de prisión da Xustiza española contra membros do Goberno catalán en 2019, o maxistrado decretou a imputación de Puigdemont e Marta Rovira, secretaria xeral de Esquerra Republicana de Catalunya (ERC), por terrorismo, buscando evitar que se poidan beneficiar da lei de amnistía ás persoas independentistas catalás represaliadas polo Estado. O manexo forma parte da ofensiva contra a amnistía lanzada pola xudicatura española da man do PP e da ultraespañolista Vox, que veñen de derrogar a Lei de memoria democrática en Aragón, onde comparten Executivo. O propio órgano de Goberno da maxistratura, o Consello Xeral do Poder Xudicial (CXPX) -que actúa cun mandato caducado hai máis de cinco anos polo bloqueo do PP á súa renovación, o que lle garante unha maioría conservadora-, emitiu unha resolución contra a amnistía. A súa Comisión de Ética Xudicial avalou hoxe as protestas das e dos xuíces contra a norma, o mesmo día no que José María Macías, membro do CXPX, participaba no acto crítico coa proposta de lei -xunta ao ex membro e presidente da Audiencia Provincial de Madrid Juan Pablo González- dunha entidade do ex ministro de Interior Jaime Mayor Oreja (PP). Tendo en conta o papel do PP como un dos principais protagonistas da campaña contra a amnistía e os pactos coas forzas nacionalistas, medios estatais desvelaron o desconcerto no seo da forza estatal ao transcender que o seu presidente, Alberto Núñez Feixoo, admitiu nunhas declaracións extraoficiais á prensa que estudaron durante 24 horas a proposta de Junts da medida de graza nas conversas de cara á súa investidura, ou que aceptarían un indulto condicionado a Puigdemont. Asemade, subliñou que considera difícil que a Xustiza española poida probar que o ex líder catalán cometeu delitos de terrorismo. Á vez, ERC confirmou que o PP tamén se lles achegou para tratar a posibilidade dun acordo. Neste sentido, o PSOE remitiu hoxe á Comisión Europea unha carta na que traslada que Feixoo mudou a súa posición, pasando a validar un “plan de reconciliación” co independentismo catalán. Sostendo que podería ser “de interese” para o ente, asevera que a posición pública dos conservadores carece de credibilidade, facendo énfase en que o recoñecemento de Feixoo se produciu após a publicación no portal ElNacional.cat dun artigo de Puigdemont no que afirmaba que “todo se saberá”. Indultaríase a quen non se beneficie da amnistía Carles Campuzano, conselleiro de Dereitos Sociais do actual Goberno catalán, recalcou hoxe que o Gabinete español “está aberto” a “resolver polo ámbito dos indultos” a situación das persoas independentistas represaliadas que fiquen excluídas da amnistía, unha norma que neste momento beneficia o “groso da xente de a pé que foi sometida á represión”, indicou. Tanto o PSOE como Junts, que impediu a aprobación no Congreso da lexislación criticando que non blindaría as persoas acusadas de terrorismo pola Xustiza española, reactivaron as conversas para chegar a un acordo na Comisión de Xustiza a próxima semana e que o texto poida ser ratificado polo pleno. Así e todo, o PSOE mantén o veto a modificacións profundas da proposta e insiste en ofrecer mudanzas legais para evitar que o sistema xudicial poida eternizar as instrucións sen apenas avances, como ocorre co ‘Caso Tsunami’. Sexa como for, para as forzas soberanistas catalás, que forzaron a inclusión da amnistía nos acordos para investir Pedro Sánchez (PSOE), a aprobación da norma é un punto capital na relación co Executivo español. En alusión aos Orzamentos Xerais do Estado, o presidente de ERC, Oriol Junqueras, incidiu en que "é moi difícil" que sexan aprobados sen a amnistía.