O G7 pacta un préstamo de 46.000 millóns de euros para Ucraína avalado cos xuros dos fondos rusos conxelados

O G7, entidade que agrupa os Estados Unidos e os seus aliados cun maior peso económico, o Xapón, Alemaña, Reino Unido, Francia, Italia e o Canadá, ao que se engade de facto a Unión Europea (UE), pactou a quinta feira, na primeira xornada da súa reunión anual en Fasano, no sur do Estado transalpino, un principio de acordo para outorgar a Ucraína un préstamo de 46.000 millóns de euros destinado á adquisición de armas, a evitar o seu colapso económico inxectando fondos para o seu orzamento e a unha hipotética reconstrución. O empréstito usaría como garantía futuras ganancias polos xuros de 300.000 millóns de euros do banco central ruso conxelados polos Estados membros ou da contorna da Organización do Tratado do Atlántico Norte (OTAN). A axencia AP detallou citando un funcionario estadounidense e outro francés que os fondos poderían ser entregados este ano, e a meirande parte provirían de Washington. O funcionario galo recoñeceu que se os fondos rusos conxelados non xeran ingresos dabondo “xurde a cuestión do repartimento da carga”. Ao respecto, Max Bergmann, do Centro de Estudos Estratéxicos e Internacionais, sostivera que entre as e os titulares de Finanzas da UE existía preocupación pola posibilidade de que ter que asumir o préstamo “se Ucraína incumpre coas súas obrigas”. O certo é que a meirande parte dos fondos soberanos rusos conxelados pola OTAN están na UE, neste contexto, Washington premeu insistentemente para confiscalos e entregarllos a Ucraína. A OTAN aposta por escalar a guerra no leste de Europa e apoia que Ucraína bombardee territorio ruso Porén, a presidenta do Banco Central Europeo, Christine Lagarde, advertira que unha decisión deste tipo podería “interpretarse como unha violación da orde xurídica internacional” segundo “moitos” xuristas, namentres o ex ministro de Finanzas belga Johan Van Overtveldt sinalou que “os banqueiros centrais temen pola reputación das súas divisas” posto que “se decidimos quedarnos cos activos rusos outros países pensarano dúas veces á hora de gardar o seu diñeiro en euros ou en dólares”. Isto levou a que Bruxelas limitara as súas medidas e pactara o mes pasado financiar a compra de armamento para Kíiv cos xuros dos fondos rusos, estimados en 3.000 millóns de euros anuais. A decisión chega precisamente cando o uso a nivel internacional da moeda estadounidense como reserva está a baixar ante o impulso da desdolarización co uso doutras moedas para o comercio, unha situación que intensifica o avance paulatino do traballo conxunto entre Arabia Saudita é a China para reducir o uso do dólar na compravenda de petróleo, un dos factores chave do uso xeneralizado da moeda estadounidense. Unha confiscación de facto Con todo, medios internacionais sinalaron que a declaración final deixará a porta aberta á confiscación, e o funcionario estadounidense trasladou que se acordou manter bloqueados os activos rusos até que Moscova acepte pagar reparacións a Ucraína, un punto paradoxal tras as manobras dos Estados Unidos, avaladas polos seus aliados, para non asumir a súa responsabilidade por crimes de guerra ou pagar reparacións por invasións como as de Afganistán ou o Iraq, chegando a ameazar con atacar tribunais internacionais. Cifra récord: Sánchez anuncia unha doazón a Ucraína de 1.000 millóns de euros este ano para armamento Desde febreiro de 2022 até o 30 de abril deste ano, os membros da OTAN ou países da súa contorna comprometeron con Kíiv 300.000 millóns de euros. Maria Zakharova, voceira de Exteriores de Rusia, advertiu de “inminentes medidas de represalia” que “serán extremadamente dolorosas para Bruxelas”, que pagará “as súas tolemias do seu peto”. As e os líderes do G7 tamén mantiveron unha reunión co presidente ucraíno, Volodimir Zelenski, que asinou co presidente estadounidense, Joe Biden, e co primeiro ministro xaponés, Fumio Kishida, acordos de seguridade apenas dous días antes do comezo en Suíza da Conferencia de Alto Nivel sobre a Paz en Ucraína. Este evento, co que Zelenski busca apoio para a súa proposta de plan de paz, foi perdendo peso nas últimas semanas ante as críticas procedentes do Sur Global de que non tiña sentido unha cimeira deste tipo sen convidar Rusia, o que motivou a negativa chinesa a asistir. A pesar de que o país alpino limitou o foco do debate a apenas tres dos puntos da proposta de Zelenski, os únicos que considera factíbeis, para tratar de obter un consenso, a prensa ucraína recolleu a diminución dos Estados que participarán, desde os 107 anunciados inicialmente a 78, entre indicios de que Biden tampouco asistirá. Neste marco, Ucraína abriu a porta a convidar Rusia a unha segunda cimeira, logo de introducir unha norma legal que prohibe negociar co presidente ruso, Vladimir Putin, con posterioridade a que desde a OTAN se bloqueara un acordo de paz nos primeiros compases da invasión. As forzas rusas avanzan en Khárkiv e consolidan unha nova fronte na guerra de Ucraína En teoría, a primeira sesión do cumio estaba centrada en África, cambio climático e desenvolvemento. A sexta feira, na penúltima xornada, tamén participarán nas reunións o presidente brasileiro, Lula da Silva, que lidera este ano o G20, o turco Recep Tayyip Erdogan, o primeiro ministro indio Narendra Modi ou o mandatario arxentino de extrema dereita, Javier Milei, que foi convidado á cimeira pola tamén ultradereitista primeira ministra italiana, Giorgia Meloni. A ultradereitista Meloni, perto de sacar o aborto da cimeira No borrador da declaración final do cumio, consultado pola axencia ANSA, non aparece a palabra aborto, e limítase a reiterar os compromisos da reunión do pasado ano no Xapón para “un acceso universal, axeitado e sostíbel á atención sanitaria por parte das mulleres, incluídos os dereitos reprodutivos”. De ser finalmente aprobado nestes termos suporía un éxito para a primeira ministra italiana, Giorgia Meloni e ratificaría o peso cada vez maior da ultradereita neste foro após eliminarse do borrador inicial a referencia á importancia de garantir o acceso seguro e legal ao aborto, que si apareceu na cimeira no Xapón. Outros dos temas que formarán parte da cimeira é o tocante á China, un asunto no que os membros do G7 tratan de conseguir apoio no Sur Global para a súa acusación de que Beijing está a producir máis do que debería segundo eles, atribuíndo a cada vez menor competitividade das empresas occidentais a supostos subsidios excesivos do Estado socialista, que tamén será o centro da sesión dedicada ao choque pola hexemonía no Indo-Pacífico. Tamén está previsto que se aborde o xenocidio en Gaza, mais non hai indicios de que se vaian tomar decisións efectivas para pórlle fin ante o apoio dos Estados Unidos a Israel.