Goberno español pon os centros privados de diagnóstico ao dispor dos servizo sanitarios territoriais

O Goberno central poderá regular o prezo dos test diagnósticos de coronavirus. (Europa Press)
Redacción
14 de abril de 2020 (13:04 h.)
Etiquetas
Sanidade Covid-19
O BOE publica esta terza feira a orde pola que o Ministerio de Sanidade pon en disposición dos Gobernos territoriais todos os centros clínicos de titularidade privada que realizan test de coronavirus, dentro das medidas excepcionais para o reforzo do sistema de saúde e a contención da crise sanitaria ocasionada pola COVID-19. A decisión abre a porta ademais á regulación dos prezos  das probas diagnósticas, "co obxecto de evitar situacións abusivas no acceso a este servizo".

A orde abrangue os servizos e estabelecementos sanitarios de diagnóstico clínico de titularidade privada situados no territorio no que non estean a prestar servizo no Sistema Nacional de Saúde, así como o seu persoal. En canto aos requisitos para a realización destas probas, estas quedan suxeitas á prescrición do persoal facultativo e de acordo coas directrices acordadas por Sanidade.

Os centros, servizos e establecementos sanitarios de diagnóstico clínico de titularidade privada deberán estar dispoñíbeis para entrar a formar parte ou reforzar os circuítos de diagnóstico xa existentes desde esta mesma xornada.

Estas medidas estarán vixentes até a finalización do estado de alarma, que comezou o pasado 14 de marzo e que se prolongará, cando menos, até o próximo día 26. O incumprimento da orde poderá ser motivo de sanción para estes centros, segundo recolle o BOE.

Notificación de casos confirmados de coronavirus

Así mesmo, a orde do Ministerio de Sanidade estabelece que todos os centros, servizos e establecementos sanitarios de diagnóstico clínico, con independencia da súa titularidade, deberán notificar os casos detectados de coronavirus a través destas probas diagnósticas, así como a compra de test rápidos diagnósticos, especificando á Autoridade sanitaria competente o tipo de material, número de unidades adquiridas e destino de uso.  

 

Etiquetas
Sanidade Covid-19