A Italia de Meloni rexeita o 'proxecto do século'

A primeira ministra italiana, Giorgia Meloni —no cargo desde outubro de 2022—, leva tempo a ser crítica co proxecto abandeirado por China, do que Italia pasou a formar parte no ano 2019, coa anterior Administración Draghi: a Nova Ruta da Seda. A decisión de retirarse da iniciativa foi notificada de modo oficial ante o Goberno de Beijing a primeiros do mes de decembro. Italia é o único Estado do G-7 en terse unido á Nova Ruta da Seda chinesa. Tamén coñecido como Belt and Road Initiative (BRI), a Nova Ruta da Seda é un proxecto deseñado por China como ferramenta de política exterior. O seu obxectivo principal é o finnciamento de diversos plans de infraestrutura por todo o mundo mediante o uso da inversión estranxeira directa. Deste modo, preténdese aumentar o comercio internacional, o desenvolvemento das nacións e as relacións entre países e continentes. Na práctica, porén, a Nova Ruta da Seda conta con numerosos detractores. O que o Goberno chino denomina con asiduidade "situacións de beneficio mutuo", outros axentes veno coma unha "trampa de débeda" de proporcións monumentais. Marcha atrás Entre as razóns esgrimidas por Italia para dar marcha atrás na súa decisión previa, está a desigualdade da balanza comercial. En termos moi xerais, Italia estaría abrindo o seu mercado nacional aos intereses de China, pero China non estaría a facer o mesmo por Italia. Durante estes últimos meses precedentes ao anuncio oficial, distintos representantes do Goberno italiano estiveron a insistir no feito de que, se ben China é vista cada vez máis coma un competidor estratéxico no panorama internacional, tamén destaca coma unha parte imprescindible da economía a nivel global, coa que é preciso relacionarse en boas condicións. Estados Unidos anunciou en 2021 un proxecto análogo e contrario á Nova Ruta da Seda de China: o 'Build Back Better World' É certo que, baixo o paraugas da BRI, fomentar a participación de empresas e entidades financeiras chinesas contaría co respaldo por parte do Goberno de Beijing. Porén, existen numerosos exemplos en todo o mundo de países que, incapaces de cumprir coas condicións acordadas nun primeiro momento, deben renegociar as mesmas, o que ás veces resulta en verdadeiros quebracabezas. Estados Unidos estaría a apoiar a decisión de Italia acerca de retirarse da BRI. Medios de comunicación internacionais aseguran que a Administración Biden ofreceulle un ultimato ao Goberno de Meloni, segundo o cal tería ata decembro para tomar unha decisión. Resulta xa vox populi que Estados Unidos é o principal competidor de China a nivel mundial. O temor a nunha posible perda de influencia en contornos afíns como Europa levou a Administración Biden a anunciar, en xuño de 2021, un proxecto análogo e contrario á Nova Ruta da Seda de China: o Build Back Better World. Os parámetros do mesmo non están aínda definidos de modo pormenorizado. Descontento en Europa Italia non é o primeiro país europeo en sumarse á iniciativa da Nova Ruta da Seda. En 2018, un ano antes de que Italia fixera o mesmo, os ministros de exteriores chinés e grego firmaron un acordo a nivel gobernamental para incluír Grecia como parte da BRI. Xa en 2016, a navieira chinesa Cosco comprara a maioría das participacións do porto de Pireo, un dos portos comerciais máis importantes de todo o Mediterráneo. As autoridades de Beijing chamaran a este a "Cabeza do Dragón" pola súa relevancia para a entrada de China en Europa. Tamén en 2018, autoridades da Unión Europea lanzaron unha investigación por mor de sospeitas sobre a existencia dunha organización criminal con vinculación chinesa que estivera a operar no mesmo porto de Pireo. Embaixadores de toda Europa asinaron un comunicado conxunto para mostraren o seu descontento coa iniciativa chinesa da Nova Ruta da Seda, en termos moi similares aos que agora emprega o Goberno italiano de Meloni para argumentar respecto da súa decisión. En esencia, non existe a percepción de que as relacións entre China e os Estados europeos sexan recíprocas, nin que o vaia a ser baixo o amparo da BRI. Con todo, a retirada de Italia do proxecto da Nova Ruta da Seda non será inmediata: 2024 é a data onde termina o actual acordo firmado en 2019, que non será renovado. O ano 2024 coincide, ademais, coa presidencia de Italia dentro do G-7, polo que non carece de simbolismo.