Julian Assange é liberado logo de alcanzar un acordo xudicial cos Estados Unidos, que o perseguiu durante 14 anos

Tras case 14 anos, un e medio de arresto domiciliario no Reino Unido, sete refuxiado na embaixada do Ecuador en Londres, a capital británica, e cinco preso no cárcere de máxima seguridade de Belmarsh, na mesma cidade, o fundador de WikiLeaks, Julian Assange, recuperou a liberdade, confirmou a entidade na madrugada da terza feira. Após concederlle a liberdade baixo fianza o Tribunal Superior de Inglaterra e Gales logo dunha audiencia a pasada quinta feira, Assange foi liberado no aeroporto de Stansted, onde embarcou en dirección a Saipán, a capital das Illas Marianas do Norte, un Estado libre asociado dos Estados Unidos no oeste do océano Pacífico. Alí estaba previsto que comparecese na madrugada diante dun tribunal federal para declararse culpábel de violar a Lei de Espionaxe estadounidense por conspiración para obter e difundir información clasificada de defensa nacional tras alcanzar un acordo co Departamento de Xustiza para ser sentenciado a 62 meses de prisión que se considerarían cumpridos polo tempo de reclusión no Reino Unido. Unha das posibilidades abertas ao feche desta edición é que a maxistrada Ramona Villagomez Manglona aprobe o acordo na audiencia programada a cuarta feira ás 9 hora local (a 1 da mañá na Galiza). De así suceder, retiraríase a solicitude de extradición e Assange podería estar voltando a Australia, o seu Estado natal. O Departamento de Xustiza estadounidense detallou que a audiencia foi fixada en Saipán pola “oposición do acusado a viaxar aos Estados Unidos continentais” e a proximidade con Australia. Con todo, a parella do fundador de WikiLeaks, Stella Assange, incidiu en que “calquera cousa pode pasar” até que o acordo sexa validado, ademais de anunciar que solicitarán o indulto á Presidencia dos Estados Unidos e que pedirán achegas para financiar os máis de 450.000 euros que terán que pagar a Australia polo voo que o leva desde Londres, e que a terza feira aterrou para facer escala en Tailandia antes de volver despegar en dirección a Saipán. Os Estados Unidos non se esquecen de Julian Assange No caso de que a declaración de culpabilidade recibise luz verde de Villagomez e o caso ficase fechado, poríase fin definitivamente á persecución lanzada por Washington, coa participación da Xustiza británica e sueca, que acusou falsamente Assange de violación para forzar a súa detención e posíbel extradición ao país americano, durante case unha década e media após difundir WikiLeaks material que probaba os crimes de guerra cometidos polas forzas estadounidenses nas invasións de Afganistán e o Iraq. Nese contexto, os Estados Unidos acusárono de múltiples cargos de espionaxe, que poderían supor 170 anos de prisión, e reclamaron a súa extradición, un dos motivos da súa detención ao retirarlle en 2019 o Ecuador o asilo político, no marco da viraxe á dereita do daquela presidente ecuatoriano, Lenín Moreno. Ao confirmarse a liberación de Assange despois de “máis de cinco anos nunha cela de 2x3 metros, illado 23 horas ao día”, WikiLeaks fixo fincapé en que a fin da persecución “é o resultado dunha campaña global que abarcou organizadores de base, defensores da liberdade de prensa, lexisladores e líderes de todo o espectro político até chegar á Organización das Nacións Unidas (ONU)”, reiterando que “creou o espazo para un longo período de negociación co Departamento de Xustiza dos Estados Unidos”. Pola súa parte, Liz Throssell, voceira da Oficina da ONU para os Dereitos Humanos, celebrou os “pasos significativos” de cara á resolución “definitiva”, lembrando que “o caso presentaba unha serie de dúbidas en materia de dereitos humanos”. Un proceso xudicial ilegal Tanto Alice Jill Edwards, relatora especial da ONU sobre a tortura, como o seu predecesor, Nils Melzer, demandaran a liberación de Assange. Melzer criticara amais o proceso xudicial británico, que “viola claramente as normas fundamentais de dereitos humanos e o Estado de dereito”, subliñando que os Estados Unidos perseguían Assange “só por exercer xornalismo de investigación” e advertindo de que en Washington “os acusados en materia de seguridade do Estado non teñen un xuízo xusto”, e sufriría unha detención equivalente á “tortura” logo de que na última reclusión Assange xa fora diagnosticado con “todos os signos típicos das vítimas de tortura psicolóxica”. Os Estados Unidos non descartan condenar Julian Assange a morte Malia que desde 2022 a orde de extradición de Assange aos Estados Unidos está asinada no Ministerio de Interior británico, o Tribunal Superior de Inglaterra e Gales freou a súa implementación en maio deste ano, permitindo a Assange interpor un novo recurso despois de que Washington non garantira á corte que tería un xuízo xusto. Pouco antes, o propio presidente estadounidense, Joe Biden, admitiu que estaba a estudar a petición de Australia, un aliado do país, para finalizar a persecución contra Assange. O primeiro ministro australiano, o progresista Anthony Albanese, sinalou ao facerse pública a súa liberación que “non se gaña nada co seu encarceramento continuo e queremos que o traian a casa”, asegurando que “o caso prolongouse demasiado” e informando de que Stephen Smith, Alto Comisionado de Australia no Reino Unido, acompañou Assange no voo desde Londres. "Unha preocupación moi seria para as xornalistas" Stella Assange, avogada e parella do fundador de WikiLeaks, advertiu á axencia Reuters de que “o feito de que exista unha declaración de culpabilidade” por espionaxe “é obviamente unha preocupación moi seria para as xornalistas”. Nese sentido, Jodie Ginsberg, directora executiva do Comité para a Protección dos Xornalistas, alertou após celebrar a súa liberación que a persecución lanzada polos Estados Unidos “sentou un precedente legal prexudicial ao abrir a porta a que os xornalistas sexan xulgados” no caso de que reciban “material clasificado dos denunciantes”. A CIA empregou unha empresa con sede no Estado español para espiar Assange, denuncian os seus avogados Pola súa parte, Jameel Jaffer, director executivo do Instituto Knight da Primeira Emenda na Universidade de Columbia, nos Estados Unidos, debullou que, aínda que o “acordo de culpabilidade evitaría o peor dos casos para a liberdade de prensa”, o pacto “contempla que Assange terá cumprido cinco anos de prisión por actividades que os xornalistas realizan todos os días”, o que “proxectará unha longa sombra sobre os tipos de xornalismo máis importantes, non só neste país senón en todo o mundo”, aseverou. Ademais de organizacións xornalísticas e en defensa dos dereitos humanos, múltiples líderes progresistas no mundo aplaudiron o anuncio da liberación de Assange.