Junts fixa hoxe as condicións para investir Sánchez

O ex president da Generalitat de Catalunya, Carles Puigdemont, e a vicepresidenta segunda en funcións do Estado español e líder de Sumar, Yolanda Díaz, están de acordo “en explorar todas as solucións democráticas para desbloquear o conflito político” entre Barcelona e Madrid, trasladaron a segunda feira nun comunicado conxunto após unha reunión de case tres horas na sede do Parlamento da Unión Europea en Bruxelas (Bélxica), na que tamén participaron Jaume Asens, ao que a forza estatal encargou a negociación con Junts, e Antoni Comín, como Puigdemont eurodeputado por Junts, a formación soberanista que o ex mandatario encabezou até o pasado ano. A viaxe de Díaz produciuse 24 horas antes de que Puigdemont expoña as condicións de Junts para negociar a investidura de Pedro Sánchez, do PSOE, que abriría a porta á configuración dunha coalición con Sumar. Sánchez precisa o apoio dos partidos soberanistas de Catalunya, Galiza e Euskal Herria para manterse no poder tras o repartimento de escanos na Cámara Baixa estatal xerado polos comicios do 23 de xullo. Fontes do PSOE no Goberno español transmitiron a medios estatais que “nos informaron á última hora da noite [do domingo]”, e desmarcáronse da reunión, que “non ten nada que ver con nós”. Así e todo, Díaz amosouse “optimista” logo da xuntanza con Puigdemont no que atinxe á investidura de Sánchez, e confiou en desenvolver novos encontros co líder independentista. O comunicado conxunto salienta que a conversa foi “frutífera” e que os participantes comparten “a profunda convicción de que a política debe facerse desde o diálogo e os principios democráticos”. O presidente do Partido Popular (PP), Alberto Núñez Feixoo, que após a designación do rei español Felipe VI enfrontará a finais de setembro unha sesión de investidura que de forma previsíbel fracasará, criticou que “foran negociar unha amnistía contraria á Constitución e referendos de autodeterminación”. A amnistía ás persoas axuizadas, perseguidas ou exiliadas pola organización dun referendo de independencia en Catalunya en 2017 e o proceso asociado é unha das exixencias de Junts e Esquerra Republicana de Catalunya (ERC) para negociar a reelección no Congreso do actual mandatario en funcións. Sánchez deixou entrever a segunda feira que unha norma de amnistía é unha opción real, tras sumar en 2021 os seus votos aos de PP, a ultraespañolista Vox e Ciudadanos para evitar que esta norma se debatese no lexislativo español. Neste sentido, reiterou que o PSOE será “coherente” coa liña que mantivo até o de agora, insistindo en que “o acordo [para a súa investidura] pódese, débese e vaise alcanzar”, e defendeu que será o mandato “que deixe atrás a fractura” do proceso de independencia de Catalunya. Ao respecto, o líder de ERC, Oriol Junqueras, advertira que a amnistía “non é o punto final de nada”, e ratificou que abordar “a cuestión dun referendo de autodeterminación, as condicións nas que se ten que facer ese referendo, é imprescindíbel” para evitar un novo proceso electoral a nivel estatal, que decorrería o 14 de xaneiro no caso de que a finais de novembro non fose escollido ninguén como presidente do Estado. Malia que a amnistía é só un dos aspectos que as forzas catalás reclaman acordar nas negociacións, o presidente de Castela-A Mancha, Emiliano García-Page, do PSOE, rexeitou esta posibilidade aseverando que “choca coa Constitución” e “vulnera o principio de igualdade ante a lei”. Vox demandou a membros do “PSOE bo”, no que inclúe o territorio dirixido por Page, que apoien a investidura de Feixoo. Podemos critica o repartimento de cargos En paralelo á viaxe de Díaz, a coalición Sumar formalizou que as voceiras adxuntas do seu grupo parlamentario procederán de En Comú Podem, Compromís e a Chunta Aragonesista, que rotará o cargo con Més per Mallorca, mentres que Marta Lois, de Sumar, será a portavoz. Podemos criticou a decisión, pedindo “respecto” e “recoñecemento”, “tamén a nivel de Ministerios”, ademais de alertar de que a súa invisibilización no grupo provocará “desilusión”. Aval á extrema dereita Jorge Azcón, presidente de Aragón polo PP tras o acordo con Vox, que replica os pactos para gobernar no País Valencià, Estremadura, Castela e León ou Murcia, rexeitou a segunda feira destituír dous directores xerais nomeados pola extrema dereita logo de divulgarse que protagonizaron mostras de apoio á ditadura franquista, pedindo xulgalos “polos seus feitos futuros”. O Executivo español comezou os trámites para abrirlles expediente por violación da Lei de Memoria Democrática.