Lula parte cara á China após 100 días de Goberno

O presidente do Brasil, Lula da Silva, despegou esta terza feira en dirección á China, onde estará até o 15 de abril nunha visita oficial que o levará a sexta feira a xuntarse co mandatario chinés, Xi Jinping, para “consolidar a nosa relación coa China”, explicou o líder brasileiro, que subliñou que convidará a “Xi a vir ao Brasil para unha reunión bilateral e amosar os proxectos que temos de interese para o investimento chinés”. Porén, antes de reunirse co seu homólogo, Lula asistirá en Shanghai á cerimonia de toma de posesión da ex mandataria brasileira Dilma Rousseff, ambos os dous do Partido dos Trabalhadores, como presidenta do Novo Banco de Desenvolvemento, fundado polo grupo Brics. Aliás, está previsto que se asinen unha vintena de acordos de colaboración no eido da saúde, agricultura, ensino, finanzas, industria, ciencia e tecnoloxía. Na reunión con Xi, o mandatario americano debaterá a posibilidade de crear un grupo de países non implicados na guerra en Ucraína que impulsen negociacións de paz, despois de presentar Beijing o seu propio plan neste sentido. “A China ten peso, o Brasil ten peso”, defendeu Lula á hora de explicar a proposta, apuntando que tamén Indonesia e a India deberían participar no proceso. A visita oficial á China é a terceira viaxe internacional de Lula desde que asumiu a Xefatura de Estado o 1 de xaneiro, tras os desprazamentos á cimeira da Comunidade de Estados Latinoamericanos e Caribeños (Celac) na Arxentina e aos Estados Unidos, para participar nunha reunión bilateral co presidente do país, Joe Biden, o que reflicte o retorno de Brasília ao terreo internacional despois da perda de influencia neste ámbito co seu predecesor, Jair Bolsonaro, de extrema dereita, algo que xa se puido constatar na toma de posesión de Lula, na que participaron comitivas de arredor de 120 Estados, máis de 50 delas de alto nivel ao estar integradas por presidentas, presidentes ou membros do Executivo, tres veces máis que as que acudiron á cerimonia de xuramento de Bolsonaro. Ademais, desde que asumiu por terceira vez a Presidencia logo do período 2003-2010, Lula reintegrou o país tanto na Celac como na Unión de Nacións Suramericanas (Unasur), institucións de integración rexional abandonadas no mandato anterior. Primeiros 100 días A segunda feira, ao facerse os primeiros 100 días do mandato de Lula, interveu no Consello de Ministras e Ministros destacando que “o Brasil volveu ter un Goberno, un Goberno que se mira no pobo brasileiro e esperta cedo para traballar”. Á vez, criticou a Bolsonaro por intentar “perpetuar o fascismo” no medio de “ofensas” contra a “democracia, as mulleres, os negros, os Gobernadores” rexionais e o Supremo Tribunal Federal. En paralelo, recalcou que a resposta dos tres poderes da República un día despois da tentativa de golpe de Estado en Brasília o 8 de xaneiro “é un xesto que marcará o noso mandato”. Lula fixo fincapé en que “o Brasil sairá novamente do mapa da fame”, salientando neste primeiro treito de Goberno a batería de políticas sociais que se puxo en marcha até o de agora e adiantando que é a quenda de centrar a súa atención na economía para “seguir reconstruíndo” o país. No que atinxe ao intento de golpe, polo que arredor de 80 militares serán interrogados esta semana, o presidente ordenou relevar mandos próximos a Bolsonaro e instou a despolitizar as Forzas Armadas, participando en múltiples actos co Exército para recuperar a normalidade institucional. Ao tempo, converteu os militares en protagonistas da operación para acabar coa minaría ilegal no territorio yanomami, a demarcación indíxena máis grande do Brasil, e frear o xenocidio que estaba a sufrir ese pobo polos efectos da minaría e o desleixo da Administración de Bolsonaro, que fomentou a explotación de terras protexidas e diminuíu a capacidade de enfrontala dos organismos gobernamentais. A nivel social, o Executivo recuperou políticas que se aplicaran con éxito na primeira etapa de Lula na Presidencia acompañadas doutras novas. Nesa liña, relanzouse o programa Bolsa Família para que máis de 20 millóns de familias poidan saír da pobreza ao complementar os seus ingresos con condicións como a escolarización das crianzas, e presentouse un programa para financiar por medio dun fondo público a adquisición de vivendas a persoas cun baixo nivel de ingresos nas áreas urbanas, para acabar cos problemas de habitabilidade. Tamén se activou o Programa de Aquisição de Alimentos, dedicado a mercar produtos agrícolas de pequenos produtores e destinalos a alimentar persoas vulnerábeis, persoas usuarias de centros de asistencia social ou da rede pública de saúde, educación ou xustiza, o que para o Gabinete é un incentivo á agricultura familiar e á produción de alimentos de calidade. Outras das campañas que se implantaron dirixíronse a garantir a alimentación nos centros escolares, ampliar o sistema de saúde nas zonas rurais ou dotar de recursos as entidades que combaten a violencia machista. Promesas cumpridas En tres meses, o contador de promesas electorais de G1 desvela que o Goberno xa cumpriu un terzo dos 36 compromisos asinados na campaña electoral susceptíbeis de ser cuantificados, concretamente Lula implementou 13 promesas e atendeu parcialmente catro máis, namentres non foron cumpridos 14 compromisos e cinco propostas non poden ser avaliadas até que avance a lexislatura. Lula xa cumpriu en 100 días unha maior porcentaxe de compromisos de campaña que Bolsonaro durante catro anos. As discrepancias co Banco Central Nos primeiros 100 días, Lula e Fernando Haddad, ministro da Fazenda, reclamaron en distintas ocasións ao Banco Central que reduza os tipos de xuro, fixados en 13,75%, os máis altos desde 2016, criticando que está a frear o desenvolvemento das actividades económicas, algo ao que se nega Roberto Campos, presidente do banco, no que constituíu o principal choque institucional neste tempo. No ámbito económico foi presentada unha norma que acaba co teito de gasto público para sanear as contas e garantir o investimento social, e prepárase unha reforma tributaria.