Mercosur reclama cambios á UE para ratificar o pacto comercial

A presidenta do Executivo da Unión Europea (UE), Ursula von der Leyen, chegou esta terza feira á Arxentina, antes de desprazarse hoxe a Chile e mañá a México, onde prevé reunirse cos presidentes destes países, nunha xira que de forma oficial busca “reforzar as relacións con socios chave da rexión” e anunciar distintos proxectos incluídos no Global Gateway, unha iniciativa que quere contrarrestar a Nova Ruta da Seda impulsada pola China. Porén, na primeira parada, no Brasil, as conversas de von der Leyen co mandatario, Lula da Silva, deixaron claro que o eixo principal da visita oficial ao continente americano é avanzar no acordo comercial co Mercosur, que a Comisión Europea definiu a semana pasada como unha prioridade na súa axenda, co fin de diminuír a dependencia do bloque comunitario dos Estados Unidos e da China. Lula fixo fincapé en que “a premisa que debe existir entre socios estratéxicos é de confianza mutua e non de desconfianza e sancións”, durante a rolda de prensa coa presidenta da Comisión a segunda feira, apuntando que fican aspectos por fechar para ratificar o acordo de 2019 entre a UE e o Mercado Común do Sur, o bloque económico integrado por Brasília, Bos Aires, Asunción e Montevideo -Caracas está suspendida-, e no que participan como Estados Asociados Bolivia, Chile, Colombia, o Ecuador, Güiana, o Perú e Surinam. En alusión ao documento adicional ao acordo presentado en marzo pola UE, Lula incidiu en que “amplía as obrigas do Brasil e as converte en obxecto de sancións en caso de incumprimento”, cuestionando as normas do bloque comunitario “con efectos extraterritoriais, que modifican o equilibrio do acordo”, tras aprobar a UE unha lexislación que prohibe importar cacao, café, madeira ou soia que proveña de terras deforestadas. Esta clase de normas, criticadas no Brasil como un intento proteccionista de Bruxelas para frear as exportacións do seu sector agrícola, “representan restricións potenciais” ás vendas brasileiras, salientou Lula, que pediu cooperación para reindustrialización. Nese sentido, von der Leyen recalcou que “os dous pensamos que é o momento de concluír o acordo”, fixando como límite o final deste ano, amais, subliñou ante Lula que “estamos agardando a súa resposta para saber onde temos que dar un paso”. Aliás, anunciou que o Global Gateway dedicará 10.000 millóns de euros a proxectos en América Latina e un paquete de 20 millóns de euros para o fondo brasileiro consagrado á preservación da Amazonia. Á vez, o mandatario arxentino, Alberto Fernández, puxo o foco tras reunirse con von der Leyen en que “só pedimos un acordo equilibrado, onde todos gañemos”. En todo caso, medios internacionais destacan as reticencias dos Estados suramericanos ás condicións medioambientais exixidas pola UE, como a redución das emisións de gases de efecto invernadoiro. Así e todo, as reticencias ao acordo non proveñen só de América, pois o presidente francés, Emmanuel Macron, chegou a soster que “non é posíbel” o pacto polas diverxencias nas regulacións ecolóxicas e sanitarias. En paralelo, as preocupacións tamén atinxen o sector primario galego, pola entrada de mercadorías con prezos inferiores, froito das regulacións e outras circunstancias, de países que xa concentran unha parte relevante das importacións de polo, vacún, froita, mel ou viño. Precisamente no Brasil, que posúe xunto á Arxentina a principal economía do Mercosur, o Instituto Brasileiro de Geografia e Estatística comunicou que en 2023 a produción agrícola baterá todas as marcas con máis de 300 millóns de toneladas, o que suporía 16,6% máis que as cifras de 2022. A entidade sinala que o incremento no rendemento dos cultivos permitirá unha redución de custos na alimentación dos animais que redundará positivamente no sector gandeiro. Aínda así, un informe de forzas progresistas no Parlamento da UE advertiu da presión das multinacionais para centrar o acordo no sector agrícola, tras exportar a UE en 2018 e 2019 7.000 toneladas de pesticidas prohibidos por Bruxelas aos países do Mercosur. A China, pendente do acordo co Mercosur En América, o Uruguai é un dos países máis atentos á ratificación do acordo de libre comercio coa UE, pois agarda a sinatura para avanzar co acordo comercial coa China, informou Ámbito Financiero. De feito, nunha xuntanza entre o presidente uruguaio, Luis Lacalle Pou, e Lula, o brasileiro -que apoia as negociacións de Montevideo con Beijing- adiantou que despois do pacto con Bruxelas buscarán un acordo comercial entre o Mercosur e a China. Debates para unha moeda común No contexto dunha paulatina diminución do uso do dólar estadounidense nas transaccións comerciais, a Arxentina e o Brasil propuxeron a comezos de ano a creación do “sur”, como base para unha moeda suramericana común, o que permitiría, destacaron, limitar a vulnerabilidade externa polo uso do dólar. Nesa liña, o mandatario brasileiro Lula da Silva reiterou esa posibilidade na contorna do grupo Brics, insistindo nos efectos negativos da dependencia da moeda de Washington.