Marrocos, Mauritania e Tunisia abandonan persoas migrantes no deserto do Sáhara con fondos da UE
Unha investigación de Lighthouse Reports en colaboración con medios como The Washington Post, Der Spiegel ou El País, difundida a terza feira, desvela como a Unión Europea (UE) “apoia, financia e participa directamente en operacións clandestinas” para “arroxar cada ano decenas de milleiros de persoas negras ao deserto ou a zonas remotas para impedirlles chegar á UE”.
Os países detrás destas prácticas, que “se aplican de forma sistemática case en exclusiva contra persoas negras”, Marrocos, Mauritania e Tunisia, recibiron entre 2015 e 2021 máis de 400 millóns de euros do bloque comunitario para frear a chegada de migrantes a Bruxelas, que busca intensificar a externalización da xestión migratoria.
As vítimas son desde persoas refuxiadas que estaban camiño á UE até migrantes que tiñan un status legal e residían nestes países. Nalgúns casos foron abandonadas en zonas desérticas “sen asistencia, auga nin comida, deixándoas en risco de secuestro, extorsión, tortura, violencia sexual” ou a morte. Noutros casos, son vendidas a traficantes de persoas e a bandas para que pidan rescate.