Otegi: "Disputemos, por vez primeira, a vitoria electoral"

Para Otegui, existe "unha axenda manexada polos inimigos da paz –Rajoy, Rubalcaba, Basagoiti, servizos de intelixencia...– que procura con cada vez maior grao de crueldade e de desesperación colapsar, bloquear, neutralizar e destruir o proceso de paz" e tamén “o conxunto do movemento soberanista". Así o sinala na carta recollida polo xornal Gara-

"A paz dálles pavor, por iso precisan bloquear o proceso e facelo onde aínda tiñan algunha posibilidade de influencia real, no cárcere, na represión", afirma.

Na liña desa reflexión, Otegui prosegue: "Saben que superar a fase das consecuencias do conflito levaranos de modo inmediato á fase do diálogo sobre as causas do mesmo. E non teñen ni axenda nin alternativa críbel para esa fase, saben que non poderán opor razóns democráticas aos desexos do pobo vasco de ser respectado como nación, con dereito a decidir libre e democráticamente o seu futuro".

O político elgoibartarra cre que o Estado español pretende "neutralizar" un candidato posíbel para as vindeiras elecións vascas. Admite que para el, como militante da esquerda abertzale, é "un orgullo" o feito de que o Estado crea que coa súa candidatura o independentismo gañaría os comicios e, tras indicar que "xa sabemos que candidatas e candidatos non son do agrado dos inimigos da paz", fai un chamamento para preparar "con deleite a máis refinada das respostas democráticas: Fagamos que, por primeira vez na historia, o independentismo dispute con altas posibilidades de alcanzar a vitoria nas vindeiras eleccións vascongadas".