ANÁLISE | PPE, S&D e Renovar fanse coa maioría absoluta nun Parlamento Europeo no que medra a ultradereita

As principais formacións a nivel estatal no Estado español interpretaron a segunda feira en clave interna os resultados das eleccións ao Parlamento Europeo que decorreron o domingo -entre o 6 e o 9 de xuño no bloque comunitario-, e que causaron a dimisión como líder de Sumar de Yolanda Díaz, que, non obstante, manterase como vicepresidenta segunda do Goberno e á fronte do Ministerio de Traballo e Economía Social. A formación maioritaria no Executivo español, o PSOE, asegurou por medio da súa voceira, Esther Peña, que lograron un resultado positivo, reiterando que se achegaron máis ao seu obxectivo que o Partido Popular (PP), concentrado en acabar co Executivo que lidera Pedro Sánchez, sostivo tras facerse a formación coa segunda praza e 30,18% dos sufraxios, o lle permite conseguir 20 escanos, dous por detrás do PP, con 34,20% ao absorber os votos que hai cinco anos recollera Ciudadanos. O portavoz conservador, Borja Sémper, insistiu en que Pedro Sánchez debe convocar eleccións no Estado por uns resultados que implican un “fin de ciclo”. A terceira praza foi para a ultraespañolista Vox, con seis asentos e 9,62%, seguida de Agora Repúblicas, integrada por Bloque Nacionalista Galego (BNG), Esquerra Republicana de Catalunya (ERC), Bildu e Ara Més, con tres representantes e 4,91%. As mesmas deputadas e deputados acadou Sumar (4,65%) e a extrema dereita de Se Acabó la Fiesta (4,59%), un máis que Podemos (3,28%) e dous máis que Junts (2,54%) e o Partido Nacionalista Vasco (PNV), que se fixo con 1,61% na candidatura Coalición por una Europa Solidaria (CEUS). Todo isto cunha abstención que superou 50%. Despois de que varias formacións integradas en Sumar reclamaran asumir responsabilidades por un resultado “moi malo”, Díaz dimitiu do liderado dunha organización que aínda está en proceso de conformación e negociando o papel das formacións aliadas dentro da forza política. Resultados na UE A nivel da UE, o Partido Popular Europeo (PPE), o grupo dos Socialistas e Demócratas (S&amp;D) e o de Renovar, que dominaron na última lexislatura o Executivo e o lexislativo comunitario, fixéronse nas eleccións coa maioría absoluta, superando 400 de 720 asentos a pesar da baixada dos progresistas, que perderon case 20 escanos, e dos liberais, que se deixaron unha trintena. Resultados das eleccións ao Parlamento Europeo no Estado español, Portugal, Alemaña e Francia co grupo na UE de cada formación. (Imaxe: Nós Diario) Como adiantaban as enquisas, as formacións de extrema dereita profundaron no seu crecemento, mais a un nivel menor do que apuntaban. Así e todo, os dous grupos parlamentarios, o dos Conservadores e Reformistas (ECR) e Identidade e Democracia (ID), e o resto de forzas ultradereitistas constituirán conxuntamente a segunda forza do Parlamento con máis de 150 representantes e un quinto dos sufraxios, só por detrás dos conservadores do PPE, con 186 e 25,83%. Pola súa parte, S&amp;D ficou con 135 (18,75%), Renovar con 79 (10,97%), a Alianza Libre Europea-Os Verdes (ALE-Os Verdes), na que se integra BNG ou ERC, con 53 (7,36%) após perder máis de 20 escanos e A Esquerda con 36 (5%) despois de baixar cinco asentos. O lexislativo completarano 45 postos que corresponden a formacións non inscritas en ningún grupo, e 55 novas deputadas e deputados de partidos non integrados en ningún destes grupos. A actual presidenta da Comisión Europea, a alemá Ursula von der Leyen (PPE), ofreceu ao coñecerse os primeiros resultados a S&amp;D e Renovar reeditar a alianza para dirixir Bruxelas despois dunha campaña na que abrira a porta a alcanzar acordos coa extrema dereita. Sexa como for, non é o Parlamento da UE senón os Estados membros, reunidos no Consello Europeo, os que acordan a súa proposta para a Presidencia do Executivo da UE, o que posteriormente debe ser ratificado no lexislativo por maioría absoluta. Neste sentido, a intención de Von der Leyen de buscar a reelección volverá pór a proba o choque entre os intereses de cada Estado membro, que xa marcaron o mandato anterior e que se reflicte na división de voto incluso no interior dos grupos parlamentarios na UE. O certo é que dificilmente o PPE e a extrema dereita terán capacidade para sumar maioría absoluta, a pesar do que haberá que agardar até a conformación do Parlamento en xullo para coñecer o seu peso real. Von der Leyen, do Partido Popular Europeo, defende un pacto coa ultradereita para gobernar a Comisión Europea Ao constituírse o órgano en 2019, ID sumaba 73 escanos e ECR 62, máis que os 73 que obtivo ECR e os 58 de ID nesta ocasión. Así e todo, unha das forzas deste espazo con máis representación, Alternativa por Alemaña, que se fixo coa segunda praza no Estado que máis asentos reparte nestas eleccións, 96, non está incluída ao ser expulsada pouco antes dos comicios de ID no marco dunha serie de escándalos, e figura polo de agora como non inscrita (NI). Na mesma categoría está o Fidesz de Viktor Orbán, primeiro ministro húngaro e que se mantivo como primeira forza. A ultradereita tamén se impuxo en Bélxica, Austria, Francia e Italia. Neste último país, a vitoria dos Irmáns de Italia (ECR) da primeira ministra Georgia Meloni impúlsaa como a principal representante deste sector, no que exerce como ponte co PPE de Von der Leyen. En todo caso, malia a suba na UE da extrema dereita, as dinámicas nacionais e estatais derivaron en que esta alza non fora xeneralizada, como amosa o caso de Portugal, onde o Chega perdeu case oito puntos en relación ás lexislativas lusas de marzo, ou de Finlandia, coa perda por parte do Partido dos Finlandeses de 12 puntos desde as eleccións lexislativas de 2023. As locais en Irlanda fan prever unha caída do Sinn Féin nas europeas Enmarcado na lectura interna dos resultados nos 27 Estados membros, en coherencia coa falta de consenso na UE sobre o futuro do organismo e o forte peso na toma de decisións de territorios como Alemaña, en Francia, o presidente Emmanuel Macron (Renovar), anunciou a disolución da Asemblea Nacional -na que non tiña maioría absoluta- de forma inmediata ao coñecerse a vitoria da ultradereita, convocando eleccións o 30 de xuño, cunha segunda volta o 7 de xullo. Noutros Estados, as votacións comunitarias ficaron en segundo plano ao coincidir con outras eleccións. En Bélxica, o primeiro ministro, o liberal Alexander De Croo, presentou a súa renuncia no contexto da perda de representación de Liberais e Demócratas Flamencos Abertos nos comicios federais. Xa en Bulgaria, as sextas eleccións lexislativas en tres anos supuxeron unha vitoria do conservador Cidadáns para o Desenvolvemento Europeo de Bulgaria, que tratará de formar Goberno e acabar coa inestabilidade política dos últimos anos. O Partido Socialista foi a forza máis votada en Portugal nas eleccións ao Parlamento Europeo Pola súa banda, en Irlanda, as eleccións locais consolidaron as dúas principais forzas do Goberno de coalición, os conservadores Fine Gael e Fianna Fáil, no medio dunha forte caída do Sinn Féin, que perdeu máis da metade dos apoios cos que se fixo nas eleccións xerais de 2020 perante a suba das e dos independentes, convertidos en primeira forza con perto de 30% dos votos. Á hora do feche desta edición aínda non transcenderan os resultados referentes ás eleccións europeas no territorio insular.