Pedro Sánchez comeza a súa carreira para ficar na Moncloa

A presidenta do Congreso español, a socialista Francina Armengol, anunciou esta terza feira a decisión do rei Felipe VI de propor o líder do PSOE e actual presidente en funcións, Pedro Sánchez, para que se someta a un novo debate de investidura na Cámara Baixa tras a derrota da candidatura do popular Alberto Núñez Feixoo. Despois da segunda rolda de consultas que Felipe VI mantivo nas pasadas xornadas no Palacio da Zarzuela con sete das once formacións con representación no Congreso, o rei español trasladou a súa decisión a Armengol. Agora, a presidenta do Congreso deberá pór data á segunda sesión de investidura da lexislatura, mais farao tras conversar co candidato para saber que tempo necesita para os seus encontros con representantes doutras formacións políticas en busca dun acordo, se ben o prazo para que decorra o pleno no Congreso é limitado, até o 27 de novembro. Armengol propón modificacións nas votacións a viva voz no Congreso para evitar 'erros' Se chegada esta data tope ninguén conseguise superar a votación de investidura, as Cortes Xerais disolveríanse e procederíase á convocatoria dunhas novas eleccións estatais, que terían lugar o 14 de xaneiro. Tras ser designado como candidato á investidura, Sánchez realizou unha comparecencia na que evitou facer unha alusión directa a unha lei de amnistía para as persoas enxuizadas polo procés catalán, condición que Junts e ERC sinalan como indispensábel para apoiar a súa investidura. Non obstante, o presidente en funcións si defendeu a necesidade de ter "xenerosidade" e de "facer política" en Catalunya. Pola contra, o candidato socialista á Presidencia recalcou o seu rexeitamento a un referendo de autodeterminación, "non só por compromiso e exixencia constitucional senón por unha convicción política", aseverou. En todo caso, o presidente en funcións considerou que o resultado das eleccións do 23 de xullo reflicte que non se pode aspirar a gobernar o Estado español se non se recoñece a "diversidade territorial", unha condición que, ao seu xuízo, "a dereita política e mediática nunca aceptou". Ademais, anunciou que comezará unha rolda de encontros coas forzas parlamentarias para lograr a maioría na súa investidura. As reunións comezarán esta cuarta feira con Sumar, e proseguirán nos días seguintes co resto de formacións presentes no Congreso, excepto con Vox. Antes, Feixoo asegurou en rolda de prensa que prefire unha repetición das eleccións estatais en xaneiro antes do "Goberno da mentira" que augurou que encabezará Sánchez, ao que sinalou como "actor de repartición" do ex president catalán e líder de Junts, Carles Puigdemont. Porén, pese ao "teatriño" dalgúns grupos parlamentarios, considerou que xa hai un "pacto fechado" do PSOE con grupos como Sumar ou ERC para conformar unha "maioría negativa" á alternativa do Partido Popular. Sumar non asegura o apoio á investidura A portavoz de Sumar no Congreso, Marta Lois, afirmou esta terza feira que a súa formación ten vontade de acordar un futuro Goberno de coalición co PSOE, mais que non o fará a "calquera prezo" nin permitirá unha lexislatura "curta e ao ralentí". Lois subliñou que as negociacións están aínda "verdes" e que, por tanto, non poden garantir o apoio sen concretar unha serie de avances nunha "axenda social ambiciosa". Podemos carga contra Sumar e cuestiona o papel de Marta Lois: "Faltoulle nervio democrático e loita ideolóxica" Desta forma, Lois salientou que Sumar está "lonxe" de alcanzar un acordo co PSOE, mais que este é o seu desexo e por iso encara as conversas cos socialistas "sen liñas vermellas e sen fixar prazos" para un posíbel pacto para converter de novo Sánchez no presidente español. Porén, fontes socialistas consideraron que a formación liderada por Yolanda Díaz di unha cosa dentro e outra fóra. Ademais, indicaron que o PSOE ten a intención de recuperar o control do Ministerio de Igualdade, até o de agora en mans da representante de Unidas Podemos, Irene Montero, que segundo afirmaron, xerou tensións internas na coalición na última lexislatura. Ana Pontón di que o voto do BNG "hai que gañalo" A portavoz nacional do BNG, Ana Pontón, insistiu esta terza feira en que o voto do deputado da forza nacionalista no Congreso, Néstor Rego, "hai que gañalo". Ademais, incidiu en que a posición do Bloque está "clara": "Coa Galiza todo e sen a Galiza, nada". Pontón puxo de manifesto que é "evidente que hai un novo escenario: unha nova investidura ou eleccións". "Ese é o dilema que temos neste momento que resolver", apuntou. A continuación, a portavoz do BNG reiterou "con toda claridade" que Sánchez "a día de hoxe non ten o apoio do BNG". Para telo, dixo, "ten que comprometerse con proxectos estratéxicos" para a Galiza. Montero prioriza os Orzamentos A ministra española de Facenda e Función Pública en funcións, María Jesús Montero, afirmou esta terza feira que nas negociacións para a investidura do actual presidente do Goberno en funcións, Pedro Sánchez, están a falar das cuestións que afectan "o momento concreto da investidura" mais tamén doutros asuntos que afectan a "gobernabilidade" dos próximos catro anos, con especial fincapé na aprobación dos Orzamentos Xerais do Estado (OXE) para 2024.