PSOE, Junts e ERC aplanan o camiño á Lei de amnistía: esta é a súa proposta

Nun comunicado conxunto na noite da cuarta feira, o PSOE, Junts e Esquerra Republicana de Catalunya (ERC) fixeron público que fecharon un pacto para aprobar o ditame do proxecto de lei de amnistía na reunión da quinta feira da Comisión de Xustiza do Congreso, o que permitirá que o Pleno da Cámara Baixa volva votar a iniciativa, que, de forma previsíbel, será validada desta volta. O entendemento, que se executará a través dunha “transacción única a partir das diferentes emendas que se mantiñan vivas”, cubrirá todas as persoas independentistas catalás represaliadas polo Estado, e ten en conta as “directrices do dereito constitucional, europeo e internacional, así como o informe preliminar da Comisión de Venecia”. No que atinxe ao contido da transacción, indicaron que se desvelará antes da reunión da Comisión. O acordo prodúcese logo do cambio de posición do PSOE. A comezos desta semana, Esther Peña, voceira da Comisión Executiva Federal, insistía en que “non temos previsto facer ningunha modificación” no proxecto de lei de amnistía, como moito, “algún pequeno cambio”, matizaban fontes da forza estatal. Porén, o presidente español e líder da formación, Pedro Sánchez, sostivo a cuarta feira que a proposta sería modificada para ofrecer “máis garantías” a Junts e ERC. “Eu nunca tiven ningunha dúbida de que estaban todos incluídos”, explicou en alusión ás persoas represaliadas polo Estado, reiterando que “todos van ser amnistiados, vanse cubrir todos os supostos”. Tamén ERC, por medio da súa voceira no Congreso, Teresa Jordà, adiantara que as conversas “a tres bandas” estaban a “avanzar favorabelmente”, mais advertiu de que “sempre hai un risco, non podemos ir a remolque de cada xuíz ou de cada ocorrencia de cada xuíz”. A Xustiza española lánzase contra a amnistía ante o inminente acordo entre PSOE e Junts Precisamente a ofensiva contra a amnistía lanzada polo sistema xudicial español, controlado polos conservadores, está detrás da demanda de Junts de máis garantías para evitar que persoas represaliadas queden fóra da medida de graza, no marco da imputación por terrorismo do ex presidente catalán Carles Puigdemont (Junts) e da secretaria xeral de ERC Marta Rovira, e da posibilidade de que o ex mandatario sexa acusado de traizón. Isto motivou o veto de Junts á primeira proposta no Pleno, causando o seu regreso á comisión. Sánchez non quixo confirmar se as modificacións abranguen o ámbito do delito de terrorismo na norma, mais asegurou que será constitucional. En paralelo, o presidente catalán, Pere Aragonès, cualificou a lei de amnistía como unha “oportunidade única” para superar “unha represión que afectou e afecta a moita xente, e que moitos avalaron directa ou indirectamente”, e desta maneira abordar a “cuestión de fondo”, celebrando as “correccións” para que o texto reciba luz verde. Unha das persoas represaliadas é Dani Gallardo, ao que a Audiencia Provincial de Madrid ordenou deter a cuarta feira para que cumpra unha pena de 4 anos e medio de prisión tras ser condenado por presuntamente cometer desordes públicas e un atentado contra a autoridade cun delito leve de lesións, durante as manifestacións en Madrid en 2019 para rexeitar as sentenzas de cárcere contra membros do Goberno catalán, inculpados por organizar un referendo de autodeterminación. Gallardo denunciou o xuízo como unha “burla”, así como ter recibido unha malleira dos axentes esa noite por interporse cando agredían unha amiga, e xa pasou trece meses en prisión provisoria. As súas persoas achegadas sinalaron que “non porán fácil” que sexa localizado. A dereita e a ultradereita españolas apreman a Xustiza para frear a investidura de Sánchez e a amnistía No tocante a Junts, o senador Josep Lluís Cleries deixara entrever a existencia dun acordo para o avance na tramitación parlamentaria da amnistía e o conseguinte apoio da formación á proposta de Orzamentos Xerais do Estado do Executivo español. Renovación do Poder Xudicial español O vicesecretario de Acción Institucional do Partido Popular (PP), Esteban González Pons, ameazou con rachar as negociacións co PSOE para a renovación do Consello Xeral do Poder Xudicial (CXPX) aseverando que “é moi difícil chegar a un acordo” con quen “está humillando, desautorizando e obrigando o Tribunal Supremo a corrixirse”. O CXPX leva máis de cinco anos co seu mandato caducado, e a súa remuda foi bloqueada en múltiples ocasións polo PP, que se garante así a permanencia da maioría conservadora. Neste tempo, aduciu desde a eliminación do delito de sedición até as negociacións con forzas soberanistas, pasando por exixir unha reforma do método de elección do Poder Xudicial, para xustificar a ruptura de conversas co PSOE arredor desta cuestión. Desta vez, e tras un acordo entre Sánchez e o presidente do PP, Alberto Núñez Feixoo, está a decorrer un proceso negociador coa presenza de ambas as dúas formacións mediado por Didier Reynders, comisario de Xustiza da Unión Europea, que un día antes recalcara que había “posibilidades” dun pacto de cara á seguinte xuntanza o 13 de marzo.