O PSOE rexeita a proposta do PP para que Feixoo goberne o Estado español dous anos

Durante aproximadamente tres cuartos de hora, Pedro Sánchez, presidente en funcións do Estado español e líder do PSOE, e Alberto Núñez Feixoo, que encabeza o Partido Popular (PP) e foi designado polo rei Felipe VI para presentarse a unha sesión de investidura á Presidencia, reuníronse a cuarta feira no Congreso, máis de dez meses despois do seu último encontro oficial. A xuntanza foi a primeira da rolda de contactos coas forzas políticas con representación a nivel estatal -agás EH Bildu- anunciada polo PP unha vez nomeado Feixoo polo monarca, de cara a unha investidura 26 e 27 de setembro para a que non hai ningún indicio de que poida obter os apoios que precisa máis aló dos que xa comprometeu a ultraespañolista Vox, Coalición Canaria e Unión del Pueblo Navarro. Neste contexto, tanto desde o PP como desde Vox deixaron entrever que se poderían producir casos de transfuguismo no PSOE que permitirían a Feixoo facerse co poder. Así e todo, na reunión, Feixoo trasladou a Sánchez unha proposta na que pide ao PSOE que, “ante o risco de repetir eleccións en catro meses”, o apoie para que o PP goberne durante dous anos, período no que se desenvolverían seis proxectos que o PP definiu como “pactos de Estado”. Estas iniciativas estarían referidas á “rexeneración democrática”, incidindo na “independencia do órgano de goberno dos xuíces”, ao “Estado do benestar” ou ao “saneamento económico”. Tamén recolle un “pacto polas familias” para “garantir novas fórmulas de compatibilización da vida laboral e familiar e racionalizar os horarios e condicións de traballo” e outro sobre o acceso á auga, mentres que o último apartado alude a un “pacto territorial” que reforme o Senado e “fortaleza a España das autonomías”. Asemade, define como “prioritario” aprobar “un novo modelo de financiamento autonómico e local”. O documento entregado a Sánchez apunta que unha vez aplicados estes proxectos ou pasados dous anos a lexislatura remataría e habería eleccións, a menos que PSOE e PP acordasen prolongala, detalla o texto. En paralelo, fontes do PSOE transmitiron a medios estatais que o presidente español en funcións propuxo a Feixoo que “se comprometan formalmente” a renovar o Consello Xeral do Poder Xudicial (CXPX) antes do 31 de decembro, “sexa quen sexa a persoa elixida como presidente do Goberno polo Congreso”. Logo da fin da reunión, Feixoo aprestouse a rexeitar esta posibilidade, insistindo en que de forma previa habería que “blindar” a súa independencia, un dos principais argumentos do PP para bloquear nos últimos catro anos e medio -cando caducou o seu mandato- a renovación do CXPX, que lle permite manter unha maioría conservadora nos órganos xudiciais máis determinantes a pesar de que desde 2015 a aritmética do lexislativo é favorábel ás forzas progresistas e soberanistas. Todo isto cando están pendentes de xuízo múltiples casos de corrupción nos que o PP está implicado. A formación conservadora tamén protagonizara os outros dous bloqueos á renovación do CXPX desde o final da ditadura franquista, co fin de garantir a súa primacía no órgano. A propia Unión Europea comunicou en distintas ocasións que a renovación é urxente, indicando que a reforma do sistema de elección, que exixe o apoio de tres quintos do Congreso, é algo que se ten que afrontar con posterioridade. Negativa do PSOE O bloqueo foi citado por Pilar Alegría, voceira do PSOE e ministra de Educación, após a reunión da dirección da forza estatal, como unha mostra de que “para ofrecer pactos tes que ter credibilidade”, coa que o PP non conta, subliñou, ratificando que o PSOE “non vai apoiar a investidura do señor Feixoo”. Alegría ironizou con que Feixoo pasou de “querer derrogar o sanchismo” con Vox a “rogar ao sanchismo”, facendo fincapé en que coa investidura “falida” Feixoo “busca a súa supervivencia política”, e acusouno de “non estar a traballar pensando na estabilidade do país, senón en como salvar a pel”, en referencia á posibilidade dun novo cambio de liderado no PP de fracasar Feixoo na investidura e non producirse unha repetición electoral. Amais, cualificou como “cinismo e hipocrisía sen límites” que o líder conservador defenda que goberne a lista máis votada cando en Estremadura pactaron coa extrema dereita para evitar precisamente iso. O propio Feixoo destacou, antes de que o PSOE confirmara que non recibiría o seu apoio para a investidura, que “constatou” na xuntanza con Sánchez que “prefire pactar cos independentistas” e “negociar amnistías, referendos e grupos parlamentarios que non cumpren os requisitos do regulamento”, reiterando que fóra da opción de “deixar a gobernabilidade en mans dos independentistas” a única alternativa é a súa oferta de acordo ao PSOE. Á vez, remarcou que “non quero ser presidente do Goberno a costa da igualdade dos españois”, tras a polémica no seo do PP pola decisión de negociar con Junts, a forza soberanista catalá do ex presidente territorial Carles Puigdemont, que recibira os ataques dos conservadores nos últimos anos e está en conversas co PSOE na pescuda dun acordo que permita investir Sánchez como presidente. Vox e Sumar, seguintes paradas na rolda de contactos Despois da reunión con Sánchez, Feixoo anunciou que as seguintes forzas coas que se verá no marco da sesión de investidura fixada para finais de setembro son Vox e Sumar, e aseverou que manterá a mesma aposta pola “igualdade” entre territorios que sostivo diante do PSOE, inculpando as forzas soberanistas de acabar con ela con “exixencias que son inconstitucionais, discriminatorias e que non estaban nos nosos programas” electorais. A pesar disto, unha lei de amnistía que beneficie as e os independentistas cataláns axuizados, perseguidos ou exiliados pola organización dun referendo de independencia en 2017 é un elemento clave, entre outras reclamacións, para que Junts e Esquerra Republicana de Catalunya acaben por apoiar a investidura de Sánchez. “Paso a paso”, sinalou Alegría ao ser consultada ao respecto. Para que o presidente español en funcións volva ser investido tamén tería que obter o apoio das forzas soberanistas vascas e do Bloque Nacionalista Galego.da defende a proposta de Feixoo O presidente galego, Alfonso Rueda (PP), considerou unha “mostra de xenerosidade” a proposta do PP para que o Executivo español “non dependa” de “exixencias que teñen moi pouco que ver co interese común”.