Rajoy, ameazante: "Vannos obrigar a chegar onde non queremos chegar"
Esta sexta feira, Rajoy visitou Barcelona non como chefe do Goberno español, senón como líder do PP, para tomar parte nunha xunta directiva do PPdeC. Alí -alén de se gabar da incautación de 100.000 cartaces do referendo por parte da Garda Civil- deixou a súa mensaxe máis belicosa.
A resposta de Rajoy á oferta de diálogo das principais autoridades catalás -a carta asinada por Puigdemont e Colau- foi elevar o ton e mostrar a disposición do Estado a continuar "actuando" en defensa da lei.
Non pode haber diálogo mentres o Govern continúe a desacatar as resolucións do TC, dixo Rajoy, e a seguir engadiu: "Non imos aceitar o que vostés propoñen, non subestimen a forza da democracia española, é moi forte, España é unha grande nación". Aquí a palabra chave é "forza", ou sexa, o despregamento de todos os aparatos do Estado contra os preparativos para a realización do referendo.
"Non haberá referendo", voltou a engadir. "Están a cometer un serio erro [dixo en alusión ao bloco independentista] e vannos obrigar a facer aquilo que non queremos", afirmou en referencia a recursos extremos como eventualmente a suspensión dalgunhas competencias básicas da autonomía (por exemplo, a toma de control da TV3 ou a asunción directa do mando sobre os Mossos d'Esquadra).